الثلاثاء، 6 أكتوبر 2009

و مر عام على المدونة العزيزة

* النهاردة يوم عظيم جدا , سيخلد فى ذاكرة التاريخ , مش لأن أبطالنا عبروا و انتصروا و حطموا أسطورة الجيش الذى لا يقهر لأ , بس لأن مدونتى الجميلة ( عدوها عدوها ) مر على سنة , يعنى يدوب ممكن تكون بدأه تمشى دلوقتى . تسألنى ليه دونتى يوم ستة اكتوبر ؟؟ أقولك كان يوم أجازة و الواحد انتهز الفرصة عشان يعملحاجة بتاخد وقت شوية زى انشاء المدونة . هو النهاردة مش كان ح يجى فى دماغى أعمل بوست لولا انى لقيت كله بيعمل كده بعد مرور عام على مدونته , يمكن هى صحيح فقرية ( مش بتطلع ع الريدر و زباينها قليلين و عندها مشكلة فى الفورمات ) , بس زى بنتنا برده , ندعى و نكره اللى يقول أمين ههههههههههه. المهم, هو التدوين فادنى فى كام حاجة كده ح أقصر و فى سريع ح أقولهم , أولا : زى ما هو كان ليكوا كلكوا مساحة تعبير حرة مفيهاش الرقابة اللى بتاعنى منها وسائل النشر التانية , فهو كان كده بالظبط بالنسبة لى و يمكن اكتر كمان لأن أنا لما بكتب حاجة هنا بتكون غالبا المسودة للمقال اللى عايزه أكتبه . ثانيا : المدونات بتديك الكتالوج ........ بمعنى أنماط شخصياتنا بنى أدم و أنماط شخصياتنا ( كمصريين ) على وجه الخصوص واضح أوى هنا ( و ابقوا فكرونى نعمل ع الموضوع ده بوست لوحده ) . ثالثا :أتعرفت على ناس حلوة كتير , و بعدين لقيت نفسى دخلت فى شلة لذيذه كده , و صدقت أن التدونين فيه شللية الصراحة , و لو انى لم أقابل الشلة دى فعلا , بس ان شاء الله أكيد ح نتقابل مرة ( أصل مدونين اسكندرية كسلانين كده ) . رابعا : معنديش حاجة أقولها غير انى كنت النهاردة ناوية اغير قالب المدونة , و أعمل واحدة غيرها بنفس الاسم كما أقترح زميلنا بدراوى , بس اللى حصل أنى كاتبة لسته بالحاجات اللى المفروض أعملها و معلقاها فوق المكتب و الحمد لله متعملش منها حاجة لسه ههههههههه. * بشكر الناس اللى بتفضل تتابعنى حتى و أنا مش موجودة فيمكن مش بيجى هنا ناس كتير بس هما جمهور ثابت ( جمهور على اساس أننا فاتن حمامه و نجمة شباك و كده ) خايفة أسميهم بالاسم أنسى حد بس كل واحد عارف نفسه ( بالمعى الايجابى يعنى ) و ده معناه انى على الرغم انى مش مواظبة فى الكتابة هنا بس علقت معاهم الى حد ما . * اللى عنده حاجة عاوز يقولها يقولها , اللى عاوزنا نتكلم فى موضوع معين يقول , اللى عاوز يسأل حاجة يسأل , هو اوكازيون يعنى . و تحياتى ليكوا كلكوا كل سنة و انتوا طيبين ............... سارة نجاتى ...

هناك 34 تعليقًا:

Unknown يقول...

اول تعليق
اولاً ليكى الشرف ان اسمى يبقى مكتووووب
فى بوست احتفالى بمرور عام على مدونتك
ده فى حد ذاته احتفالية
لوحدها

ثانياًَ بقى فيه لقاء مدونين سكندرى خيرى يوم السبت القادم فى نادى المهندسين
ده للعلم ليس الا

ديه تفاصيله
http://mero200528.blogspot.com/2009/10/blog-post.html
------
عارفة اكثر شىء عجبنى فى التدوين دلوقتى
انى بطلته صدقينى مرتااااااح جداً من غيره
عمال اعبى جوايا و اكتم
يا سلام اجدع شىء

انا مبطل تدوين بشكل مؤقت مش بشكل دائم

و اعملى المدونة الجديدة
و رجاء اهتمى بالفورمات شوية
مش كله كدة بدون فقرات

Che يقول...

كل سنه وانتى طيبه يا سارة و عقبال ما مدونتك تكبر كده و يبقى عندها 100 سنه و تبقى مدونه كركوبه بس اموره
بالنسبه للهديه انتى طبعا بتحاولى توقعينى انا و زيكا فى بعض ... انما ده لا يمكن ابدا .... انا و زيكا عشره كهربا فى الفيس بوك سوا ... فاكره ولا نسيتى .... ههههههه
بس بجد ليكى عندى هديه كبيره بس خليها مفاجأه .... بس يا رب تبقى تعجبك

سارة نجاتى يقول...

بدراوى
يا عينى ع التواضع ههههههههه
بالنوسبة للقاء ربنا يسهل
لو صحابى رايحيين ممكن اجى معاهم
ما مشكلة الفورمات دى مشكلة لوحدها بس فى حد قال لى انه بسبب
explorer
نفسه , لأنه فتح عنده عادى

و بجد بشكرك على متابعتك ليا
تحياتى

سارة نجاتى يقول...

تشى

بوقع ليه ؟؟ هو ح يجيب خاتم سوليتير و أنا بشجعك أنك تتفوق عليه و تجيب حاجة أحسن , يعنى الحق عليا ههههههههه

قال كهربا قال ,
و انت طيب يا باشا و مستنية الهدية الجبارة دى
سلام

Zika يقول...

انا عاوز بيبس
وحتتين تلج
وتورتايه
واتنين كادبوري بندق من الكبيره
وياريت شوية لبان
وكيس شيبسي عائلي بالخل
وعلبتين مارلبورو ابيض
وولاعه
وتي شيرت الاهلي الجديد .. بس طبعا اوريجينال مش تنزلي تجيبي ماللي ع الرصيف
امممم
اه
وياريت جونتي بدل اللي ضاع عشان الشتا داخل


ده بمناسبة عيد ميلاد المدونه

Unknown يقول...

كل سنه والمدونه وصاحبتها سالمه يا ست ساره

انا هلأ اجيت وقعدت قرأت شوي
تاري رايح علي كتير هون:)

ويا ريت على قولة الاخ بدراوي تهتمي بالفورمات

لاني جد بتعب وانا بقرأ :)

سلامات

Unknown يقول...

سارة
انتى مش كنتى كاتبة بوست بعنوان الخيميائى
نقلاً عن باولو كويلهو

راح فين ؟!

غير معرف يقول...

عقبال 100 سنة و استمري الي الأمام و لا تنظري للخلف .
عمك من اعماق الصحراء العربية

Magi Mostafa يقول...

ياه سنه بحالها
كفايه بقى كده خنقتينا يا بت
ههههههههه
كل سنه وانتى طيبه وعقبال 100 سنه من التدوين
على فكره انا عايزه اشوفك انا هكون فى اسكندريه قريب ده يعنى لو مكسلتش شوفى وقتك ايه عشان لو نتقابل او كده
:X

أحمد عاطف يقول...

كل سنة وانتي طيبة

وعقبال 3 سنين تدوين

عشان بعد كده تركزي في حاجه جديده :D

هو ليه مدونتك لما بضيفها في مدونات صديقة جيبالي البوست اللي من 5 شهور

يمكن عشان كود النسخ ؟؟؟

تحياتي ليكي

micheal يقول...

هازي بازي يويو
طبعا أنا من أوائل المتابعين لفاتن حمامة
يلا إلي الأمام يا نجاتي
تحياتي

سارة نجاتى يقول...

زيكا

نعم ؟؟ فين أنت الخاتم السوليتير اللى وعدتنى بيه و اللى المفروض كنت ح اغيظ بيه تشى , هه؟؟

أجيبلك كمان دى فى دى , على رأى اللمبى؟؟ههههه

سارة نجاتى يقول...

مياسى

من عينى

بس يعنى ايه تارى رايح كتير هون ؟؟

ههههههههه

أنت ايه أخبارك؟؟

سارة نجاتى يقول...

بدراوى

البوست اسمه سر السعادة
و كاتبه فى الأخر تنويه أنه مأخوذ عن باولو كويلهو

ليه بتسأل؟؟

سارة نجاتى يقول...

عمى

علم و ينفذ يا فندم

سارة نجاتى يقول...

ماجى

ده اسكندرية منورة من دلوقتى

شوفى جايه امتى و نظبط ع الفيس

سارة نجاتى يقول...

أحمد عاطف

نفسى اعرف السبب برده

ايه كود النسخ ده ؟؟

منور

سارة نجاتى يقول...

مايكل

طبعا يا مايكى
أنت شهدت ميلاد النجمة هههههههه

منورنى يا جميل

Unknown يقول...

ساره

تاري = أتاريه
رايح علي كتير هون = في تدوينات كتيره ما قرأتها

اما بالنسبه لاخباري فحاليا
انا مساعد قاعد = قاعده في البيت لا شغله ولا مشغله

:)

Che_wildwing يقول...

كل سنة ومدونتة حلوة وجميلة وعسولة زيك بالظبط

youssef يقول...

كل سنة و المدونة طيبة .. الصراحة قالب المدونة و شكلها يدخلوها ترتيب متقدم فعلا في جمعية الرفق بالمدونات اللي بتتعرض لتنفيض و اهمال أصحابها الشنيع ..

و بالمناسبة دي احب افتكر معاكي كلام مهم زي ساعة لقلوب غيرك و العزف علي القيثارة و ان تكون انسانا .. و بوست كوميدي جدا عن مدام سيلفي .. و بوستين زمان واحد تساؤل عن الافكار اللي زي الحصان المربوط في عمود و التاني كان عن الاحتفاظ بالاشياء و ده بالذات جميل أوي لولا انه ينقصه بعض " الشاعرية " .. لكنك بتكتبيه بتلقائية اندفاعية ناشفة أوي .. و انا جاي اقول كده بصراحة .. انتي بتكتبي باندفاع تلقائي مباشر .. بتتفاعلي و تقولي رأيك ببساطة و وضوح في أي موقف .. و احيانا بيكون الموقف بسيط أوي مش باين له هدف كانك بس بتحكيه و دي فايدة تدوينية برده .. لكنك غالبا بتكشفي فكرة و تناقشيها وراه .. جميل .. لكن الاندفاع المباشر ده ممكن ييجي ساعات علي حساب تنظيم الافكار و تماسك الموضوع او توضيح جانب عميق من الفكرة .. التلقائية جميلة فعلا لكن تنظيمها و تهذيبها و اكمال نقصها اجمل .. زي بوست الاحتفاظ بالأشياء .. بتحكيه بشكل جامد أوي .. مجرد سرد .. لكن لو ركزتي شوية هتوجدي اللمسة الشاعرية اللي ما حسيتهاش فيه .. فاكرة لما وصفتي شخصيتك بكلمة : كوكتيل .. يظهر الموضوع مش تدوين بس لكن عموما .. جميل تكوني كوكتيل يا أستاذة .. بس لو فيه طعم معين ظاهر علي السطح صدقيني الصورة هتبقي أجمل .. و أميز .. فاهماني

و اسوأ بوست بقي .. هنخليه للسنة الجاية .. كل سنة و انتي طيبة

مواطن مصري يقول...

عقبالللللللللللللللللل مليون سنة تدوين كدة و نحتفل ب العام ال80 انشاء الله

عمرو

سارة نجاتى يقول...

مياسى

حلوة مساعد قاعد دى هههههههههه

طب ايه اخبار الرسالة بتاعتك ؟؟

سارة نجاتى يقول...

تشى

متشكرين يا باشا , بس أنت ابقى أسأل علينا بس

سارة نجاتى يقول...

يوسف

قريت الكومنت بتاعك كذه مرة لأنه عجبنى جدا
أولا بالنوسبة للرفق بالمدونات فاللى بيته من ازاز يا حبيبى هههههههههه

فى قدر من التفاعل معايا عالى أوى
لو كنت قدامى دلوقتى كنت خدتك بالحضن
بس لأن احنا عيلة محافظة
و لأن أبويا و عمى صعايدة
يعنى ممكن يقتلوك و يتاوونى
خلينى أشكرك من بعيد لبعيد أحسن ههههههههه
بص يا سيدى
ملاحظاتك كلها فى محلها و أن بكتب بتلقائية شديدة
بس أن بطبعى بميل للعقلانية ,
حتى فى المواقف اللى بتبقى محتاجة لمسة شاعرية بتعامل معاها بمنطق حبه
ده طبعا مش مطلوب على طول
بس اللى حاصل
الاندفاع بيأثر على عمق الموضوع
أه معاك حق
بيأثر على تنظيم الأفكار
لأ مش معاك حق
لأن دى الحاجة الوحيدة اللى عدله عندى ههههههههههه

بجد بجد بشكرك و بليييييييييييييز تابعنى و علق على كل بوست و قولى رأيك

تحياتى

سارة نجاتى يقول...

مواطن مصرى

فين هديتى ؟؟ اصطعبتونى أنت و عمرو تشى و زيكا

Unknown يقول...

زمان خلصت الرساله يا ساره

هلأ بستنى بالشهـاده:)

prince4ever يقول...

كل سنه و انتي طيبه يا ساره
ياااااااااه بقالي زمن مجتش هنا
بس و الله ف امتحانات ما انتي عارفه الطب ماشي بالمشقلب

ادعيلي بقى كده و قلت اجي امسي و اطمن

سلااااااام

Tamer Moghazy يقول...

فيه مكان ذيادة عندكم..؟
اصلي سمعت انه فيه تورت وجاتوهات هنا قلت اعدي الحق لي اي حاجة..

كل سنة ومدونتك طيبة

micheal يقول...

شكلك ناوية تعتصمي للذكري السنوية الثانية

اسماء عوني يقول...

هابي بيرز داي تو يووووو
تصدقي الريدر ابن الجزمه جايب انك بقالك 6 شهور مانزلتيش حاجه من ساعة جايزة فولتيير ادخل الاقي في بوستات جديده
الريدر ده عميل وجاسوس ولازم نبلغ عنه
وحشتني مدونتك اوي يا سوكا والله فيتك من زماااان

أميرة علي كوكب مهجور يقول...

كل سنه وانتي طيبة يا قمر و عقبال لما المدونة يفوت عليها 100 سنة و حتي لو المدونة مش ظهرت ع الريدر فورمات من غير فورمات انا متابعكي و بحب بجد مدونتك :)

اقصوصه يقول...

كل عام

والمدونه

وصاحبة المدونه بعد

بالف الف خير :)

Unknown يقول...

كل سنة وانتي والمدونة طيبين وعقبال 100 سنة تدوين