الأربعاء، 1 يوليو 2009

حوار

واحد من الحوارات التى أتذكرها بدقة - على الرغم ما هو معروف عنى من زهايمر - و دائما ما أردده بينى و بين نفسى بين الحين و الأخر : - متروحيش يا ندى , المكان كله أمريكان و مكتشفين امبارح حالات اصابة جديدة فى الجامعة الأمريكية. - مش عارفة ..... أصل حابه أخد الكورس ده أوى . - للأخريات : بلاش يا رنا أنتى و مريم تروحوا . -ترد ندى و هى أكثرنا تدينا: بصى أنا مؤمنة بالقدر جدا جدا و لو ربنا عاوز يحصل لى حاجة ح يحصل لى . - لا و الله ؟؟؟ يعنى تروحى لقضاكى بنفسك و تقوليلى لو ربنا عاوز ح يحصل لى . -على فكرة أنا حتى لو جه لى حاجة و عرفت أنى ح أموت بكرة مش ح أزعل أوى ..... أصلى معملتش حاجة فى دنيتى أندم عليها . - يعنى مش ح تحسى أن فى حاجة كان نفسك تعمليها و ملحقتيش او هدف عاوزه تحققيه . -أصل أنا عملت حاجات كتير أوى و رحت 27 قرية من قرى الساحل الشمالى و نزلت بيسينات عمر ما حد نزلها و طلعت رحلات و سافرت كذا مرة , خلاص ح أعوز ايه تانى ؟؟. -نزلتى بيسينات ؟؟؟ يعنى أنتى كده خلصتى اللى عندك ؟؟. -أصل كده خلاص ح يبقى قضاء ربنا و قدره و أنا برده كنت بصلى و ملتزمة فى لبسى و ختمت القرأن مرة قبل كده. تتدخل مريم : ختمت القرأن مرة ؟؟ و هو كده كفاية ؟؟ أنا حاسه أن طفلة اللى بتتكلم ( بالمناسبة مريم حافظة للفاتحة بالعافية ) . - يعنى انتى شايفة أن علاقتك كده بربنا كويسة عشان بتصلى الخمس فروض و بتقرى قرأن ؟؟. - لأ طبعا , أنا عارفة أن فى ناس بتصلى التراويح و بتقوم الليل و ليها ورد بتقراه كل يوم . - مش قصدى الجانب الخاص بالعبادات , طب ما أنا و غيرى كتير مهما بنعمل مهما نعمل من الحاجات دى بنحس أنه مش كفاية و أنا ربنا مش راضى عننا . -لا , لا , أوعى تحسى بكده . - طب فين الجوانب التانية بعلاقتك بربنا ؟؟. -قالت باندهاش : زى ايه؟؟. - الجانب الروحانى مثلا . - أه أكيد مهم . - طب متروحوش الكورس . -متقلقيش ح نروح بس مش ح نسلم على حد , من بعيد لبعيد كده .

هناك 34 تعليقًا:

Unknown يقول...

الحقيقة مش عارف اوصل لمغزى القصة
بس على ما اعتقد
لا مريم صح و لا ندى صح
الإثنين غلط

كلنا بنعمل اخطاء طبعاً
بوصفنا بشر
حتى لو اخطاء صغيرة

Che يقول...

ايه الحوار العسل ده يا ساره ... ايه رأيك اجيب فناجيلى و اجى اصله بيموت فى الحوارات دى برضه
تعليق جانبى
جامده جدا حته يخلوا منى زكى توقع على قفاهم اللى انتى كتبتيها عند ماجى .. ضحكتنى بجد

Unknown يقول...

ممم

دايما الك نظره مختلفه يا ساره

هو فعلا ايش اللي بيحدد ايمانا الحقيقي؟ سؤال محيرني انا كمان!!

Magi Mostafa يقول...

اه ماما قالتلى كده برده لما قولتلها انى هروح اخد كورس هناك وقالتللى اخلينى فى المعهد البريطانى احسن
بالنسبه لرنا ومريم الايمان بالقضاءوالقدر ميعنيش ابدا اننا منفكرش "ولا تلقوا بايديكم الى التهلكه" ولا ايه
هو المدونه بتاعتك دى مش هتقرى عندى تانى ولا ايه
شوفيلك حل

سارة نجاتى يقول...

بدراوى

دى لا قصة و ليها مغزى محدد
دى بتلقى الضوء على اشكاليات كتيرة منها تعامل الانسان مع فكرة الموت , و علاقتها بتكوينه و علاقته بربنا و شكل العلاقة دى

و بعدين هى لا دى غلط و لا دى غلط , هما مش قصدهم على أننا بنعمل أخطاء خالص

بس منور برده

سارة نجاتى يقول...

تشى

حبيب قلبى عمورة , ازيك؟؟
أه أمال ايه ده فناجيلى يتألق هنا , هو يحب النقاش الفلسفى ده ههههه

أه طبعا ما أنا مشهورة بخف دمى و ظرفى و لطفى حتى و أنا متنرفزة ( وش منفوخ )ههههه

سارة نجاتى يقول...

مياسى

و الله أنا ما عارفة , بس كويس انك بتعتبريها نظرة مختلفة غيرك بعتبرنى لسعت خلاص ههههههه

منورانى

سارة نجاتى يقول...

ماجى

نفسى أعرف ليه المدونة مش بتقرى عند الناس بجد؟؟

المشكلة كمان يا ماجى مش حكاية أنهم بيرموا نفسهم فى التهلكة المشكلة أن ندى مثلا شايفة أن وظيفتها فى الدنيا تصلى و تنزل البسين , عشان كده لما لقت نفسها بتصلى الخمس فروض و راحت 27 قرية سياحية أن هى كده خلصت اللى عندها و على استعداد أن تتقبل فكرة الموت

سلامات

Unknown يقول...

شو يعني لسعتي؟ يعني مخك ضرب ولا مؤاخذه مش هيك؟

سارة نجاتى يقول...

مياسى

هههههههه أيوه ده معناها

ده أنى عندى بوستن كامل ع اللسعان ده

shahrzad... يقول...

ممممممممممممم

انا اللى فهمته انها بتتكلم عن علاقاتنا بربنا

بس جميل الحوار المسلسل ده

Unknown يقول...

يا ختي على سلامتك

وانا كمان لكان لاسعه معاكي:)

على فكره بالنسبه للبوست؛ حلوه فكرة البنت اللي راحت 27 قريه وعملت اللي عليها:) انا شخصيا بشوف الاسلام شيء كبير جدا وواسع بس يعطيهم العافيه اللي ضربوه في مقتل وعملوه عبادات وبس!!!

aMr saYed يقول...

جميلة اوي يا سارة اولا اولا

انا اصلا لما قريت التعليق بتاعي على الكرما مفهمتش برده يبقى كده موقعتيش بيني واسماء
وش مطلع لسانه
ثانيا
موضوع جميل جدا لمستي فيه اكتر من جانب بجد عجبني اوي لانه بيعجبي اسلوب النصيحة الغير مباشرة على هيئة حوار بين اتنين او على هيئة منظر الحاجات الي فيها تفكير يعني

ثالثا علاقتنا بربنا عمرها ما تقف والانسان عمره ما يقف لحد معين ويقول بس يا معلم انا كده تمام مع ربنا لا
فين الزيادة فين الطموح لاعلى واعلى المراتب في العبادات حتى عملكك ممكن تخليه عبادة بطريقتك

رابعا اد ايه ان الواحد ممكن يتنصح من شخص اقل منه عبادة او ثقافة بس يكون نصيحة صح مش مهم بقا ساعتها علامه ايه هو مين اهم حاجة النصيحة الصح انها مترحش بنفسها للموت وسبحان الله الرسول صلى الله عليه وسلم قال فيما معناه " اذا اتاكم الوباء فلا تخرجوا منه ولا تدخلوا عليه" بمعنى انك لو بره مترحلوش ولو جوه متخرجش منه عشان مينتشرش وربنا قال " لا تلقوا بايديكم الى التهلكة"

خامسا كفاية رغي بجد راااااااااائع جدا وعجبني الموضوع ما شاء الله
وربنا يهدي الريدر

غير معرف يقول...

滿...........................

beautiful mind يقول...

ساره

دي اول زياره لي هنا وان شاء الله مش هتكون الاخيره

مدونتك جميله فعلا واسلوبك مميز جدا

بالنسبه للبوست اعتقد انك قولتي فيه كل حاجه
الايمان بالقضاء والقدر واجب
لكن ايضا ( وخذو حذركم )

يعني مينفعش ارمي نفسي في النار واوقول لو ربنا عايزني اموت هموت

تقبلي تحياتي

سارة نجاتى يقول...

شهرزاد

شكرا على رأيك و كررى الزيارة

سارة نجاتى يقول...

مياسى

ما احنا المفروض نحط جنان بتاعنا على بعض هههههههه

طبعا , لا و شوفى قد ايه منظورها للدنيا ضيق كده

منورانى بجد

سارة نجاتى يقول...

عمرو

بالنوسبة لأولا : ملحوقة ههههههه

بالنوسبة للباقى : أنا منتكش الصراحة قاصدة نصيحة , أنا بس اكتشفت بعد تانى لشخصية زى ندى

و تعاملها مع فكرة الموت و علاقتها بربنا ,

بس نورك ده و لا الكهربا ؟؟

سارة نجاتى يقول...

Beautiful mind

أشكرك بجد على رأيك

المشكلة كمان تعاملها مع فكرة الموت زى ما قلت لعمرو


ابقى تعالى كتير

micheal يقول...

تعرفي علي قد ما الحوار شدني واستغربتله بس أنا مقدرش أفتح بقي بكلمة علي واحدة منهم
لأن نفس الاحساس عندي:أنا عملت كل حاجة في الدنيا(أو بمعني أدق أقنعت نفسي بكده عشان منتحرش من زمان) مع اختلاف الوضع الكامل عن أبطال الحوار،وبالتالي فمش خايف لا من خنزرة ولا غيره ولما حصل الزلزال من كام يوم حسيت أني زعلان أوي أوي أنه خلص بسرعة ..زي ما تقولي ما صدقت أنه جه بس طلع عيل
تلاقيكي بتقولي الواد لسع
تحياتي

Zika يقول...

كل واحد شايف نظرته للدين زي ماهو عايز
بس حكاية ندي دي غريبه
يعني هي اخرها تصلي وتنزل البسين وكده عملت اللي نفسها فيه
وبعدين فيه فرق بين التوكل علي الله والتواكل
الحديث بيقول ( اعقلها وتوكل )
فيه ناس فسروااعقلها ( يعني مشيها بالعقل وبعدين توكل علي الله )
وفيه ناس قالت اعقلها يعني اربطها ( والكلام علي الناقه اللي الموقف حصل فيها ان فيه واحد جاب ناقه وسابها قدام المسجد من غير ما يامن عليها جه الرسولعليه الصلاة والسلام قاله اعقلها وتوكل .. مش تسيبها وبعدين تتسرق ولا يجري حاجه يعني تقول مانا توكلت علي ربنا )
احمم
شوفي اللمبه كده ايه اخبارها

غير معرف يقول...

يا سلااااااااااااااااااااام
وديتينا البحر ورجعتينا عشطانين
طب ازازة ببس ولا انشاللة حتا خروب
اية الشح دة

Unknown يقول...

المهم روحتوا الكورس وللا لا؟؟؟؟؟؟؟؟


بصى ربنا اعلم بكل واحد فينا وياعالم الله اعلم مين فينا هيدخل الجنة ومين النار.......

راسبوتين يقول...

فعلا زى ما انتى بتقولى " لا راد لقضاء الله "
ولا يمنع الحذر من وقوع قدر
بس برضه الواحد لازم ياخد باله
يعنى يعمل اللى عليه ..
شكرا

أنا حر يقول...

شفت نفس الحوارات في فيلم اوقات فراغ وهي للعلم حوارات موجوده بشكل مستمر بين الشباب كلهم
غريب جدا ان العلاقة بين الشباب بالذات وكل شيء حواليهم واحد في التصرفات بس مختلف في الاقوال
بمعنى ان كلهم علاقتهم بالدين عادية ومع ذلك بيقولوا وبيتكلموا عنه بالكمال زي موضوع حفظ القران اللي بيطلب بيه واحد مش حافظ غير الفاتحة
تحياتي

سارة نجاتى يقول...

مايكل

هو الواد لسع فعلا
بس ازاى حاسس أنك عملت كل اللى عندك يا مايكى بس؟؟؟

سارة نجاتى يقول...

زكزوكتى

احنا تقريبا كلنا متفقين على ما لخصته أنت فى الحديث "اعقلها و توكل "

و متفقة معاك فى ان نظرة ندى للموت و الدنيا غريبة أوى , تمنيت لحظات يبقى عندى الرضا اللى عندها ده و لو أنه مبالغ فيه

لأ اللمبة ع الفيس شغالة احسن
هههههههه
سلام

سارة نجاتى يقول...

مصرى جدا

هههههههههه
كالعادة احنا فى وادة و انت فى وادى تانى

منور برده

سارة نجاتى يقول...

انجى

هما راحوا , أنا لأ هههههههه

سارة نجاتى يقول...

راسبوتين

متفقة معاك و منور يا فندم

سارة نجاتى يقول...

أنا حر

عجبتنى اوى ملاحظتك , فعلا تعاملهم مع الدين متشابه لكن أقوالهم متضاربة

يتهيأ لى ان كلامهم بيعكس صورة أعمق للموضوع , يعنى ده مش بيكون مجرد رايهم فى حاجة معينة

بس قولى أنهى حته فى أوقات فراغ أصلى لسه شايفة الفيلم كله من كام أسبوع كده

micheal يقول...

نظرية الايحاء يا نجاتي
يعني تفتكري واقعيا أنا عملت أي حاجة كانت في نفسي
؟
:(
تحياتي

سارة نجاتى يقول...

مايكل

أنت بالذات مش ينفع تسأل سؤال ده يا ولدى هههههههه

لا طبعا لسه

و ح تعمله ان شاء الله لما تفهم أصول اللعبة صح

و ح تقول نجاتى قالت

هاني مهران يقول...

بلاش تكتبى عن الامريكان لسة مكتشفين .....

بلاش تجيبى سيرة الانفلوانزا ربنا يحفظنا لسة مكتشفين .....

بلاش تكتبى عشان فى واحد كتب فخدوه الى .......

بلاش تفكرى لسة مكتشفين واحد كان بيفكر ف ........

بلاش