الأحد، 14 يونيو 2009

أنا جيييييييييييييييييييت

أحب أقولكم ....... أنا جيييييييييييييييييييييت . ميرسيه كتيييييييير للناس اللى كانت بتيجى تسأل (لأ تمر فيكوا برده ) و عايزه اشكر بالتحديد ( مايكل اللى عالطول موجب - الدرعمى- مينا بلانك حبيبى اللى سأل كتير - مياسى - انجى - زيكا اللى على طول بيغظنى - أنا حر - بدراوى - سفاح كرموز - ماجى - رامى البرنس - و المفاجأة الكبيرة نيجار اللى كانت واخدة بريك عشر سنين لتعود تجدنى فى بريك أنا كمان ). معلش أصلى كنت مهيسة خالص الفترة اللى فاتت وقلت حرام عليا العيال برده دماغكو تبوظ فى النص , المهم عقبال محضرلكوا بوست تقيل كده من بتوعى ( أنفخ فى نفسى شوية ) قلت أخليكوا النهاردة تلحقوا أخر ما تبقى من تهييسى ..... و اللى كان شغال امبارح بكفاءة برده ... كنت مع شلة صحابى و اذ فجأة شافوا ممثل , هو لسه مبتدىء و عمل كام مسلسل كده و أنا بستتقل دمه , المهم يعنى جم اتنين من صحابى راسهم و ألف سيف ليكلموه و يقلولوا قد ايه هما معجبين بدوره فى مسلسل رمضان اللى فات و انهم بيشوفوا الاعادة بتاعته للمرة التالتة اليومين دول ( بغض النظر عن رأيى فى ان اللى يشوف اعادة مسلسل دون المستوى تلات مرات أنه يبقى عنده نسبة تخلف الا أنى برده مش غاوية أسلم على ممثلين بشكل عام ). - لأ . - لأ ليه ؟؟. - ايه الهبل ده أكلمه ليه انا أصل لا اعرفه اسمه و لا بيعجبنى كده على بعضه . - يا سارة أنا نفسى أكلمه و انتى عارفة انى بتكسف و و انتى البجحة .... قصدى الجريئة اللى فينا . - رنا ( و صباعى فى وشها محذرا ) , أنا مش ح أقف أتكلم معاه , أنا ح اعرفكوا بيه بس ( ده على أساس أن أنا و هو صحاب يعنى ) . قمت من مكانى , استنيت و هو ماشى لا بيه و لا عليه و وقفتله فى كورنر عشان اول ما يحود يلاقينى فى وشه و أخضه ( عنصر المفاجأة مهم أوى هنا ) , و رحت قايله له بقرف و عينى بتبص من فوق لتحت : أنت ممثل ؟؟ (انا بحترم التمثيل جدا جدا بس الشخص ده حاساه داخل التمثيل كوسة ). هو اتسرع فى الاول من الخضة و وقف ساكت مدة طويلة عقبال ما جمع ,كان مؤدب جدا فرد و قال لى و هو حاطط وشه فى الارض : أيوه . قلت له بألاطة : طيب استنى هنا ... ( و بعدين افتكرت ان رنا قالت لى أنفخيه شوية قبل ما تعرفيه علينا ) فقلت له : فى اتنين صحابى ح يموتوا و يكلموك , و رحت مشاورة لصحابى جم و هما مكسوفين جدا و بصين له و هم مسهوكين على روحهم كده و راحوا مسلمين عليه . رحت أنا سيبتهم و وقفت بعيد بعد أن أتممت مهمتى , و هما عمالين يحكوا له على انبهارهم بيه (مع أنهم كانوا ناسيين اسمه فى الأول ) و بعد ما خلصوا بدل ما يشكرونى : ايه الهبل اللى عملتيه ده ؟؟أحرجتيه و احرجتينا . - مكنش قصدى أنا بتكلم عادى جدا . - حد يسرع حد كده ؟؟ ده الولد شعره أبيض من الخضة . - ما أنا توقعت ان عنصر المفاجأة بيفرق يعنى هههههههههه. حاسه أن مش أى حد يطلع فى التليفزيون ينفع نسلم عليه يعنى , عايزه أقولكم أن مذيعات القناة الخامسة كنا بنقعد أنا و صحابى نتريأ عليهم فى وشهم لما جم مرة يصوروا عندنا فى المدرسة حفلة اطفال , و الصراحة فى منهم ناس بيبقوا قلالات الذوق جدا , أعرف واحد راح يكلم خيرى بشارة و يسلم عليه قام مدور وشه و عمله ( هش بايديه ) و كان معاه واحدة قريبته شتمت الولد و قالت له ( مش عايزين النهاردة ) ده على اساس أن جاى يبيع لبن يعنى . فالموضوع ساعات بيبقى محرج للشخص نفسه و ساعات بيبقى تعدى على خصوصية الناس ... ما علينا , خفت بقى أكتب فأجى اقول لحد أنت مدون ؟؟ .

هناك 23 تعليقًا:

بدراوى يقول...

اول تعليق

بدراوى يقول...

بقول ايه
هو اسمه ايه الممثل ده
؟!
عايز اعرف
------
عودون سارة
----
بقول ايه
هو انتى فهمتى مقالات النقاب ازاى
؟!

سارة نجاتى يقول...

هههههههه
مفهمتش حاجة خالص
أنا لقيتك كاتب التنويه و بس

لأ مش ح أقلك اسمه , غلاسة بقى

مياسي يقول...

ساره

مش تهيييييس الصراحه لساكي في المووود

عجبتني بجحه - قصدي جريئه - وبدي اتحشر واسأل كمان مره:

مين الاخ الممثل اللي حاطط راسه في الارض؟

عودا حميدا يا ست ساره :)

Zika يقول...

يوووووه ما كنا مرتاحين
:D

magi يقول...

حمدلله على السلامه يا قمر لسه برده البلوج بتاعك مش بتقرى عندى انا كنت جايه اراجع على المنهج وحلوه حكايه الممثل دى بس براحه على الناس يا سوسو يعنى لو الراجل كان جراله حاجه كنتى هتعملى ايه
ومعلش هو بيحط راسه فى الارض اكمنه جديد بقى وبينكثف كلها كام شهر

enjy يقول...

باشااااااااااااااااا

حمد الله عالسلامة يا حلوة والله وحشانى مواضيعك بجد يا بنتى كدة تسيبى جمعية المرأة المتوحشة اللى انا وانتى اعضاء فيها كل المدة دى؟؟؟

حلو عنصر المفاجأة دة لا ملعوبة ملعوبة يعنى

تصدقى خيرى بشارة دة جزمة بجد

الدرعمي يقول...

يا مراحب يا مراحب .. و الله البلوجر نور و طالبة معايا أفرش الأرض ورد بس مش عاوزين نعطل حركة السير في بلوجر .. حلو الرجوع و حلو موقفك بس لو أنا ماكنتش هسلم عليه لأن فعلا مش أي حد بيطلع ف التلفزيون نجري زي الهبل عليه .. بس فيه ناس معينة لازم نقدرهم يعني أنا لو شفت الفخراني أكيد هتشعلق في رقبته مش أسلم .. وفي الختام مورسييي عالشكر و البوست الخفيف عالقلب ده @ تحياتي @

أنا حر يقول...

راجعه بمفرقعاتك واول قنبلة كنت هتفرقيها في وش الشاب اللي يعيني من كلامك شكله ملحقش يمثل غير مسلسل واحد
على فكرة انا زيك كده مش كل واحد بيطلع في التليفزيون يستحق اننا نحترمه ونجري علشان نسلم عليه
حمدالله على سلامتك ياجميل ونورتي المدونة من تاني
تحياتي

سارة نجاتى يقول...

زيكا
امشى ياض

سارة نجاتى يقول...

مياسى
هههههههه , ما انت عارفة القافية لما تحكم
ربنا يخليكى يا حبيبتى

سارة نجاتى يقول...

ماجى
عندك حق بعد ما بيتعرفوا و لا بيعبرونا

منورانى

سارة نجاتى يقول...

انجى

ده أنا مردتش أقول على كله اللى عمله بشارة , ده نيلة خالص

و متقلقيش أنا لسه عضوة معاكو فى الجمعية هههههههه
منورانى خالص

سارة نجاتى يقول...

الدرعمى

هو فعلا حسب البنى ادم برده
ميرسى على يا ابنى , دهمدونتى اللى لماكو ههههههههه ( بهرز و الله )

سارة نجاتى يقول...

أنا حر

شكرا يا باشا و أنتى ابقى تعالى هنا كتير بقى , مش لازم اجى أجيبكوا

منورنى

micheal يقول...

ههههههههههههه..موجب وزيادة..طبعا هو أنا عندي كام نجاتي
:)
والله يا بنتي أنا عن نفسي لو شفت حد مشهور مش حجري عليه وأتلزق وأقعد أعمل التماحيك وحركات السهوكة دي بس طبعا لو اتقابلت معاه بشكل رسمي حديله بريستيجه في حدود المعقول عشان أضمن برضه أنه ميتنططش عليا
تحياتي وعود أحمد يا نجاتي
:)

Zika يقول...

امشي اروح فين . انا مش هتحرك من هنا
:D
انت ممثل :D
استني هنا
ههههههههه
ناقص تقوليله طلع بطاقتك

سارة نجاتى يقول...

مايكى
طبعا طبعا يا بابا , هى نجاتى واحدة , مع انك كنت ح ترمينى امبارح أنا و العيال فى الشارع هههههههه

هو فعلا لما مقابلة فى اطار رسمى كان الوضع ح يختلف , يعنى أنا مثلا من ساعة ما شفت ابراهيم الأبيض و أنا نفسى أقابل محمود عبد العزيز أو عمرو واكد و أقولهم أنهم أحسن حاجتين فى الفيلم و ادائهم كان خرافة
لكن مش ح نمشى بقى نلملم أى حد و خلاص

منورنى يا باشا

سارة نجاتى يقول...

زيكا

هههههههه , أه و الله ده اللى كان ناقص فعلا , و الولد خاف بجد يظهر افتكر أنه ح يتقبض عليه و لا حاجة

راسبوتين يقول...

كل اللى بتقوليه صح بس ما ينفعش مع كل الشخصيات . لازم الواحد يكون عنده بوصلة تحددله الطريقة اللى حيتعامل بيها مع كل شخص .لان صوابع إيدك مش زى بعضها وصدق المثل الصينى اللى بيقول : لا تبع عسلك إلا لمن يجيد التذوق . وشكرا
أرجو قبول مرورى

aMr tA3LaB يقول...

ههههههههههههه بجد جامد اوي فكرتيني مرة دخلت لوكشين كده ومكنش قصدي لانه كان في الجامعة عندنا انا رحت على صوةيت الراجل المخرج المجنون ده وهو عمال يقول حرررررررررركااااااااااااا
المهم وقفت شوية لاقيت واحد داخل عليا ان اواتني اصحابي قالولي امشي من هنا واان ميت على نفسي من الضحك انا وصاحبي واحد وقف يتفرجح وواحد جه معايا المهم قالوا محدش يكلم الممثل وهو ماشي قعدت رغيت معاه وقولتله اسمك ايه وانت بتعمل دور ايه وربنا يوفقك بس كان في كلمة في قرارة نفسي كنت عايز اقوله ده انت هتتظبط( اصل الممثل اسر ياسين وبيعمل دور طه في عمارة يعقوبيان ) صباح المسخرة

سارة نجاتى يقول...

عمرو

ايه ده ؟؟ لا احكيلى امتى عمل أسر ياسين دور طه فى العمارة ؟؟ يكونش فى المسلسل أصلى مشفتهوش

مسخرة و الله هههههههه

ann يقول...

滿...........................