الثلاثاء، 17 مارس 2009

قطار أبو قير

قطار أبو قير (زحام – مخدرات- تحرش جنسى ) . قطار أبو قير أحد وسائل النقل الهامة بالاسكندرية لامتداده من منطقة محطة مصر حتى منطقة أبو قير , و لا يعتمد عليه الاسكندرية فقط , بل سطان الضواحى و الطلبة من المحافكظات و القرى المجاورة , و بارتفاع تذكرة القطار من 50 قرش الى 75 قرش و 100 قرش – أى الضعف – تدفقت الشكاوى على المجلس المحلى , و الذى على الرغم من عقده جلسة لمناقشة مشكلة ارتفاع التذكرة , الا أنها ليست الوحيدة , فالقطار غير منضبط فى مواعيده , و فى حالة ازدحام و تكدس مستمر مما ينتج عنه سرقات متكررة , هذا بجانب غياب عنصر الأمان فى القطارات و التى لا أبواب لها تحمى الركاب من السقوط فى حالات الازدحام و التدافع . تأخير و عدم انضباط. تقول سحر (20 ) سنة عن تأخر القطار عن موعده : تأخر مواعيد القطار أصبح شىء اعتيادى بالنسبة لى , فالعادى أن أنتظره بالنصف ساعة , و يصل أحيانا للساعتين , و هو ما يسبب لى المشكلات كثيرة كطالبة , فلقد فاتنى مرة الامتحان بسبب تأخر القطار عن الميعاد الذى يفترض أن يمر فيه , ثم بما أنهم رفعوا سعر التذكرة لما لا ينضبطوا فى تنظيم مواعيد القطارات؟؟ . الزحام و العربات المختلطة . عن تكدس العربات و عدم الفصل بين بين الرجال و السيدات , تقول جيهان ( 21 ) سنة : أسوأ شىء فى قطار أبوقير عدم الفصل بين عربات الرجال و النساء , و هذا ما يعرضنى لمواقف مهينة جدا لى كفتاة مع أننى أرتدى الخمار , و لا أعلم ما يضيرهم ان خصصوا عربتين للنساء و أخرتين للرجال ؟! ارتفاع أسعار التذاكر. يشكو الأستاذ أحمد (55 ) سنة من ارتفاع سعر التذكرة قائلا: بالنسبة للارتفاع فى سعر التذكرة , فالحكومة لها ارادة فى هذا , لا نعلمها و لكنها ارادة الحكومة , و الغلاء وصل لكل شىء , و كنت أقول أن المواصلات هى الوحيدة التى لم يرتفع ثمنها , وأضاف قائلا : و نبى لو ح تنشروا الموضوع ده قولوهم حاجة واحدة بس : العيشة صعبة أوى . و يتفق معه الأستاذ "حسنى " و زوجته مدام " تيسير " فيقولان : رفع سعر تذكرة القطار سببه علمهم بأنه من وسائل المواصلات التى لا يمكن الاستغناء عنها , خاصة لسكان الضواحى , ثم هل عادة ما ترتفع الأسعار بالضعف ؟ , و لا نمانع ارتفاع سعرها أن كان سيقابل هذا تحسين للخدمة , و لكن ظل الوضع كما هو عليه . النشل و السرقة . يؤكد راكب أخر , عم (أحمد عوض الله 60 سنة ) على تكرر حالات النشل , فيقول : أنا سرقت اكثر من ثلاث مرات, و المشكلة ليست فى حالات فى النشل أو البلطجة فقط , و لكن المحصل غير متعاون بالمرة , و لا يمنع الناس من التدافع فى حالات الزحام الشديدة خاصة فى وقت الذروة , و لو كان هناك عسكرى واحد على كل محطة لخاف هؤلاء النشالين , لكن لا يوجد أفراد أمن سوى على المحطات الرئيسية , لكن على محطات مثل الظاهرية أو غبريال , أو الرمل الميرى , لو قتل القتيل لا يجد من يغيثه . مخدرات و شذوذ . بتوجهنا الى محطة قطار الظاهرية لاحظنا غياب تام لأفراد الأمن , لا يوجد فرد أمن واحد بها كما يفترض أن يكون على محطات القطارات , و لذلك فان أكثر ما تشتهر به هذه المحطة هو انتشار أعمال البلطجة بها , فالباعة المجاورون للمحطة حكوا لنا عن أسرة مكونة من خمسة أشقاء تستولى على المحطة , و يستخدمون الحجرة التى يتم من خلالها قطع التذاكر فى بيع المخدرات , كما أن الحمام الخاص بالمحطة تم الاستيلاء عليه , و منعوا المحصل و العاملين بشباك التذاكر من استخدامه , و حولوه الى وكر لهم يتم تعاطى فيه حقن المكس , و المنتشرة على أرضية الحمام , و قال لنا أحد الباعة و الذى رفض أن ذكر اسمه أنه رأى بنفسه عملية تبادل لكيس مخدرات مقابل نقود على رصيف محطة مساء , حيث قام أحدهم بدس الكيس فى جلباب الأخر و انصرف , و أن هؤلاء الأشقاء يبيعون المخدرات للمتسولين على أرصفة المحطة الأمر الذى أدى الى حدوث الواقعة التالية : شاب فى حوالى الثلاثين من عمره , له مكان معين معتاد أن يأوى اليه ليلا فى المحطة , و ادمانه دفعه للتسول , و فى احدى اليالى , جاءه رجل ملتحى متقدم فى السن , و حاول أن يقيم علاقة مع الفتى المتسول , و الذى صرخ و استنجد بالناس , و رفض بشدة الاستجابة له , و لكن الرجل الملتحى عاود التردد على الشاب فى اليلة التالية و عرض عليه مبلغ من المال , فاستسلم له الشاب , و لقد شاهدهما الجيران فى العمارة المقابلة للمحطة و أبلغوا الشرطة , و اذا بمخبر يأتى بعد فترة طويلة , أبرح الفتى ضربا , و رفض الاعتداء على الملتحى خوفا منه , و قال للناس " أنا عارف ده يبقى مين ؟؟" و أضاف بائع أخر : من المستحيل ابلاغ الشرطة , فهؤلاء الأشقاء تم القبض عليهم العديد من المرات , و لكن ما أن يصلوا لقسم الشرطة حتى يعودون مرة أخرى حتى أن المخبرين أنفسهم يقسمون لنا أنهم سلموهم بأنفسهم للضباط المختصين , و المخبرون لا يتعاونون معنا بالمرة , انهم يحاولون باستمرار فرض اتاوات علينا مقابل ادعاء حمايتنا , و لكننا نعلم أنهم أنفسهم يخشون بلطجية المحطة . و لقد أعطانا نفس البائع ورقة نقدية قيمتها 25 قرش , ملتصق بها " حشيش " و لقد أسود لونه لاستخدامهم النار فى تسخينه , و قال البائع : لقد أخذته للتو من أحد الشباب المتعاطين فى حجرة التذاكر . تقول احدى بائعات الخضراوات كشاهد عيان : حتى الضباط اذا قاموا بحملة مفاجئة على المحطة , أراهم لا يجرؤون أن يفتشوا عن المخدرات بحجرة التذاكر , أو فى الحمام , و لكن كل ما يفعلوه هو القبض على طلبة المدارس لعدم حيازتهم للبطاقة الشخصية . و عندها تدخل أحد الركاب المعتادين ركوب القطار من نفس المحطة : أحيانا يرسلون شباب من صغار الباعة داخل عربات القطار حاملين كرتونة بها حلوى , و يتظاهرون ببيعها للركاب , و لكن قاع الصندوق يكون ممتلأ بجرع المخدرات و هم يستطيعون التعرف على زبونهم , و يبيعون له دون أن يشعر الباقون . و يستطرد : مع أول اليل , يكون البيع " على عينك يا تاجر " على مرأى و مسمع الجميع , و هؤلاء التجار يخزنون المخدرات فى مناور العمارات المجاورة , ليتم توزيعها على المحطات و فى القطارات مساء , و يضيف : على فكرة , احنا كده أرحم محطة , ده أنتوا ماشفتوش اللى بيحصل فى الغبريال أو الرمل الميرى. على الجانب الأخر و حول ارتفاع أسعار التذاكر و انحدار مستوى القطارات و الزحام , يقول المهندس سامى أحمد العجمى , رئيس الادارة المركزية لمنطقة غرب الدلتا , فى اجتماع المجلس الأعلى المحلى و هو المسئول الأول عن هيئة السكة الحديد بالاسكندرية , أن قرار الزيادة التى تمت هو قرار سيادى من ادارة الهيئة بالقاهرة , و أن هذا القرار لم يسر فقط على خط أبوقير وحده , بل هو قرار على جميع خطوط الضواحى على مستوى الجمهورية , كما برر الزيادة فى ثمن التذكرة بأن هدفها تحسين خدمة النقل و خطوط السطة الحديد , و لقد تعهدت لجنة النقل و المواصلات بالمجلس المحلى على التوصية لدى السيد اللواء المحافظ و لدى هيئة السكة الحديد و شرطة النقل , بتكثيف المرور على الخط لمنع السرقة و البلطجة , و القيام بصيانة كاملة لمحطات السوق .

هناك 33 تعليقًا:

سارة نجاتى يقول...

ده المفروض تحقيق عملناه من فترة , الجريدة اللى تدربت معاه لمدة شهر خافت تنشره , و الصراحة بعد كده لم أحاول محاولة جادة أوى لنشره , بس يلا مش خسارة فيكوا ههههههه
و بعتذر على لخبطة ال
format

و ياريت حد يقولك أظبط فورمات الصفحة عندى ازاى

بدل ما احنا مش مستنفعين منكوا بحاجة كده ههههه

micheal يقول...

بجد تسلم إيديك أنك فضحتيهم
مش عارف امتي سيناريو الاهمال والتسيب ده يفضل موجود
لازم تحصل كوارث كالعادة عشان يفوقوا
بس جزئة التحرش بالبنت اللي لابسة خمار دي يتحط تحتيها مليون خط يا عم نجاتي عشان خاطر اللي بيتكلموا عن ارتباط التحرحش باللبس
تحياتي

سارة نجاتى يقول...

مايكى


القطر و كل وسائل المواصلات العامة رايحة فى داهية ان شاء الله و
اللى بيربطوا التحرش باللبس دول متحرشين بس بيداروا ده

تحياتى و منور يا جميل

غير معرف يقول...

واقع مصر كلها مش قطر ابو قير بس
الطريق للترقي في الداخلية الامن السياسي
ويغور المواطن والبلد
دة لب الفكر الجديد

سارة نجاتى يقول...

مصرى جدا

عايزه أقولك لما تقرأ غير لما تشوف بعينك كمان
احساس أنك شفت موضوع و مش قادر تعمل فى حاجة ده فظيع

aMr saYed يقول...

تسلم ايديكي يا سارة بجد تحقيق هايل جدا وانا فعلا بقراه حسيت فعلا انه لجريدة بس حصل خير عشان نقراه واول ما اروح اسكندرية ان شاء الله مش هركب ام القطر يالهوي كل ده بيحصل فيه

اعزائي القراء واصدقائنا بعد نشر التحقيق الصحفي من مجلة " النهاردة في ايه " تقدم لنا المسئول بن طرطور لينفي ما قامت به الزميلة الصحفية تجاه قطار ابو قير وبدورنا ننشر رد بن طرطور على هذا المقال
السيد المسئول بن طرطور ايه راي حضرتك في الي كاتباه الزميلة سارة نجاتي
بن طرطور: بجد موضوع هايل و هي صحفية واعدة بس الحقيقة انها جانبت الصواب في حاجات كتير
الصحفي : حضرتك ممكن توضح
بن طرطور : يعني موضوع المخدرات طبعا هي متاثرة جدا بالفنان احمد حلمي لذلك استخدمت شباك التذاكر في بيع المخدرات
الصحفي: وحضرتك ايه الي دخل احمد حلمي في التحقيق الي نشرته
بن طرطور: ازاي ده هو صميم الموضوع انت مشفتش صايع بحر ههه طبعا مفيش كلام من ده مصر لسه بخير واطمننهم ان رجالة الامن قايمين بواجبهم على اعلى مستوى وشايفين شغلهم الله ينور مش معقولي يعني نحط على كل محطة عسكري هنكفي منين هو احنا هنفتش المشجعين بتوع الكورة ولا نوقفهم على المحطات
الصحفي : طب وحادثة التحرش و الشذوذ المذكور في الموضوع
بن طرطور : طبعا مبيتة النية لانها درست بالخارج و عايزة تقول للناس ان عندنا حاجات زي ديه في مصر زي الي شافتها بره مش معقولي يعني تسوء سمعة مصر
ملحوظة*( سارة مخرجتش من بيتهم من يوم ما اتولدت )

الصحفي : سيادة المسئول طب والزحمة وتاخر القطار عن مواعيده
بن طرطور : حضرتك يعني يرضيك نمنع الناس من ركوب القطار وده قطر مهم وبالنسبة لحكاية التاخير القطار محدد ليه سرعة معينة و عدد معين العدد لما بيزيد السرعة بتقل عشان كده بيتاخر

الواضح اعزائي القراء بعد الحديث مع المسئول بن طرطور تبين ان السبب في كل مشاكل القطار هي سارة نجاتي

طبعا ده كان تخيل لو نزل التحقيق و حد من الطراطير رد على التحقيق

وتسلم ايديكي

دتحياتي

احساس لسه حى يقول...

عزيزتى

بنت الجيهه

اوعى تكونى لسه مش فاهمها

شوفى قطار ابوقير ده لو يظبط هيحل ازمه كبيرة فى المواصلات

علشان هو سريع وطريقه مفهوش مزلقنات كتير وعربيات

بس المشاكل اللى قولتى عليها كلها موجوده فيه

ومش عارف هما ليه مفيش رقابة على

القطارات واداميتها

مواعيد القطارات اللى بين القطار والتانى 5 دقايق وممكن تلاقيها ساعة

يعنى مفيش نظام

ليه مش عارفين يظبطوا ابوابها

النشل متفكرنيش بذكريات اليمه

التحرش بقه

يا تحرش مقصود يا تحرش غير مقصود بسبب الزحمة وممكن تقلب لخناقه

اقولك

البلد بقيت زحمه اوى

ولازم تتعمل مدينه زى اكتوبر فى اسكندرية والناس تروح فيها

بس مدينه للناس كلها

مش للبهوات والبشوات

تحياتى

سلام

أحساس لسه حى...كلام من جوه روح لكل روح يقول...

عزيزتى

مش قولنا نركز فى الكلام لما نعلق

يا سارة اللى علق عند اسر ست مش راجل

وكمان هلاى فقالت انها ضد التحرش ووضحت

ما احنا علشان نعلق صح

لازم نفهم اللى بيتكلم بيقصد ايه

حتى لو مختلفين معاه


خدى بالك انتى الوحيد اللى روحت اقولها الكلام ده

لانى بحس انك بتقرى كويس

وبتعلقى كويس

وعاوزك تحفظى على موضوعيتك دايمن

ولا هتزعلى

سلام

Zika يقول...

ياااااااااااااه
كل الحاجات دي
ده ناقص يبقي فيه وأد بنات
بجد تحقيق جااااااااااااااااااااااامد جدا
خساره في الجرنال اللي كنتي هتشتغلي فيه يا بنتي
والله خساره
حلو استمري

سارة نجاتى يقول...

عمرو تعلب

لا تركب ايه ؟؟ خدها كعابى أحسن لك

هههههههههه لكن مسخرة اوى تحقيق بتاعك أنت ههههههههه
و الله ما خرجت من بيتنا فعلا , يتهيأ لى أن دى كانت ح تبقى ردود المسؤولين فعلا باستثناء أنى كنت ح الاقى استدعاء فى امل الدولة
بس أنت عسل و الله
و صدقنى أنا مش عارفة ايه موضوع المدونة ده , بس عاوزة أخنفوا كلكوا , محدش قال لى اعمل ايه فى حوار الفورمات ده ؟؟

سلام يا باشا

سارة نجاتى يقول...

احساس لسه حى

لا فهمت يا باشا يعنى ايه " جيهة"
بس دى كلمة متقلتش من سنة تلاتين

و بعدين أنت عاوز تفهمنى انك اسكندرانى ؟؟ ممكن تكون من ما يجاورها من مناطق لكن أسكندرانى نووو
أنا أعرف الاسكندرانى اللى زيى من على بعد مليون متر مربع ههههههه

و الله نفسى يشوف له حل فعلا

تحياتى خاااااااالص

سارة نجاتى يقول...

احساس لسه حى كلاكيت تانى مرة

بص يا حسام , أنا معنديش طول بال زيكا
يعنى ح تجرى ورايا ع المدونات و تجى تقولى ازاى تقولى و ازاى تعيدى ح أعملك فيلم هندى
ايه " قولنا نركز فى التعيقات ده ؟"
و أنا المفروض بقى اقولك حاضر يا بابا مثلا

أنا أعلق و أقول اللى على مزاجى
و مش معنى انى مردتش أعلق على جزئية معينة فى موضوع خاص بيك قبل كده , أنى مجبرة على نمط معين فى تعليقاتى , أنا حرة


و كلامى يتوزن بالجرام
و مش معنى أنى مش مدخلتش فى مهاترات عن تعليقاتى اللى أنت انتقدتها قبل كده أنى كنت موافقةعلى انتقادك ليها أو موافقة على رأيك أساسا
لكن أنا لو أخدت على كل كلمة بتقولها مش ح أخلص
أما بخصوص التعليق عند أسر :

فملا تعلمه انت أن دار حديث مع أسر فى موضوع شبهه بالضبط و تقريبا نفس الكلام مع اختلافات بسيطة بس كان باعته لها رجل
و كلام ده كان من يومين فافتكرته نفس الموضوع

و بعدين لو ست اللى كتباه , ده ايه الفرق يعنى ؟؟
ح يفضل كلامى زى هو و ردودى زى ما هيه
باستثناء ,أنى ح أشيل كلمة "متحرش" و أقول أنها "بنت منفسنة ", لأن اللى بيكتب بالكراهية دى كلها حتى لو مختلف مع حد يبقى منفسن منه


و بعدين هى معنا انها قالت انها ضد التحرش يغفر لها العك اللى قالته

قلتلك قبل كده" خطاب الواحد يدل على ارائه "
مش الشعارات , و دى واضح من كلامها جدا أنها شايفة أن اسر تستاهل اللى حصلها
الا اذا كنت انت كمان شايف أنها تستاهل و ساعتها يبقى الكلام تانى خالص معاك عن كل اللى عماله أكتبه ده .

ما هو مش معقولة مثلا أسب و ألعن فيك و بعدين اقولك " أنا بالمناسبة مؤدبة جدا و محترمش الناس اللى بتقول ألفاظ وحشة " ده على سبيل المثال يعنى.

كلامى زى ما هو يا حسام بس شيل التاء المربوطة يا سيدى .

سؤال فنى : ايه أهمية ده فى متن اللى قلته , ما أسر ح تصلح فى التعليق عندها
يتهيا لى أن كلامى كان فى نقاط كتير عامة لا تخص الموقف ده بالذات .

و لا طبعا يا حسام باشا مش ح أزعل مقدرش أزعل منك , أنت مشفتنيش و أنا زعلانة و منصحش حد يشوفنى فى حالة الزعل بجد يعنى
هههههههههه


تحياتى

سارة نجاتى يقول...

زكزوكة

هههههههه على رأيك ناقص يبقى فيه وأد بنات فعلا هههه

و من ناحية خسارة فيهم , فهو كده فعلا و الله
طبعا أنت عارف أن العروض نازلة عليا من الواشنطن بوست و الجارديان طالبين الموضوع بس أنا قلت أخواتى المدونين اولى بيها ههههههههه

احساس لسه حى يقول...

عزيزتى

ولا انا عندى طولت بال بس اهو الواحد بيحاول على اد ما يقدر يقول شئ

وكل اللى عاوز اقوله

اننا نركز فى التعليقات ونقرى الكلام كويس وانا بفكر اعمل موضوع عندى عن التعليقات اللى عند اسر

عارفه المشكلة مش فى اسر

المشكلة فى اللى بيخش ينافق اسر

وكل الرجاله اللى قالت كلام جميل وهجمت الشخصية اللى علقت

ميقبلوش ان اختهم تلبس كده وافعالهم مع اللى بيخسهم غير كلام التدويبن

على العموم

تفرق انه يكون شهص متحرش ان بنت منفسنه لو ظنك صح

لانك متعرفيش ضميرها اكيد

على العموم لو نزلت بوست هتكلم على التعليقات كلها

لانى بكره النفاق فى التعليقات

بالذات لو النفاق ده هجوم على حد معملش جريمة

ده الدين النصيحة

وانا اسكندرانى ومن قلبها كمان

واحساسك طلع غلط


خلى ردك لو ناويه على الموضوع لما انزله

تحياتى

سلام

سارة نجاتى يقول...

احساس لسه حى

طب ما أنت ممكن تعرف أن جارك مرتشى مثلا بس لو اتسرق , حتزعل عشانه و تضايق له و مش معنى ده أنك مرتشى أو بتوافق ع الرشوة .

بلاش تزايد على حد يا حسام
مش معنى أن واحدة أو واحد أنت مختلف مع نمط حياتهم أو سلوكهم انك ترضى لهم أذى

أـما بخصوص التعليقات المنافقة , فدى مش مشكلتى و روح صلح مشكلة نفاق أسر مع نفسك

بس بالمناسبة احنا شعبنا أدمن النفاق بدون داعى و بداعى , اأحنا بنافق نفسنا ألاف السنين حتى لو مش ح ناخد من ورا نفاقنا حاجة فمجتش على اللى حصل مع اسر , مش جديدة يعنى.

لكن فهمك للنفاق مغلوط لو قصدك أن الناس ممكن ترفض طريقة لبسها بشكل شخصى زى مثال جارك المرتشى ( و طبعا التشبيه ده بعيد تماما عن أسر)

أما بخصوص انى مدخلتش جوا نية البنت

يعنى انت اللى دخلت جوا نيتها لما قالت انها شايفه أن التحرش جريمة ؟؟

احنا هنا مش فى قاعدة مصاطب عشان نسيب كل واحد لنيته , من خلال اللى بتكتبه و بتعلق على ايه و الرطيقة اللى بتعلق بيها خاصة لما بيبقى التعليق من مجهول بيغير احترامى له تماما
و على بلاطة كده:

مشايح السعودية وصمة فى جبين الفقه الاسلامى
و لا يخيروا عن المشايخ المصريين


اللى عمل فى أسر كده مجرم يستحق الحبس و هى مش مذنبة و لا بدرجة واحد فى المية طالما مجتش و قالت لى تحرش بيا و حتى لو قالت له المفروض هو عقله فين ؟؟

نظرة مجتمعنا فى قدر من الظلم و التحيز لأن التحرش هى الجريمة الوحيدة اللى بيكون المجنى عليه هو الجانى .

و المفروض أن قضية أسر و غيرها متكونش مسار مناقشة أساسا لأننا فى النهاية بنتكلم عن جريمة و الضابط شاف بنفسه اللى كان بيحصلها

و بعدين مين قالك أن كل الناس اللى ساندوها بينافقوها , أنت كمان دخلت فى نيتهم ؟؟

و بعدين الدين نصيحة لما يوجد ما يستحق النصح عليه , أتفهم لو قلت لى أن فى بعض من ساندوها كتبوا عنها فى أماكن تانية كمهاجمين ليها فبالتالى ده نفاق . لكن أى حاجة تانية لأ

و بعدين ايه موضوع اسكندرانى ده ؟؟ههههههههه
طب يعنى مهاجرين اسكندرية من امتى ؟؟
أصل " جيهة " مش فى القاموس السكندرى

ده كد يدى على دلتا أو بعض المناطق بالقاهرة . هههههههه

سلام

احساس لسه حى يقول...

عزيزتى

انا معاكى لو جارى مرتشى واتسرق ممكن ازعل علشانه بس مش هضايق اوى وهقول ربنا بيدبله درس

وطبعا انا ضد اذيت اى حد مهما كان سلوكه بس مفيش مانع اننا ننصحه لو سلوكه كان فى شئ غلط وده بعيد عن اسر

والتعليقات المنافقه دى مشكلتى وبتضايقنى وبتكون غير منطقيه
علشان كده بجب تعرضها واناقشها

وانتى قولتى بقينا بنافق بدون اسباب ولا فايده

يعنى التدوين مش صحبه ولمه ووجودها علشان نقول ترتئنا بصراحه

بس تلاقى كلام المدون بيتغير حسب هو عند مين والموضوع ايه وهعمل البوست علشان كده انتى كبرتيها فى دماغى

شوفتى بقه انتى اللى بتردى على نفسك ازاى لان انا وانتى مدخلناش فى نية البنت اللى علقت فلما تقول فى اخر كلامها وتوضح للناس انها مش معنى كده بتايد التحرش وبتعارضه ومش بتديله مبررات يبقا خلاص نتعامل مع الكلام اللى قالته وبس ونسيب النية

انتى اتعملتى مع جملتها دى ولا قولتى انها منفسنه وده شئ فى علم الغيب

تعاملى مع كلامى بس واى حد كلامه بس بنتعامل معاه مش اللى جواه

والمشايخ مهما كانوا فهم علماء بيجتهدوا وصعب اكون انا مش حافظ القرأن وبقرائتى عن الدين محدوده اقول على المشايخ مصيبه علشان كام فتى او شئ قالوه مش للدرحه دى

واكيد اللى تحرش باسر مجرم وزباله وقليل الادب بس اكيد اى حد بيعمل جريمة بنحاول نحلل الاسباب

ده طبيعى فى كل الجرايم فى العالم

فانا لما اقول اسباب تحرش فرد كذا مع معنا انى ببر تحرشه احنا بناقش الاسباب

وانا مش بناقش موضوع التحرش باسر

انا بناقش التعليقات على البنت اللى علقت عندها

وموضوع ان بينفقوها ده واضح لان محدش ناقش الكلام وحلله كله بيهاجمها ومنهم اللى قال متحرش وبنى كلامه على كده

احمممممممممممم

واوعى تقولى متفرقش لانها تفرق كتير اوى

وانا مش متابع اسر وكتير من اللى علقوا عندها

انا بناقش كلاام عرضته اسر وتعليقات الناس عليه والموضوع هيوضح اكتر كلامى ان شاء الله

وموضوع ان اسكندرانى مش مشكله لاننا بناقش راى بقوله ومتفرقش انى اسكندرانى او تيوانى

والجيه دى جيه من ابن الجيه اولى بيها

مش عارف اصلها ايه بصراحه

وجعت دماغك مترديش بقه وخلى تعليقك لما انزل الموضوع علشان هوضح راى بشكل اكبر

تحياتى

سلام

غير معرف يقول...

سارة بحاول أضيف مدونتك عندي مش عاوزة تشتغل كتبتها بتقول غلط عملت نسخ ولصق برضة غلط مش عارف اعمل اية
اسمعي ادخلي انتي ضيفيها

حامد برهام يقول...

السلامو عليكو
ازيك يا ستو سارة وازي أحوالك اوعي تكوني نسيتيني طبعا انتي عارفه(لو ماكنتيش نسيتيني)
اني كنت في البيات الشتوي اليومين اللي فاتو دول اوم ايه الجو اتحسن اوم ايه قلت اشوف ايه اللي بيحصل اوم ايه الاقيكي بقيتي صحفية كبيرة بيخافوا ينشرولها عشان المشاكل .... كلام في سرك وانا بقرأ اتخضيت قلت ايه الجو ده هي سارة بطلت ساخر وللا ايه.... بس دخلت جوة التعليقات فهمت الفولة

ملحوظه: وانا ماشي خدت الفولة معايا لو عايزاها هاتلاقيها في مدونة من الاتنين بتوعي جنب النيولوك الجديد
سلاموز

سارة نجاتى يقول...

احساس لسه حى

لا مش ح أرد عليك فعلا عشان القولون و انا وراثيا معرضة له

سارة نجاتى يقول...

مصرى جدا

أنا لا عارفة اعمل ايه لمدونتى اللى مش بتتضاف , ولا للفورمات , و لا عارفة ازاى أضيف مدونتى عندك
هى مدونة منحوسة على أى حال يعنى

سارة نجاتى يقول...

حااااااااااامد برهاااااااام

لا لا لا مش مصدقة نفسى بيات شتوى ايه ؟؟ ده أنت خدت كل فصول السنة فى سكتك ,ازيك يا باشا ؟؟
لا ونبى عايزين الفولة و لا أقولك انا ح أجى أخدها منك
و صحفية كبيرة ايه بس ؟؟ ده هو موضوع و من ساعتها نايمة عليه ههههه
أبقى أقرأ شوية حاجات من البوستات القديمة ح تلاقى فيها المسخرة كلها هههه

تحياتى يا باشا و عايزاك تنطلق بقى

احساس لسه حى يقول...

عزيزتى

انتى كمان القولون عصبى

الف سلامه عليكى

طيب بلاش تخشى عندى بقه قبل النوم علشان نزلت البوست

اللى ممكن يتعب قولونك

خليها لما تكونى رايقه

سلام

Empress appy يقول...

عارفه يا ساره ده حال قطارات كتير جدا جدا فى مصر فى كل الخطوط مش عارفه امتى هينتبهوا للقرف ده بجد

سارة نجاتى يقول...

ابى
ح ينتبهوا مين يا رحاب ؟؟ و نقطع أرزاق تجارالمخدرات و الموزعين و نقل مزاج العيال اللى بتكيف نفسها ؟؟

و الله على رأيك حاجة تقرف

Zika يقول...

سااااااره
ساره انا حاسس انك ممكن تكتبي اكتر من كده
ياريت كل ما حاجه تيجي في دماغك ارزعيها هنا
مش معقوله كده كل الناس اللي بحب اقرالهم عاملين زيي بينزلوا بوست كل فين وفين
اما احنا عالم غريبه صحيح

Che_wildwing يقول...

دي نواتج للى بيقولوا عليه الدولة الرخوة
او زي مابيقول تيمون لبومبا
هنا مكان الحرية لا قانون ولا مسئولية

hasona يقول...

السلام عليكم

موضوع جميل

فعلا هناك الكثير من البؤر التي يجب أن تكشف
وهناك مشاكل وسلبيات كثير- هكذا حالنا في مصر

والمشكلة أن لا أحد يهتم من المسئولين أو الحكومة

،،،،
معظم المواصلات ( قطار أو اتوبيسات عامة - ميكروباص ) كلها بها مشاكل ونفتقد الامان بها

أما مشكلة التحرش أصبحت سمة غالبة علي الكثير والاسباب كثيرة

لا ترتبط بالملبس فقط
لها أسباب كثيرة يتوجب حلها او معالجة من يلجأ الي التحرش أو معاقبته
،،،
البلد أصبحت تسوء أكثر فأكثر
والله أعلم متي سنفوق وعلي ماذا
،،،
فيه مشاكل وأزمات كثيرة
وانتشار المثلية والفقر وكل مجموعة من الشباب تخترع فكر ومنهج معين
وتتبعه وتدعوا له

لنا الله


تحياتي

سارة نجاتى يقول...

زكزوكتى

ما المشكلة ان الموضوع عامل زى الولادة المتعسرة و أنا كمان بكتب باللغة العربية فبتأخر
بس مينفعش كده فعلا لزم أكتب أكتر عشانى برده مش معقول سرعة السلحفة دى.

دعواتك يا معلم

سارة نجاتى يقول...

تشى

هههههههههه , أنت كمان بتحب تيمون و بومبة
بس كده دى تبقى غابة لما يبقى لا قانون لا مسؤلية

ربنا معانا

منور

سارة نجاتى يقول...

حسونة

فينك يا غايب من زمان ؟؟

طبعا كل دى مشاكل موجودة بس على رأسهم مصيبة المخدرات دى يعنى أنا أبقى قادرة اجيب البوليس يظبطهم بسهولة , و بقدرة قادر يطلعوا هما تانى يوم ؟؟
حاجة تخوف من اللى جاى بجد

تحياتى
و مقلتوليش أعمل ايه فى الفورمات ؟؟

ماااااااااااااشى

Alkomi يقول...

اللي انتي كتبتيه ده يا سارة ولا حاجة من اللي بيحصل في قطر ابو قير

باختصار ده قشــــــــــــــور

انتظري نوت على يس بوك عن درر و حكايات قطار ابو قير الحقيقية

سارة نجاتى يقول...

محمد الكومى
أنا عارفة ده كويس بس اذا كان كده و رفضوا ينشروه أكتر من كده كانوا عملوا ايه ؟؟
و بعدين فى ناس بتبقى عارفة اكتر بس متقدرش تحط اسمها عليه عشان أنت عارف المعاناة اللى بتحصلهم بعدها , أنا يكفينى أنى معنديش مشكلة فى ده

غير معرف يقول...

滿...........................