الأحد، 16 نوفمبر 2008

ليه ..... و ليه؟

حقيقى قولولى
ليه بنسيب حبة عصير في اخر الكوباية لما نكون عند حد , كده احنا ولاد ناس يعنى ؟
ليه الوقت الحلو بيعدي هوا , و فى محاضرة باردة , تلاقى الساعة بتستهبل ؟
ليه أبو " ساجدة " صاحبتى مبيرضاش يطلعها رحلات و يبوظ علينا الأجازة ؟
ليه لازم البنت اول ما تتخرج يدورولها علي عريس؟
ليه في اصحاب بيلبسوا زي بعض؟ يعنى ينزلوا هما الاتنين صفر , أو هما الاتنين خضر
ليه الاجانب وشهم أحمر علي طول؟
ليه و أنا بأكل أي حاجة من برة , أقعد أقول ح يجرى لى حاجة و أنا عمالة أكل برده ؟
ليه الولاد بقم بيقلدونا اليومين دول و بيلبسوا قمصان ستان؟ احنا شكلنا أحلى فى الستان على فكرة
ليه أسعار الكوافير الحريمي أغلي من الحلاق الرجالى ؟
ليه قبل ما نخرج لازم نعمل خطط؟
ليه مينفعش نحط رجل علي رجل قدام حد كبير؟
ليه زينة مصممة تمثل و هى دمها واقف وقفة الاشارة الساعة تلاتة الظهر ؟
ليه لازم يبقي فيه فى كل عائلة قرايب رخمين بيعملوا مشاكل؟
ليه مينفعش نروح فرح بكوتشي ؟ ايه اللى قل نفعه ؟
ليه تضيع وقتك و تقرأ الكلام ده , حقيقى يعنى ما وراكش حاجة عدلة تعملها ؟؟؟؟؟؟؟
تساءلت معايا صديقتى المخنوقة برده , ساجدة

هناك 34 تعليقًا:

elsha3er يقول...

بصراحة انتى بتسألى اسئلة غريبة شوية بس لها ردود ممكن نكون بنسيب حبة عصير زوقيا يعنى

والكوافير اغلى لانه بيتعب اكتر فى شعر البنت

اما عن زينة دى اراء

اما لية البنت بيدورولها على عريس عشان ما تعنزش لان ابوها وامها واخواتها مش قعدلينها

ومش لازم اكون فاضى عشان اقرأ الكلام دة مش ممكن اكون اتعلمت منك حاجة


شرفنى ان اكون اول تعليق

تحياتى

احمد الشاعر

micheal يقول...

ايه ده..دي أسئة الثانوية ارحم
:)
الوقت الحلو فعلا دايما يعدي بسرعة
السؤال الثاني لاننا في مجتمع ذكوري متحنط
سؤال الأجانب..لما تعرفي إجابته قوليلي
:)
سؤال لبس الولاد...لاننا مش فالحين كبنات أو ولاد غير أننا نأخذ الموضة من الغرب
سؤال الرجل علي رجل سببه شكليات فارغة
زينة مش بشعة برضه للدرجة دي
:)
فرح بكوتشي
عملتها قبل كده ومهمنيش
:)
أنا مستعد اقرأ لكي قد كده مرتين
:)
تحياتي

Empress appy يقول...

والله انتى لاسعه بس عموما فيه حاجات من الاتيكيت وفيه حاجات لازم تبقى بشياكه ولو رجعتى للاسلام هتلاقيها
عموما موضوع الاولاد نسيتى تسالى ليه البنات بيقصوا شعرهم زى الاولاد
ليه بقى بقرا البوست ده علشان حسيتك مجنونه
اوعى تروحى تسالى ابو ساجده او اقولك اساليه وخليه يرميكى من البلكونه ونخلص

سارة نجاتى يقول...

أنا اللى حصلى الشرف يا أحمد

لا غريبة و لا حاجة ,
بس معلش شفت زينة فى كابتن هيما ؟؟ هى و تامر الصراحة تألقوا ع الأخر

أما اجابة سؤال ليه البنت بيدورولها على عريس , فردك مثير للجدل , يعنى أنت شايف أن البنت يلزمها حد ياخد باله منها حتى لو كبرت ؟ يعنى احنا بنتجوز عشان ظل راجل و لا عشان شاءت الأقدار - وقد لا تشء - اناا بنقابل الشخص المناسب .

تحياتى ليك يا بلادياتى

سارة نجاتى يقول...

صدقنى لما أعرف ح أقولك يا مايكل

و شهد شاهد من أهلها " ذكورى و منحط" الله ينورك عليك يا باشا

طب أنت عملتها و نفعت , لكن أنا لازم ألبس بكعب , و مش بعرف أمشى عليه , لبست فلات كلوا وشى , أمال كوتشى كانوا عملوا فيا ايه .

تصدق يا مايكل أنت شكلك اللى حطلع بيك من حوار التدوين ده

نورنى كده على طول

سارة نجاتى يقول...

لاسعه , ده شرف طول عمرى أعتز بيه , لدرجه أنى بدعى ربنا و أقوله " يا رب ما تخلينى أعقل يا رب "
أما ليه بنقص شعرنا زيهم فدى جرأة مش كل البنات تقدر تقص " جارسون " لكن يا ابى ارجعى تاريخيا ح تلاقى أن الراجل هو اللى كان بيطول شعره مش الست .
و بعدين اسلام ايه يا ابى , مالك ؟ , ده أنا بقول الأجانب وشهم أحمر , و بنسيب عصير فى الكوباية , و كوتشى فى الفرح , تهييس يعنى .

فاروق عادل يقول...

اولا:علشان نبين اننا مش محرومين وولاد ناس بس عموما انا مبعملش كدة وامى تفضل تبرق لى بس ببقى بارد واشرب لاخر نفس

ثانيا:علشان نظرية النسبية

ثالثا:معرفش بسش كل واحد لية وجهة نظرة يمكن هو شايف انها هتتعاكس وهتتعاكس برضة

رابعا:علشان دة نظام المجتمع علشان يبقى فى راجل يصرف عليها غير ابوها

خامسا:علشان عندهم صحة والدم بيجرى فى وشهم

سادسا:علشان النفس والاكل بتاع برة لازم يبقى احسن

سابعا:علشون دول ولاد خوجات مش رجالة اصلا

ثامنا:معرفش اصل مروحتش كوافير حريمى قبل كدة

تاسعا:قال يعنى كدة بنحترمة انا شايف ان الاحترام بيبقى باللغة بطريقة الكلام كدة بقى

عاشرا:علشان فى ناس باردة كدة ربنا خالقهم علشان يرزلوا علينا

11:دى سنة الحياة وبالتاكيد هما شايفينك رخمة برضوا من منظورهم

12-انا بروح الافراح بكوتشى

13-علشان بنحب مدونتك وطريقة كتابتك فبنحب نقرا البوستات

14 منك لله ايدى وجعتنى

15:مدونتك مبتظهرش عندى كل لما تنزلى بوست جديد

16:متعرفيش تصورى صور لمدرستك تعالى شوفى اخر بوست


اااااااااااة لقد شلت يدى

سارة نجاتى يقول...

طالب ثانوى أحلى تعليق من عندك يا معلم , تحياتى أوى , و ح أشوف بوستك دلوقتى .

Unknown يقول...

انا مش بسيب عصير بشرب كلو و بقول عايزه تاني تفتكري قليلة الادب انا ولا طفسه

اااه فعلا الوقت الحلو مش بنحس بيه و هو بيعدي اصلا و لو مزنوقين مع حد بارد تحسي ان الساعه اتجمدت

احنا نهرب ساجده من وراه ولا يهمك

يمكن علي كل شهاده عريس طازه

علي اساس انهم تيك و تاك عارفه الكارتون ده اتنين سناجب شبه بعض

انا هاجي تاني سلام مؤقت يا قمر

Zika يقول...

انا بشرب العصير كله
هي اليساعه كده غداره فوق ما تتخيلي
عامل زي ابويا .. ابويا لو كنت بنت كان زمانه حابسني في الاوضه مابرجعلوش البيت بالايام :D:D
خوفا من تقاليد اجتماعيه ( البنت قاعده - البت هاتعنس .. البت خدها الوبا ) حاجات كتير كده اتعودنا عليها
ماعرفش والله يمكن بيحبوا بعض فابيلبسوا زي بعض
اموت واعرف ليه الاجانب وشهم احمر

انا عندي القولون ومش بقول كده

يعني هي القمصان الساتان هي اللي بقينا نقلدكوا فيها شوفي لبس البنات في تقليد قد ايه للبس الولاد

عشان شعر البنت بيبقي اطول
هههههههه

ماعفش دايما نعمل خطه ونروح عكس الخطه تماما

مابنحطش رجل علي رجل قدام حد اكبر مننا احتراما ليه ( ال يعني احتراما ليه )

عشان زينه شكلها حلو ودلوقت بيمثلوا بشكلهم مش بموهبتهم

اه والله يا ساره دوستي عالجرح انا مشردني في العيله عشان شغلي

فرح ؟! بكوتشي !!!! ليه مانروح بشورت وتيشيرت كات لونها اصفر وكاب ومضرب تنس

لا والله ماواريش حاجه وجعان ومش لاقي حد يعملي اكي .. سلام بقي اقوم اعمل لنفسي اكل

احساس لسه حى يقول...

عزيزتى

بنسيب حبة عصير علشان نبان ولاد ناس للناس اللى عاوزنهم يشوفونا ولاد ناس لاكن مش بنسيب للناس اللى عوزنهم يشوفنا على طبيعتنا

الوقت الحلو بيعدى هوا علشان قصير دايمن وقليل

ابو ساجدة صحبتك بيخاف على بنته بطريقة ومنها ميطلعاش رحلات بس اكيد بيعوضهالها فى شئ تانى

اكيد بيدورا على عريس علشان يطمنوا عليها ومتعنس فى زمن تاخر الزواج ده

بيلبسوا زى بعض لان ذقهم زى بعض فى اللى لبسوا زى بعض
واكيد اوقات كتبير مش بيلبسوا زى بعض


الاجانب وشوهم احمر علشان بيتكسفوا

علشان لما يجرالك حاجهتقولى كان قلبى حاسس

الولاد بيقلدوكم علشان انتم قلدتوهم فى حاجات كتير

علشان الستات مش بتدفع من جيوبها دايمن

بنخطط للخروج علشان مفيش حاجه اهم نخطط ليها

مينفعش كان زمان

علشان فى دمهم واقف اكتر منها وبيمثلوا

زى ما فىه فى كل عيلة قرايب طعمين بيعملوا حاجات حلوة

زى ما مينفعش نروح البلاج ببدلة بس مش حرام يعنى

بضيع وقتى وبقرا الكلام ده علشان تقريه وتيجى تضيعى وقتك عندى وتقرى اللى كتبه

يمكن حد سيفهم حاجه من حد

تحياتى لساجدة وليكى

سلام

prince4ever يقول...

و الله يا ساره مش شايف ان الحاجات دي غريبه اوي على فكرنا و ثقافتنا
انا مثلا روحت افراح بكوتشي - جاكت بدله و قميص طالع بره وجينز-
مبلبسش قمصان ستان...و اللي بيلبسها عيب تقولي عليه ولد اساسا
ابو ساجده راجل شرقي زينا كلنا و من وجهة نظره ان الرحله عيب...مش وجهة نظري انا يعني
طبعا المحاضره لازم تاخد وقت اطول لانها احدى الابتلائات الدنيويه
الكاوفير الحريمي اغلى ليه.. عشان شعرهم طويل مثلا
و اتيكيت كده مبنحطش رجل على رجل و نسيب شويه في اخر الكوبايه
زينه مصممه تمثل ليه... يعني هي شكلها مقبول و دمها مش واقف للدرجه دي يا ساره يعني...انا عرفت ناس بتكره احمد عز...عادي يعني
سلاااااااام

سارة نجاتى يقول...

ايمى حبيبتى ....... دى طفاسة

أنا حطيت كام خطة لاختطافه , بس محتاجه شوية فلوس عشان الرجاله اللى ح تنفذ , ياريت لو تتبرعوا لنا و نبى .هههههه

تنورنى يا قمر

سارة نجاتى يقول...

طب ازاى أنت دماغك مختلفة عنه يا زيكا ؟؟

اسمحلى بقه , بنقلدكوا فى ايه ؟؟ أوعى تقولى بنطلونات أنا مستنضفة دماغك , لو قلت كده مش ح ادخلك مدونة تانى .

و بعدين الساتان مش ليكوا أصلا و برده شكلكوا فى وحش .

والله لو كان ينفع أبعت لك لقمة , ظبطك بس المدونات لم تتطور لهذا الحد.

سلام يا معلم

سارة نجاتى يقول...

عزيزى الاحساس اللى أتمنى لك أن ما يموتش


سعدت بيك جدا فى زيارنك الأولى , لكن ساجدة دى صاحبتى من أولى اعدادى , و عارفة أنه مش بيعوض لها , بس هو للأمانة خايف عليها فعلا , لكن لما يبقى حلها عشان تتفسح حتى فى الخروجات العادية أنها تتجوز , يبقى لازم أباهتنا كلهم يقفوا مع نفسهم و يشوفوا هما كانوا بيربوا السنين اللى فاتت دى كلها و لا بيلعبوا أتارى .

لأن لما بتربى بترمى البحر بعد كده , و أى مخاوف بعد كده , بتشد على نفسك عشان تتغلب عليها .

و معرفش ايه حبكوا لزينة ده , دى تخطت كل الحدود , شفت كابتن هيما؟ , لأ شوفوا و بعدين قولى .

نحياتك زمانها وصلت , و ح أدخل مدونتك يا باشا .

سارة نجاتى يقول...

عزيزى البرنس

لو كان ده رأيك أنت كنت خنقتك , كان ح يبقى مصيرك زى المصير الافتراضى لزيكا.

و بعدين يا برنس هو اللى بيمثل هو اللى شكله حلو و الا المفروض أن رقم واحد الموهبة , هى مش موهوبة , و ده رأى ناس كتير متخصصة .
أما بخصوص دمها مش واقف , شفت كابتن هيما ؟؟ هى فعلا يا جماعة ماكنتش كده فى الأول , بس بقيت كده بعدين .

و يا خبيث يا خبيث , دى والله ما نفسنه بنات , طب ما غادة عادل أحلى منها , بس روحها أحسن بكتيييير عنها , و بمناسبة جنون البنات بالشكل , أنا مبحبش مهند ( و خلى بالك أنا كده فئة قليلة مندسة ) بس لأان دمه تقيل , حقيقى مش بيدى أى انطباعات على وشه .

منورنى

prince4ever يقول...

بالنسبه لمهند
اتفق معاكي بشده...مش نفسنه رجاله بس هو دمه واقف فعلا... و ممثل واقع ... و نحمد الله على اني مبتاعبش العوء ده
بالنسبه لغاده عادل...حلوه طبعا و روحها تمام...بس لازم نتفق انها مبقتش ممثله الا بعد ما اشتغلت مع عمنا محمد خان... راجعي مشهدها ادام كريم عبد العزيز في الباشا تلميذ..لما كانت بتعيط قال يعني خدعها... و الله من غير مبالغه مبستحملش اشوف المشهد ده... تمثيل هو الأسوأ على الاطلاق
بس انا نشفتش كابتن هيما...ممكن تكوني عندك حق... بس سؤال..مين اللي يدخل فيلم بطولة الكائن الاسطوري تامر حسني؟!!!
سلام

غير معرف يقول...

بوست ظريف و اسئله بتدور في دماغي كتير منها

ممكن تكون عادات اتعودنا عليها و انتي عارفه المثل اللي بيقول اللي تعرفه احسن من اللي ماتعرفوش

بس عجبوني كلهم و خصوصا بتاع كوبايه العصير و بتاع الاكل بره
مرسي علي الاسئله الحلوه

elsha3er يقول...

صحيح على فكرة انا اللى كلمنى عنك كان على محض الصدفة وهو ما قليش عنك اكتر من انك اسكندرانية وانك اصغر منه ومنى مش اكتر من كدة


اعرفيه على مهلك بس ما اتوقعش انك حتعرفيه بسرعة


احمد الشاعر

مجلة سيكولوجية مصرية يقول...

الله ينور ياسارة .. المدونة فى صعود مستمر و الله مبحسدش

معلش مش عارف أتبعك .. مشاغل بقى

لكن موضوع السلام بالايد لسه فى دماغى

عندى فكرة له .. وهى ليه أنتى متكتبش موضوع بيعبر عن رايك - من غير اسماء أماكن أو أشخاص - وننشره فى باب
بأقلام القراء فى سيكولوجية

وطبعا أنا هرد ومش هسيب ثغرة أنتى عارفة أنا مبسبش حقى

وبالمناسبة أنا رضيت على سؤالك عن الاختبار

تحياتى

أحمد مصطفى

مواطن مصري يقول...

ههههههههه
عندك حق في وقت المحاضرة اكن الساعة بتبقى سنة
و انا عموما بشرب العصير
ل اخر نقطة
و مش بسيب ولا نقطة

سارة نجاتى يقول...

أتفق معاك يا برنس فى موضوع مشهد غادة عادل فى الباشا تلميذ كان عوء فعلا

أما مين يدخل الفيلم ؟ واحدة عبيطة مشيت ورا صحابها .

سارة نجاتى يقول...

أنا الميرسى على تعليقك يا أجندة , بس ايه السر وراء تسمية أجندة حمراء ؟؟

سارة نجاتى يقول...

شاعر , اطلع من دماغى .ههههه

سارة نجاتى يقول...

منورنى يا أحمد بيه

بالنسبة لاقتراحك , ح أكلم معاك فى الحوار ده لما أشوفك , و كويس أنك فكرتنى بحوار السؤال ده لأنى كنت مهتمة بيه .

سارة نجاتى يقول...

عزيزى المواطن المصرى

مبسوطة بزيارتك الأولى ,

يا جماعة أنتوا محسسنى أن أنا بس اللى لسه بسيب عصير فى الكوباية ,لأ خلاص شكلى ح أعمل زى ايمى و أطلب زيادة كمان .

تحياتى الكتييييييييييرة

elsha3er يقول...

��� ���� ����� �� �� ����� ��� �� �� ����� � �� ����� �� ���� ���� �� ��� ������ ����

������


��� ������

elsha3er يقول...

اية رايك فى المربعات دى

على فكرة انا تفكيرى مش زى تفكيره انتى بس اللى ممكن يكون تفكيرك مختلف


احمد الشاعر

Alkomi يقول...

اهو يعني

حاجة كدة كيتش بعيد عنك

سارة نجاتى يقول...

شىء يسعدنى جدا أن يكون تفكيرى مختلف , أكتر مما تتخيل على فكرة , لأنك لو عاوز تحجز لك صف كويس فى الحياة اللى عايشينها دى , مش ح تلاقى مكان غير لو كنت مختلف , بس مش على طريقة خالف تعرف , لازم تكون مصدق نفسك الأول .

سارة نجاتى يقول...

و لا فاهمة منك أى حاجة يا كومى , ايه الألغاز اللى بقت نازلة عليك دى يا معلم ؟؟؟

حامد برهام يقول...

انا سعيد جدا إن فيه حد موافقني في رأييي عن زينا التي أراها قد صعدت في غفلة من البتاع...أما بعد
إن أسئلتك الأبدية هي أسئلة لا ينتظر من يسألهم الجواب عنهم...ولكنه هو الكوممينت والسلام..
فعن حمارأطفال الغرب...فحمار الأتراك يغلب...المفروض تتكلمي مثلا عن كلبظتهم ولظلظتهم وحجمهم المكعبر اللي كله مقاس واحد...زي مايكونو بياخدوا فرميولا من عند سوبر عبده.
أما بالنسبة للعصير والبواقي ...فأحب أقول إن اللي بيسيبوا في الحاجة الساقعة أكتر من اللي بيسيبوا في العصير..وأحب أقول لأي بيه بيعمل الموضوع ده...يابيه اللي بنعمله ده عيب وحرام..طبعا باسلوب صعيدي..عيب لأنه مش في الإتكيت وحرام لأن الباقي ماحدش هيشربه بعدك وهيترمي..وسجدة مابتخرجش رحلات عشان اسمها سجدة (ودي من جوامع الكلم) قصدي اللي يسمي بنته سجده ضروري مايطلعهاش رحلات...أنا اخواتي زينب وأميمة نفس النظام كده فمابالك بسجدة...
وكفايه كده بلاش أطول عشان دي أول زيارة لية...ومع السلامو عليكو

سارة نجاتى يقول...

منور يا حامد فى أول زيارة

بس ناصح والله , فعلا اللى يسمى بنته ساجدة ميطلعهاش رحلات

بس بواقى العصير فى الاتيكيت يا معلم

تخياتى

حامد برهام يقول...

صدقيني مش اتيكيت أنا سألت كتير