الثلاثاء، 14 أكتوبر 2008

بنى أدميين "مسخرة"

كانت جدتى تقول لى بفخر: " رقيت ابراهيم ابن خالتك و نام فى الأخر" , و كنت وقتها لا أفهم لماذا رقت "ابراهيم" ؟! و لماذا نام فى الأخر؟! . من كام يوم , قالت لى : تعالى م أرقيقى . - رقوة ايه بس يا نانا ! ( رقوة اللى هى "رقية" بالغة العربية , و نانا اللى هى جدتى) - ايه؟! ده قرأن , احنا بنعمل حاجة ؟ ! ( "حاجة" تشمل كل ماهو ليس من الأيات القرأنية , يعنى عروسة , عين عفريت ). استسلمت لنانا و استلقيت على الكنبة مسندة رأسى على احدى ركبتيها , و أخذت تمسح رأسى و تقرأ الفاتحة و المعوذتين ,و عندما تصل للأية التى بها (و من شر حاسد اذا حسد) تكبس بيدها على رأسى و تكررها عدة مرات , الموضوع قلب "مسخرة " لما صنعت مزيجا من السور الصغيرة التى تحفظها فهى تقول " قل أعوذ برب الصمد" ( اللى هى "قل أعوذ برب الفلق"), و عندما وجدت نفسها أنهت ما تحفظه و كررته عدة مرات , فقرأت لى تكبير العيد . نستطيع أن نضع فى لائحة اهتمامات جدتى الرقية , قد يكون ذلك بسبب حبها لشعور المنقذ أو المخلص و لاحظت أن نانا تستمتع بالرقية فتركتها تقوم بها , ولكن خالتى انضمت لها أيضا و شكلا معا فريق انقاذ , كنت مرة فى زيارة و قالت لى خالتى : تعالى يا سارة, اقعدى (ثم زفت لى النبأ العظيم) : ح أرقيقى, قلت فى سرى, " يا دى النيلة " , ( جلست على حافة السرير ) قالت :لأ على ركبتى , استلقيت كما أستلقى لنانا . العامل المشترك فى رقيتهما هو التثاؤب و تساقط الدموع , هاتان العلامتان المؤكدتان لمفعول ما تقومان به, فى هذا الوقت أنشغل أنا بالتحدث مع الأخرين , أثناء رقية خالتى , تدخلت ابنتها قائلة :" انتى حلمتى لها حلم وحش و لا ايه؟ ", لم تجب و جاءتنى بماء ورد قائلة : امسحى وشك بيه. قلت : لا يا شيخة , ليكون غلط على العين. خالتى : غلط ليه ؟! د ه ماء ورد , امسحى , امسحى . تدخلت ابنه خالتى : تخيلى أن كل ما تيجى طنط " فادية" يحصل لى مشكلة , بتحسدنى بشدة . و أكدت أمها على كلامها قائلة : " فعلا بعد ما مشيت من عندنا أخر مرة , وقع عليها مية مغلية ". مرة جاءتنا احدى القريبات من 400 كيلو سفر لزيارة جدتى , كانت كتيبة الرقية هناك , جدتى , خالتى , و صديقة خالتى . عرضت نانا المساعدة برقية خاصة, و أخذت تتثاءب و تتثاءب و أصدرت أصوات غريبة , و انتقلت العدوة الى خالتى و كذلك صديقتها , و أخذن الثلاثة فى اصدار أصوات متثاءبة مخيفة و يتمطعن . يومها قالت لى قريبتنا أنها كانت تخشى أن يستئذبن و خاصة أن القمر كان مكتمل يومها, و صارت قبل كل زيارة تقول لى " تعالى معايا , مش رايحة عندهم لوحدى".
أظرف ما فى الأمر , أنك لا تشعر بشىء لا قبل و لا بعد .

هناك 13 تعليقًا:

Unknown يقول...

اولآ مبروك البلوج و مستنياكي بقي تجيبيلي بيبسي و تورته علشان الإفتتاح

معلش هي يمكن تكون متأخره شويه بس مكنش عندي نت فمكنتش متابعه

البوست حلو اوي اوي بجد ضحكت جدآ و انا بقراه و الجميل انه لايت بس مش تافهه انتي بتناقشي ثقافه موجوده في المجتمع

بس هما بيتاوبوا علشان الرقوه ولا عايزين يناموا

Empress appy يقول...

اولا اهلا بيكي فى بلوج سبوت واخواته وعمامه ههههههههه
الحسد موجود فى القران الكريم
انا عندي نانا بترقينى بس بالايات الصح
وبجد بحس بفرق هههه
ابقى تعالى وهى ترقيكي ههههه

Zika يقول...

بصي انا اسمع ان في حاجه فعلا اسمها الرقيه الشرعيه ليها اسلوبها واياتها
بس اللي بتعمله فيكي " نانا " والباقيين ده اظن ان فيه خطر علي حياتك
خصوصا انك بتقولي ان القمر كان مكتمل
:D:D:D
خللي بالك مصاصين الدماء كتروا في مصر اوي
تحياتي
زيكا

Zika يقول...

ياريت تشيلي
verification word

سارة نجاتى يقول...

ايمى

الله يبارك فيكى , و هما بيتابوا عشان يأكدوا أنهم ضيعوا الحسد اللى عليكى , معرفش أتحسد عليه بالضبط؟؟ , و احتمال برده موضوع النوم ده.


ابى

كويس أن نانا عندك لسه حافظة و بتجيب معاكى نتيجة , أنا نانا عندى ساعات الشحن بيفصل , بس بحبها و شحنها فاصل كده .



زيكا


أنا برده ابتديت أحس بالخطر ده , و عشان كده بحذركوا منهم , اللى يشوف نانا و خالتى , ميخليهاش ترقيه

micheal يقول...

مبروك عليكي البلوج وبضم صوتي لصوت إيمي جزرة وبطالب بحفل إفتتاح و جاتوه بس اعملي حسابي ففانتا مش بيبسي عشان عندي بوادر هشاشة عظام مبكره
:)
عجبني البوست لانه خفبف في اسلوبه وكلامه وأنا عامة شايف أن كل وقت وحتلاقي ثقافة معينة شائعة فيه وإن كان لسه فيه منها لحد الان
ويكفينا شر الحاسددين
:)
تحياتي

blue-wave يقول...

حلو البلوج بتاعك
اما بالنسبه للبوست
ف فعلا هناك من يقتنع بالكلام دا جدا
اما انا فلن اقول سوى لن يصيبنا الا ما كتب الله لنا
تحياتى

elsha3er يقول...

والله المصرين حاجة غريبة زى برده لما الشبشب يكون مقلوب يفضلو يقولوا اعدلوه مش عارف انه حديث اللى امر بكدة اما بالنسبة للرقية فهى موجودة فعلا فى السنة وتسمى بالرقية الشرعية


احمد الشاعر

سارة نجاتى يقول...

ازيكوا يا جماعة ,

و الله يا مشيل ( ميشيل و لا مايكل ) , أنت و ايمى حديكوا مقلب و لا فيه بيبسى و لا فانتا , اللى عاوز حفلة يحيب حاجتهفى ايدوا ( عشان تعرفوا قد ايه أنا كريمة) .



blue wave

عندك حق تماما , و ده اللى بيخلينى مش مقتنعة أن فى بنى ادم زيى يستطيع أنه يؤثر فى مجريات حياتى ,و نورت البلوج .


الشاعر

موضوع الشبشب ده موضوع مهم جدا جدا , نفسى أعرف ليه ؟ , قريب أوى بدأت أتخلص من لعنة الشبشب المقلوب , أنت عارف أن يحيى حقى مرة كتب عن الموضوع ده و قال أنه فضل مش مقتنع بالكلام ده, و لكن كل ما يجد شبشب مقلوب يتوتر , يحس أن لازم يتعدل .

غير معرف يقول...

يا عفريته
ده شغل مستوي عالي ، يعنى انا احب البلوج الصاغقة اللي زي دهو ياريت تتنيلي و تكتبي هباب بالأنجليزي ، احسن و رحمة جدتك التانية (كانت برضه بترقي و تعمل عرايس،)
و بعدين التعليقات اللى بتقول الحسد موجود في القران و الرقية الشرعية، البلوج بتاعك لم يتكر اى منهما، بس الناس عندها حساسية وانصحهم يحطوا "كينا كومب" وكل واحد يدهن اللى علر مزاجه
و انا مش عاوزك تلغي اى تعليق حتي لو كان شتيمة ، الواحد لما يفتح الشباك ، الهوا يدخل ومعاه شوية تراب، عموما اتعلموا ديموقراطية يا غجر، وبعدين إيه التاس الفقرا اللي عاوزين بيبسي، أنا اطالب بلحمة و طبيخ من بتاع امك و لن اتنازل عن اقل من كده
سلمى على ابوكى
مجدى

سارة نجاتى يقول...

عمى , حبيب قلبى , فينك يا جدع؟
أنا مبسوطة أوى أنك دخلت و علقت فى مدونتى المتواضعة , لا و لسه ح تشوف شغل جبار , سلملى عليهم كلهم.

حامد برهام يقول...

والله أنا من أعرف من قراءاتي إن الحسد من أنواع السحر....بل من أقوي أنواع السحر...لأنه يتم بدون وساطه..وإن ممكن الواحد يحسد نفسه أو يحسد قرايبه...ويقال إن الرقية تلغي تأثير الحسد...لكن أنا كنت أسمع إن الشخص المقري عليه هو اللي يتثائب مش اللي بيقرأ...بمكن الموضوع يختلف بين الإسكندرية والزقازيق...الحمد لله عائلتنا مافيهاش حد بيرقي...بس عموما أنا حطيت نفسي مكان خالتك ونانا...وأنا بقرأ المقال زعلت أوي..أنت متأكده إن ماحدش منهم هيدخل هنا ويقراه...والسلام ختام

غير معرف يقول...

滿...........................