الأحد، 28 مارس 2010

جواز الصالونات و علاقته بالتطور الطبيعى للحاجة الساقعة

مقولة " التطور الطبيعى للحاجة الساقعة " بحبها أوى لأنها بتنطبق على حاجات كتير فى حياتنا , من ضمنهم الجواز . لما سألنى زميل مرة و قال : ايه رأيك اتجوز واحدة مش بحبها بس هى بتحبنى ( كانت قريبته ) ؟. قعدت أحاول أشرح له وجهه نظرى فى الموضوع لحد ما قلت له فى الأخر : بص يا عم الجواز ده هو التطور الطبيعى للحاجة الساقعة , يعنى لازم تقابل بنى ادمه يحصل ما بينكم قبول متبادل , و القبول ده ممكن يحصل بين اى اتنين بنى أدمين فى الدنيا يعنى لازم يبقى فى قبول بينك و بين صحابك و بينك و بين زمايلك فى الشغل و هكذا , يعنى م الأخر مينفعش واحد يتجوز واحدة مش بيقبلها أو العكس , و توقعت أن ده بديهى لكن لما سألته : طب أنت بتقلبها بشكل عام ؟؟ , قال لى : لأ . و الغريب أن حوار مشابه دار مع أكتر من شخص قبل كده . ------------------------- المفروض أنك بعد ما تتقبل البنى أدم , ممكن احساسك ناحيته يتطور فى اتجاه من الاتجاهات بتاعت العلاقات الانسانية , المفروض طبعا ( و ده اللى طول عمرنا بنسمعه و نشوفه ) بيحصل انجذاب , اعجاب , حب , جواز بمختلف بقى درجات الحاجات دى , لكن ده المفروض أنه الطبيعى - من وجهه نظرى على الأقل - يعنى مش ينفع انك تحب و بعدين تعجب , زى ما ينفعش أنك تتجوز و بعدين تحب , لان انت كده ح تبقى مشيت عكس التطور الطبيعى , يعنى مثلا مش ينفع تعتبر بنى أدم صاحبك الانتيم و أنت لسه بتبتدى ( تعرفه ) و فى فرق بين انك ( تعرف ) فلان و بين أنك ( تتعرف ) عليه ساعتين فى صالون بيتكوا أو حتى عشر ساعات لأن مهما كان عدد الساعات دول فهما فى النهاية ح يحققوا " التعرف " بس مش " المعرفة " , التعرف ده يعنى بيشتغل ايه ؟؟ بيقرأ سلسلة ما وراء الطبيعة و لا لأ ؟ و بيسمع تامر و لا عمرو ؟ و للناس المتحفظ بيقى بيسمع عمرو خالد و لا مصطفى حسنى , و للناس اللى مزوداها ع الأخر يبقى السؤال اذا كان بيسمع الجوينى و لا يعقوب ؟؟ و هكذا . و بندهش على أساس حاجات زى دى ممكن البنى أدم يحدد اذا كان ح يقضى ما تبقى من حياته مع الشخص ده و لا لأ , و لما تسال يقولولك : ما هو حصل ارتياح مبدئى , طب ما هو الواحد لو اتجوز كل بنى أدم قابله حصل بينه و بينه ارتياح مبدئى ح ينتهى الحال بأنك ح تلاقى نفسك متجوز 500 راجل و 300 بنت و 200 حيوان أليف مثلا ! .يا جماعة ده ساعات الواحد ممكن يتطابق مع شخص ما بس ميحصلش ال glimpse اللى مفروض تحصل ما بينكوا بمعنى أخر ممكن عقولكوا , شخصياتكوا تتلاقى بس مش أرواحكوا . لذلك الجوازهو نتيجة و وسيلة , ازاى ؟ نتيجة للتطور اللى حكينا عليه و وسيلة تضيف بها استقرار و سعادة فى حياتك و المفروض ميكونش غاية فى حد ذاته . طب المشكلة فين ؟؟ يعنى ايه اللى بيخلى كمية الناس دى تعمل اختيارات غلط ؟؟ يتهيأ لى فى حاجتين الضغط الفظيع من المجتمع ( المجتمع اللى هو احنا على فكرة ) و التدخل الفج فى حياة الأخرين فى أدق تفاصيل حياتهم يعنى يبدأوا يسألوك : ح تخطب امتى ؟ الفرح امتى ؟ العروسة مين ؟ و بعد الفرح , ح نفرح بولى العهد امتى ( سؤال مستفز يعنى ) , و لو جبت بنت يبقى ح تجيب الولد امتى و لو جبت ولد يبقى ح تجيب له اخت امتى ؟ ( ده على أساس أنك المفروض تتطلع له أجندة المواعيد تفر ال schedule بتاعك و تقوله أه بص احتمال كبير كمان تلات أسابيع تسمع خبر حلو كده ع الساعة سبعة و نص ان شاء الله ) و لما تجيب العيال , عملوا ايه فى الدراسة ؟ طب جابوا كام فى الثانوية العامة ؟ ح تجوزهم امتى ؟؟ , و لا تنتهى الحالة دى أبدا لذلك المحيط بتاعنا بيضغط على أعصابنا طبعا ممكن يخليك تاخد خطو كبيرة فى حياتك زى دى بس عشان ترتاح من الزن فتضطر لاهمال الجانب الأساسى بتاع التطور الطبيعى . المشكلة التانية , ممكن تكون فى الفهم المعووج - من وجهة نظرى اللى مش متواضعة - لمعايير البنى ادم اللى هو " كويس " فى مجتمعنا ( و مرة تانية افكركم ان مجتمعنا هو أنتم و أنا ) لذلك كتير كتير اوى لما أسأل واحده عن خطيبها اللى غالبا كانت شافته مرتين قبل الخطوبة تبتدى تتكلم عنه بصيغة الكتلة و الحجم , يعنى بيشتغل كذا و اللى لازم تكون شغلانة بتجيب فلوس , و راكب عربية ماركة ايه و ساكن فين وأبوه مين , ده طبعا لا ينطبق على كل الناس بس فى نظرة عامة سائدة للشخص اللى بنعتبره " النموذج " طبعا مش بقلل من قيمة الحاجات دى ما لازم الناس تعيش بمستوى متقارب للى عاشت فيه طول حياتها عشان يتحقق تكافؤ معقول ما بينهم . و مش ح أقول البنت النموذج المفروض بتبقى ازاى عشان متقولوش عليا مش موضوعية هههههههه بس هى طبعا لازم تكون أليفة أو تبان أليفة أ و عامله أليفة ( و اليفة دى مش مهينة و لا حاجة أنا بتسخدم المصطلح على نفسى ساعات ههههههه( و زى ما قلت ده مش منطبق على كل الناس ). طب ايه المهم ؟؟ تقريبا ده سؤال كل اللى ناس اللى قلتلهم الكلام اللى فوق ده سألوهولى , و كانوا بيسألونى على طريقة قولى يا أم العريف , فكنت بقول : "البنى أدم " الكويس " ( و الكلام موجه لواحدة صاحبتى ساعتها ) هو اللى تتقاربى معاه فى رؤيتكم للعالم و لأنفسكم و لمستقبلكم و يكون عندكوا اتجاه متشابه نحو الحاجات دى كلها " و بأكد على كلمتى " تتشابه " و " تتقارب " يعنى مش لازم تتطابق ,بس لازم تكون المحصلة النهائية أنك لو جبتى فازة و حاطيها على ترابيزة تكونوا أنتوا الاتنين شايفنها من زواية متقاربة , أو على الأقل متفقين أنها فازة , لازم تكونوا منتظرين نفس الحاجات من الدنيا أى يكون ليكوا نفس التوقعات , عشان تشتغلوا بعد كده فى اتجاه موازى مش معاكس . عشان كده أقول لجمهورى العريض اللى هما الكام واحد اللى بيقروا البوست و اللى وجدت فى أوساطهم مطلب عريض فى ان اكتب رأيى فى جواز الصالونات ( معلش ح أنفخ فى نفسى شوية ) , اقولهم ح أديكوا الخلاصة : فى حاجات بنسعى وراها فى الدنيا بايدينا و سنانا و فى حاجات تانية هى اللى بنقابلها فى طريقنا , و طول ما أنت عايش فى الدنيا حياة سوية أو غير سوية فياما ح تقابل ناس و لازم ح يكون فيهم الحد الصح , ممكن احنا ناخد الاختيار الغلط بس الحد الصح موجود دايما فى مكان ما , يعنى لو احنا فرى أوف عقد شخصية ( من نوعية ان البنات كلهم جزم , و الولاد كلهم غدارين يا ماما غدارين ) و لو احنا بنحاول نعيش فى الدنيا صح ( بنحاول على الأقل ) و متحققين فى أنفسنا و على قدر لا باس به من السلام الداخلى ... أعتقد أعتقد يعنى أن ربنا المفروض ح يوجب معانا و يخلى كل الحاجات اللى مفروض نقابلها فى منتصف الطريق نقابلها فعلا ......حاجات كتير المفروض تقابلنا مش بس الجواز يا جماعة ... يلا كفاية عليكوا كده .

هناك 13 تعليقًا:

Unknown يقول...

تحفه الله يهد شيطانك حششت وانا بقرا:)

بس والله يا ساره من واقع خبرتي بطيخه بطيخه كبيره كمان والله يسترها

بس على فكرة كلامك صح؛ معظم الخاطبات بيحكولك هو منيح بيعاملني كويس اهله مناح كريم

بس تا تلاقي حد مدرك لموضوع انو في مش عارفه شو مشترك

مم أظن الرك عالنصيب اريح عشان ما نوجعش دماغنا على قولتكم

بعدين شو هالكلام عن الصح والصحي؟ عيب يا ساره عيب مين هاد الذي يملك رفاهية الاختيار؟ :)

Blank-Socrate يقول...

على فكرة الموضوع دا جاااااااااااامد جدا
و انا عايش تفاصيلة حاليا
بس انا مشتت تمام انى ارد و اشارك
اشوفك بعد اسبوع العيد
شكرا يا فندم و حضرتك طيبة
و كل الامة المصرية و العربية و الاسلامية و القبطية و البولاقية و المنياوية و السواحلية و البنات الجامدين الحلوين طيبين
مش بقولك مشتت
:)

Che يقول...

والله يا ساره الموضوع ده شائك ... المشكله ان الحاجات بيبقى ليها اكتر من مسمى
يعنى اللى انتى بتقولى عليه تدخل فظ فى حياه الاخرين بيسموه اجتماعيات ... و اللى بتسميه انها بتقول على خطيبها بالكتله و الحجم بيسموه اساسيات
بالنسبه للتشابه و التقارب انا فهمت وجه نظرك .... بس خدى سؤال لولبى
لو اتنين وجهه نظرهم للاشياء متطابقه ... تفتكرى هيبقوا فرحانين سوا ولا لا ؟
مستنى ردك يا ساره

micheal يقول...

أنتي كتبتي الموضوع ده قبل كده..أنا فاكر..صح؟

سارة نجاتى يقول...

ميسو
أهم حاجة تحششى و انتى بتقريلى و أصل فى أزمة فى الحشيش فى مصر لو تسمعى هههههههه

مين اللى بيملك رفاهية الاختيار ؟
تصدقى بقى أنا عاوزاك تعملى ده موضوع لوحده , و الله يبقى موضوع جامد

رفاهية الاختيار ...

حبيبى يا ميسو

سارة نجاتى يقول...

مينا

انتوا ايه حكايتكوا ؟؟ شاكلكوا بتضربوا من عند حمادة هيد و لا ايه ههههههه

فكك من اى حد , اختارأنت و متخليش حد يعيشك تفاصيل مش عايز تعيشها

و أنت طيب يا باشا
عيد سعيد عليك

سارة نجاتى يقول...

تشى

لا فى فرق واضح بين الاجتماعيات و التدخل .. فرق كبير
اجتماعيات انى أروح أبارك لك لما تخلف
تدخل أنى أطالبك بأنك تجيب عيال بعد اول شهر من الجواز و أسألك مراتك ح تحمل امتى

بالنوسبه للتطابق يستحيل يستحيل حد يتطابق , الشخصية زى بصمة الصوبع

مهم ( التقارب ) لكن حتى لو فى تطابق فده طبعا مش صحى خالص

منور انت

سارة نجاتى يقول...

مايكل

أنت عشان عندى ع الفيس يا باشا
بتشوف الحاجة
exclusive

Unknown يقول...

طيب شو في بالك عشان افهم

يعني شو فكرتك عن رفاهية الاختيار اساسا

على فكره شكلو انتي اللي محششه يا ساره:)

Tamer Moghazy يقول...

"الواحد لو اتجوز كل بنى أدم قابله حصل بينه و بينه ارتياح مبدئى ح ينتهى الحال بأنك ح تلاقى نفسك متجوز 500 راجل و 300 بنت و 200 حيوان أليف مثلا !"

صباحك معطر بالوروود.. بجد ضحكتيني جدا بالتعبير ده وعجبني جدا البوست المعبر كأنني انا اللي باتكلم..
ولو الجواز تم بالمراحل التقليدية (الباردة) دي يبقى فعلا ده تطور طبيعي لحاجة ساقعة.

Tamer Moghazy يقول...

الجواز من وجهة نظري حالة شعورية منفردة..تقارب وجداني وعقلي مع شخص
ما ينفعش تتكرر تاني لو بدلنا الطرف الاخر.

(راي شخصي) :) :)

سارة نجاتى يقول...

ميسو ميسو ميسو

معلش انشغلت اليومين اللى فاتوا مش كنت بفتح المدونة
ح اجى عندك أقولك


سلاموز

سارة نجاتى يقول...

تيمو

الحمد لله فى ولد بيفهم أهو هههههههه

الجواز من وجهة نظري حالة شعورية منفردة..تقارب وجداني وعقلي مع شخص
ما ينفعش تتكرر تاني لو بدلنا الطرف الاخر

بالظبط كده , دى بتبقى حالة فريدة من ال
connection
اللى غالبا مبتحصلش فى حياتك غير مرة
أو اتنين بالكتير

ابقى نور المدونة اليتمة دى