الأربعاء، 30 ديسمبر 2009

احنا أسفين

بما أنه النهاردة أخر يوم مع ليلى و بما أنى تقريبا مكتبتش حاجة فى الموضوع ده .... حبيت أشارك كل بنى أدم شايف أن مفيش مشكلة لمرأة فى مجتمعنا بلحظة ظريفة جدا مريت بيها النهاردة ..... كنت واقفة على محطة الترام أنا و اتنين صحابى .... الترام بتتحرك قدامنا .... نزل منها واحد صفع صديقتى على مؤخرتها .... صاحبه بصق عليا .... و شتم الصديقة التالتة اللى ملحقش يلمسها أو يتف عليها ..... ------------------------------------------------- صحبتى اللى اتضربت وقفت تضحك , سالتها : ايه بيضحك فى ده ؟؟ قالت لى : عشان معيطش ..... طبعا كان نفسى توافق أحط صورتها هنا بس هى عمرها ما ح ترضى ..... عشان هى بتستحرم تتصور أصلا ... عشان هى كبنت شايفه أنها مش س لازم تكون مغطية جسمها كله و بس ... لا دى بترفض تتصور كمان ..... يعنى عملت اللى عليها و منعت اثارةلفتنة الرجل .... ليه محدش منع نفسه عن أذيتها ؟؟؟؟؟ ..... ----------------------------------------------------- لما ركبنا الترام اللى وراها قعدنا لمدة نص ساعة كاملة بنحكى مواقف مشابهة ........... صديقتى المصفوعة و التانية المشتومة قعدوا يحكوا فى سيل من المواقف اللى حصل لهم ... تقريبا بشكل يومى لازم نسمع تعليقات غاية فى البذاءة ... و بشكل لحظى لازم نشوف نظرات متعدية ..... و بشكل شهرى لازم نتعرض للاعتداء باللمس ؟؟؟ .... ------------------------------------------------ زعلانه أوى و أنا بحكى ده ... محدش ممكن يحس قد ايه أنا زعلانه مهما قال أنه عارف ..... حتى لو بنت , لان ليا احلام كبيرة ممكن يقف قدامها تحولى التدريجى للامتناع عن النزول فى الشارع تماما ....... و ساعتها مش ح ألاقى حاجة اكتبها و لا اقولهالكوا هنا ....... ليه زعلانة ؟؟ لأنى بحب أمشى فى الشارع أوى .. بحب أتأمل الناس أوى .... عشان كده مش بفضل أركب عربية أو تاكسى .... بحب أمشى وسط الناس ... طبيعة المهنة اللى بحاول أمارسها بتتطلب ده ... شخصيتى بتحب ده .... الا انى الفترة الأخيرة بطلت امشى خالص ..... بخاف .... لانى مش بسكت ... و مش معقول ح تخانق كل يومين .... طب أعمل ايه ؟؟ تقوقعت من غير ما أقصد على نفسى .......... ----------------------------------- مش بجب أشتكى , على طريقة اشرب بيرل كده هههههههه , عشان كده ليا مغامرات فى الرد على الأشكال دى و اللى ولا مرة جاب نتيجة ..... و اللى عتق الولد ده من ايدى المرة دى أن كان فى ترام بتجرى ... صديقتى المصفوعة قالت لى بعد الموقف : ياريتنى كنت سمعت كلامك و خدت تاكسى ......... ----------------------------------------------------- صح البنات معندهمش مشكلة خالص .... احنا زى الفل ... مية مية و كل بنى ادم بقى بيقول كده يعرف أنى ح أجيبه و أسلط عليه ناس يتحرشوا بيه هههههه عشان اللى ايده فى المية ... ---------------------------- طب أنا عايزه حل ... انا واحدة مش بستسلم و ح أخد حقى أهو .. قلولولى حل غير أنى أجيب العيال دى من قفاها و احاول أفعصهم ... لأنى اريدى بعمل ده ... و الحمد لله كل محاولات الرد كانت فاشلة جدا ....... ------------------------------------------------ هو احنا سبب كل المشاكل , أوكيه و احنا اللى عاملين كده فى روحنا .... صح و احنا اللى قلنا للناس تحرشوا بينا ......... ممكن برده بس عايزه اجابة محترمة كده رجاء من كل شخص ناوى يعلق يرد علي السؤال ده ....... حد فيكوا كان ماشى فى الشارع و جرب يتصفع على مؤخرته قبل كده ؟؟؟ ----------------------------- تصبحوا على مكان متمشوش فيه تبصوا وراكوا ........... ملحوظة : بوجه تحية للصديقة المدونة ماجى اللى قالت لى ح تبطلى تتكلمى فى الموضوع شوية ... و مش ح تقدرى و ترجعى تانى ههههههههه

هناك 17 تعليقًا:

بحر الالوان يقول...

بما ان النهاردة اخر يوم في 2009 .... اسمح لي امارس نوع جديد من التحرش ( ومش عارف هاتضحكي ولا تعيطي ولا تنفضي )...

واقولك

كل سنه وحضرتك طيبه ...... عام جديد سعيد ان شاء الله

سارة نجاتى يقول...

لا عياط مبينعيطش
ضحك الصراحة على طول مهيسة

بس ح أقولك شكرا و كل سنة و أنت طيب

micheal يقول...

مش عارف أقولك إيه..يعني أنا في البوست الثالث اللي نزلته اليوم(وكتبته منذ أسبوعين) فيه رصد للحكاية دي لأني وأنا بكتب حطيت نفسي مكانكوا وفكرت قد إيه يبقى الموضوع مهين لو كل حد في الشارع عاوز يحتك بجسدي لمجرد أني عندي صفة الأنثى
شيء فعلا مينفعش يتقال فيه كلام
كل اللي أقدر أؤكد عليه:خدي حقط بإيدك في ساعتها مهما حصل ومهما كانت العواقب
وبس
!
مش لاقي حاجة تانية أقولها عشان بجد أنا مقتنع الكلام في المواضيع دي مش بيجيب نتيجة لأن أغلب اللي بيعملوا كده مش بتوصلهم الرسالة ولو وصلت حيوجدوا لنفسهم مليون مبرر ذكوري من المجتمع للي بيعملوه
تحياتي يا سارة

مواطن مصري يقول...

كل سنة و انتي طيبة

و الله دة احنا غلابة دة احنا الي نخاف منكم

Magi Mostafa يقول...

المشى فى الشارع مبقاش امن خديها منى كلمه عايزه تروحى فى حته تاكسى وانتهينا
نفس الموقف بالظبط حصل مع واحده صحبتى شتمت الشخص الى عمل كده قالتله يا سافل رجع تانى وضربها نفس الضربه وقالها عشان متبقيش تشتمى يعنى البنت تتضرب ولازم تبقى مؤدبه ومتشتمش

بصى يا حبيبتى ولا تتخانقى ولا تشتمى الى يكلمك مترديش عليه سدى ودانك والى يمد ايده بقى رشيه فى عينيه بالبيبر اسبراى (هتلاقى طريقته عندى فى البلوج)
بس ابقى افتكرى الجمايل دى

Zika يقول...

كل سنه وانتي طيبه
السنه الجايه تمشي في الشارع براحتك
واللي يقربلك ايده ولسانه يتقطعوا لو هايضايقك
والسنه الجايه تمارسي المهنه اللي بتحبيها بكل جرآه وماحدش يقدر يحوشك
وترفعي راسنا كده زي مانتي رفعتيها السنه دي

Che يقول...

كل سنه و انتى طيبه يا سارة
طبعا مش هقدر اعلق على الموقف لأنه مش محتاج تعليق .... و برغم انى مدى نفسى اجازه انما هرجع تانى عشان اكتب عن ليلى
كل سنه و انتى طيبه تانى

سارة نجاتى يقول...

مايكل

شكرا ليك يا مايكل
و فعلا أنا قلت قبل كده أنا عندى اتثبت بمطوة احسن ميت مرة من كلمة جارحة
لأن فى النهاية ح أبقى عارفه أنى بنى ادم معاه فلوس ( راجل ست طفل شاب )
عارف لو كلاب السكك معاهم فلوس كان برده ح يتثبتوا
لكن التحرش ده بيحصل عشان ذنب معين
عشان حنا بنات

سارة نجاتى يقول...

مواطن مصرى

و انت طيب
ما عشان كده عنوان البوست
احنا أسفين

سارة نجاتى يقول...

ماجى

ايه البيبر سبراى ده

لا لازم أجى أشوف

طب ما تحطى اللينك كده

سارة نجاتى يقول...

زيكا

و أنت طيب

بس دى شحنة ايجابية مش عندى خالص

سارة نجاتى يقول...

تشى

و أنت طيب

بس و نبى لو ح تكتب بوست يحرق الدم بلاش هههههههه

أنا خلاص استويت ههههه

مستنيه بوستك يا باشا

youssef يقول...

مش عارفه ... و لذلك مش لاقيه حاجة دلوقتى أقولها لأى واحدة شايفه نفسها أنها ليلى ...غير حاجة واحدة اطلعى من ده فى حياتك الشخصية عشان تعرفى تدى للفكرة على مستوى أعلى من غير ما تسحبى عقدك الشخصية معاكى ......... تصالحى مع نفسك أنتى و اجبرى الاخرين على ده ..... و بعدين نبقى نشوف أزمة المجتمع ككل

...........

يمكن الكلمتين دول مش مناسبين للموضوع ده بس الحقيقة انسجمت منهم قوي و جبتهم معايا من البوست اللي فات لان رنينهم لسه قوي في الودان :)))

و استكمالا ليهم احب اديكي تنويه لكلمتين عجبوني في نفس الموضوع .. يمكن تحبي تشوفي يا سارة

http://www.resstlesswaves.blogspot.com/

دمت بخير

Unknown يقول...

انا مش متابع خالص
لا عند مايكل و لا هنا
بخصوص موضوع ليلى و ام ليلى
بس عموماً ربنا يتمم لها بخير
هههههههههه

و عام سعيد جميل مشرق متأمل عليكى يا اخت سارة
:-)

غير معرف يقول...

معلش ما تضايقيش نفسك المجتمع بيتغير والحاجات دى هتختفى ونظرة وتعامل الناس معاها هيختلف

لعبة ماريو يقول...

كل سنه وحضرتك طيبه ...... عام جديد سعيد ان شاء الله

mekho matrix يقول...

كلام سليم وبجد احنا اسفين




العاب توم وجيرى