السبت، 26 ديسمبر 2009

مش مهم اذا كنا كلنا ليلى ولا لأ

الصراحة كنت ناويه أفكس السنة دى موضوع كلنا ليلى .... أنا كتبت فيه السنة اللى فاتت و لأنى

اتغيرت كتير عن السنة اللى فاتت كنت ناويه أفكس

بس مياسى جت هنا و قالت لى و ماجى ادينى كلمتين فى العضم هههههههه , فقلت خلاص ... توكلنا على الله .

و ايه فايدته ؟؟ طب أنا ح أقعد أحرق فى دمى و أتناقش و اجادل و فى الأخر ألاقى كائنات أميبية (جايه من أميبه يعنى أى طفيلى ) بيقولى كلام غبى أوى لا يتناسب مع العصر اللى احنا فيه خالص ..معلش ما هى مدونتى و أكلم براحتى مرة من نفسى يعنى ... و مفيش مرة وصلت بالجدال فى حاجة بالذات فى الموضوع ده .... و بعدين قعدت أسأل برده اشمعنى قدرت اقنع الناس بأفكار غريبة كتير و مش عارفه فى ده ؟ و ولا غيرى عارف و اكتشفت برده ان المشكلة فى القالب ... فى حاجات معينة ممكن الناس تاخد وتدى فيها و حاجات تانية بيتولدوا من هنا و بيركب لها القالب من هنا ... منها الكتالوج بتاع الأنثى فى حياتهم .... بطلت اتكلم فى الموضوع ده لأن مش من انصار الشكوى , يعنى اللى بياخد حقى منى وبسكتله يبقى الغلط عندى .... و انا كسارة مش حاسه انى درجة تانية فى حاجة ... بس أبقى كدابة لو قلت أنى كبنت فى المجتمع ده مش حاسه بحاجة .... كفاية أن الواحد بيمشى فى الشارع يتلفت وراه ... دى تسوى كتير بس مش وقتها خالص .... أنا على فكرة مكنتش مرتبة أنى ح اقول اللى فات ده و اللى عارفه أنه مالوش دعوة ببعضه بس أهو كلام ورا بعضه و خلاص ...

نخش بقى فى اللى كنت مرتبه أقوله ..

كنت مرة قاعدة فى لقاء ثقافى محترم جدا , مع ناس بحبهم و بقدرهم جدا , و كنا بناقش حاجة ليها دعوة بأزمة الزواج ... و جه اتنين ولاد باعتبرهم لهذه اللحظة أصدقائى و بحترمهم جدا ... و هم ناس مثقفين بمعنى الكلمة و فيهم واحد وعيه فوق سنه بعشر مرات ........ كان فى واحد من اللى قاعدين بينفى أن يكون دافع الشباب للزواج جنسى بحت لأنهم ممكن يحققوا ده بطرق غير شرعية بعيدا عن الزواج ( بيدافع عن الولاد اهو مقلش حاجة الراجل ) و قام صديقى المثقف قال : يعنى تشترى اللبن و لا تجيب الجاموسة أحسن ؟؟؟ .

رد عليه صديقى التانى اللى برده مثقف و بحترمه و مزعلتش منه برده و قاله :فعلا , يعنى تشترى تذكرة و لا تركب التروماى .....

كان فى التشبيه هنا " الزوجة هى الجاموسة و التروماى " .

الغريب أن الاتنين من أنصار التدقيق المبالغ فيه فى استخدام المصطلحات و الألفاظ و الكلام ... مش بيسبوها تطلع بالله كده ..... يوميها أنا معلقتش .... و لما سالتنى واحدة صاحبتى مندهشه لانى سكت على غير عادتى , قلتلها : لما بدافع فى موضوع زى ده ... ح يحطوا عليا علامة أنى بتاعت حقوق مرأة و معقدة و ساعتها كل ما أحاول أتكلم فى أى موضوع تانى فى الدنيا مش ح يجيب معاهم نتيجة ... لانى ح أبقى عليا علامة معينة ...

معرفش انتوا فهمتونى و لا لأ ؟؟ بس أنا مضايقه من نفسى بسبب تفكيرى ده ... أنا زهقت من الكلام ... و اخترت أركز مع نفسى .... يمكن أنا غلط .... مش عارفه ... و لذلك مش لاقيه حاجة دلوقتى أقولها لأى واحدة شايفه نفسها أنها ليلى ...غير حاجة واحدة اطلعى من ده فى حياتك الشخصية عشان تعرفى تدى للفكرة على مستوى أعلى من غير ما تسحبى عقدك الشخصية معاكى ......... تصالحى مع نفسك أنتى و اجبرى الاخرين على ده ..... و بعدين نبقى نشوف أزمة المجتمع ككل ... كفاية عليكوا كده ..... تصبحوا على خير ... او تصبحوا على مجتمع مفهوش حد درجة تانية سواء كان ست , راجل أو حتى جاموسة ........ ههههههههه

هناك 8 تعليقات:

Che يقول...

بصى يا سارة انا هقولك كلمتين من الاخر و يا رب زيكا ميزعلش منى عشان هقول الكلمتين دول
صدق زيكا لما قال انك بتقولى اللى احنا بنقوله بس بطريقه ادبيه فظيعه و معبره أوى ... او عشان موضوع ليلى ده احنا بنقول اللى انتى بتقوليه بس بطريقه تانيه
تحياتى بجد يا سارة

سارة نجاتى يقول...

تشى
مش فاهم حاجة
زيكا ح يزعل ليه
و انتوا قلتولى كده امتى
و لا انا اللى تايهه ههههههه
بس متقلقش من أى حاجة انت فى حمايتى هههه
و اهم حاجة أننا متفقين و معترفين بوجود المشكلة دى أرضية مشتركة ممكن نبنى عليها أى حاجة

تحياتى انا يا عمرو باشا

Zika يقول...

اعتراااف
بصي يا ستي كنت باتكلم انا وعمرو على طريقتنا في الكتابه
والكلام المش مترتب والسبهلله في اللغه والكتابه بالعاميه
وبعدين انا قلت اني باقر ( مش باقر اوي عيني والله )
باقر بس in a good way ya3ny :D
لان انتي بتكتبي نفس الافكار بس بلغه مثقفه كده وصحفيه يعني
بس

ورغم كده انا بارضه مش فاهم تعليق تشي
.:D

Che يقول...

حسستينى انتى و زيكا انى بقول طلاسم ... بصى يا ستى .. الناس فهمت البوست بتاع زيكا انه هو ضد حريه المرأه و ليلى ... و هيفهمونى برضه كده لما اكتب البوست
فى حين اننا احنا الاتنين مش ضد الحريه دى ، بالعكس احنا معاها
انا عجبنى البوست عشان انتى قلتى اللى احنا بنقوله بس بلغه مثقفه و صحفيه زى ما زيكا قال ... يعنى زيكا و انا شايفين ان الحريه عموما مش هتيجى بالكلام ، انما هتيجى بالفعل ... و هو ده اللى انتى وضحتيه فى البوست ... اننا نغير من نفسنا الاول ، مش نقعد نتكلم و خلاص
و ادينى بأقر مع زيكا اهو ... ههههههه
ضحكت جامد يا زيكا لما كتبت بأقر و بعدين لقيت شكلها وحش قمت مغيرها و فهمتك يا نجم .... ههههه
و بعدين يا سارة انتى مخصمانى ولا ايه ... لا بتعلقى فى البلوج ولا على الفيس بوك ... انا مخاصمك

بحر الالوان يقول...

بصراحة كنت متردد اعلق هذه المرة لاني احيانا بكون من انصار الافكار وحيدة الخلية .... دا غير اني من المدققين في الالفاظ .... بس نعلق وامرنا لله .

1- النقاش اللي ذكرتيه مثال خاص لا يمكن التعميم عليه ... دا غير انه اسلوبه لا يندرج تحت بند النقاش العقلي او البناء....بس بما ان النقاش كان يدور حول الغريزة , فالغريزة بحد ذاتها صادمة وممكن الالفاظ في تناولها يبقي صادمة ايضا....والطرح الحيواني للمسألة يعتبر اعتراف ضمني لصاحب هذا الطرح بانه مجرد فحل كباقي الفحول في البرية... وما اعتقدش انه كان يقصد انه كائن غير عاقل ... ولو يقصد يبقي كده حقق المساواة التي يحلم بها انصارها في لحظات

2- تناول قضية المرأة من قبل النساء ينطلق من الدرجة الادني دائما من جميع التيارات .... حتي اصحاب المذاهب الليبرالية و الديموقراطية لديهم مفهوم التمكين والكوتا والتمييز الايجابي لصالح المرأة ..... ودا اقرار مستمر من المرأة انها ادني من الرجل .... وفكرة تقسيم البشر لادني او اعلي بالشكل الحسابي دا مش موجود غير عند اصحاب الفكر العنصري ...زي هتلر بقي وتابعيه .... لكن النسبية هي التي تحكم العالم فالانسان ادني من البعض في اشياء وارقي في اشياء اخري

3- ايضا دائما الحديث في الجدلية ما بين المرأة والرجل انهما علي ضفتي نهر مختلفتين .... ودا ايضا منطلق خاطئ للتغيير ...لانها يا اما بتفرض منطق الصدام ما بين الطرفين وفي هذا الصدام كلاهما خاسر والقضية ذاتها تصبح خاسره بالتبعية..... يااما يظهر منطق التفاوض لتحقيق مكاسب ....... ولكن بما ان هنالك اقرار ضمني بان الرجل هو الطرف الاقوي فما الذي يجبر القوي ان يتنازل .

4- التاريخ منذ القدم تعامل مع المراة علي انها من ضمن المطلقات ... ياما شر محض او خير محض ....فهي اما ملاك في ثوب ام او شيطان في ثوب عشيقة او زوجة امثال دليلة واعوانها .... فكرة المطلق دي اساسا عملت اشكالية للمراة في تقبلها لذاتها كبشر يصيب ويخطئ .... واشكالية اخري للمجتمع ايضا ... فهي اما ملاك منير او شيطان رجيم .


في النهاية اقصد ان العيب لدينا دائما في الطرح والحكم ...... فالطرح دائما عام والحكم ايضا عام ... بس الحياة مش كده ... النسبية هي الفيصل في المعاملات وعلاقات البشر... هي ملامح اي مجتمع

لهذافكرة كلنا ليلي او فكلنا جمال عبد الناصر .... منطلق خاطئ للتغيير او النقاش او الطرح ........ لانه باختصار لن يؤتي ثماره

وشكرا

Magi Mostafa يقول...

حبيبه قلبى يا ساره
-بس لازم تسيحيلى كده-وبعدين انا طلبت منك بكل رقه :)
انتى عندك حق فى موضوع الطفيليات الى بتيجى تعلق بس الحمد لله الدار امان ومفيش ولا طفيلى جه يعلق
بالنسبه لموضوع انك زهقتى من الكلام فى الموضوع ده غدى مرحله وقتيه وهتعدى وهترجعى تتكلمى فده تانى
وبالنسبه للاخوه بتوع الجاموسه والترماى دول مينفعش يطلق عليهم اصدقاء ولا محترمين معلش يا ساره بس مفيش حد محترم يقول كده ابدا وفى الغالب طالما هما بيقولو كده يبقوا مش بيحترمو اى بنت بيتعاملو معاها والنوع ده مينفعش تعتبريهم اصدقاءك

وبالنسبه لاخر جزء فى البوست فده الكلام الصح والى بحاول انفذه ويارب اقدر
مشاركه جميله منك يا ساره ونأسف للزن والازعاج
ملحوظه اخيره كنت بحاول امسك نفسى من انى اقولها ومعرفتش
الاميبا مش اى طفيلى هو كائن بينتمى لعيله البروتوزوا واسمها العلمى ameoba proteus وهى حره المعيشه وغير متطفله اما الى بتسبب العدوى منها وطفيليه فعلا هى
entameoba histolytica ,entameoba coli
بس كده

micheal يقول...

قلتلك في ردي عليكي بالبوست الأخير عندي
يخرب عقلك يا أروبة..بتعرفي تجيبي كلام كان على طرف لساني
حتعرفي السر المرة دي في البوست الرابع بسبب جملة اتقالتلي من واحد مثقف بخصوص ليلى برضه
!
بيعجبيني ترتيب أفكارك يا كوتكوتة
تحياتي

سارة نجاتى يقول...

بشكر كل الناس اللى علقت

و ح أجى ارد عليكوا فى مدوناتكوا

معلش ع التأخير ....
على أساس انكوا مستنين على نار و كده ههههههههه