الاثنين، 23 فبراير 2009

كل قديم و أى قديم هو الرمز

" و ايه المشكلة لما فيلمى ما يحققش ايرادات , طب ما باب الحديد أول ما تعرض فشل تجاريا " دائما ما نسمع هذا المثل على وجه التحديد من أى مخرج لم يحقق فيلمه الايرادات المرجوة فى محاولة منه لتبرير انخفاض أو انعدام ايرادات أفلامه بشباك التذاكر . ما يستفزنى فى تصريح الفنانين من هذه النوعية شىء واحد فقط يتلخص فى أن " خيبة الأمل راكبة جمل " , لا أكثر و لا أقل . أى أنهم يغفلون أو يتعمدون اغفال نقاط القصور لديهم بحجة أن الجمهور لم يقدر عبقرية الفيلم الموجود بدور العرض مستشهدين بفيلم يعد من علامات السينما المصرية حتى و ان كان الفيلم المتحدث عنه هو لطارق علام. ردود أفعال الكتاب و النقاد و حتى الناس العادية تجاه هذا الكلام هو الغريب فعلا , فبدلا من نقد الفيلم بطريقة موضوعية بناءة فتجد كاتب أو صحفى عروقه منتفضة و الادرينالين عنده فى أعلى معدلاته و يكتب بالبنط العرض " و كيف يجروء المخرج فلان مقارنة فيلمه بباب الحديد ؟" أو سؤال من صحفى ساذج لتامر حسنى "هل تعمدت تقليد عبد الحليم عندما اصطحبت معك العازف فلانى الفلانى ليعزف بالاشتراك مع فرقتك فى حفلة مارينا ؟؟" لا أتذكر اسم العازف الأن و لكنه اعتاد العزف فى حفلات عبد الحليم حافظ و أرتكب خطأ شنيع من وجهه نظرهم أن أشترك فى العزف مع فرقة تامر فى احدى حفلاته . أو عندما يسألون فنانة شابة " هل تقبلين مشاهد الاغراء ؟ فترد بأن قامات السينما المصرية مثل هند رستم و سعاد حسنى كن يقدمن الاغراء لكن فى سياق الدراما "و عندها يحتج أحدهم قائلا :" فلانة الفلانية ترى فى نفسها هند رستم" , أو عندما يدافع أحدهم عن محمد سعد صاحب سلسلة اللمبى و مشتقاتها قائلا : ما اسماعيل يس عمل سلسلة أفلام تتناول نفس الشخصية " و نتيجة لهذا التصريح نتطبق على هذا الشخص حد الردة باعتبار أن اسماعيل يس ورد فى أحد كتب الصحاح مثلا . أو سعد الصغير عندما يهاجمونه لأنه غنى للحمار فيرد قائلا : طب ما شادية غنت للحمار و قالت "شى يا حمارى حاه يا حمارى " فيذهب على اثر هذا الرد الى جهنم و بئس المصير . أتذكر أيضا عندما قال فنان محبوب اشتهر بأدوار ثانية و أحيانا ثالثة عند سؤاله عن من يتمنى أن يكون من الفنان القدامى , فرد بتلقائية و براءة شديدة : رشدى أباظة , فهاج المذيع و الفنانات الاتى كن بصحبته رافضين حتى رغبته فى أن يكون مثل رشدى أباظة . و بعد الهجوم الاعلامى الحاد يأتى الرد من الفنان كالأكلاشيه نافيا فيه أن يكون و العوذ بالله يشبه نفسه بهؤلاء العملاقة العظام موضحا فيه أن قصده من التشبيه هو التوضيح , و أن عندما يقوم مثل يحتذى به مثل اسماعيل يس أو شادية بشىء ما لا مانع لهم اذن من محاولة الاحتذاء به حتى و أن كان انتاجنا الحالى من سينما أو أغانى أضعف فنيا مقارنة بانتاج من سلفونا و يستخلصون فى النهاية قاعدة خطيرة و هى أن قيام الأسلاف فى الكار بشىء ما تنفى عنه صفة الرداءة أو الفشل . و تكون النتيجة هى تحول قامات فنية الى رموز , ثم اصباغ رداء القداسة على هذه الرموز , فلا الفنان يستطيع مقارنة نفسه بأحد النجوم القدامى , و لا ناقد يقبل حتى الاستشهاد بأمثلة من حياة السابقين فان كانت كلا سامية جمال و سمية الخشاب قامتا بدور راقصة فى كباريه فالأولى هى فنانة لها كل احترام و تقدير , و الثانية تنطلق الألسنة و الأقلام تنتقد مظهرها و طريقة رقصها و ابتذالها و هذا طبعا على أساس أن سامية كانت ترقص بالاسدال . و بعيدا عن الوسط الفنى كم منا يجاهر -خاصة ان كان يجالس مجموعة من المثقفين- بأنه لا يجب أم كلثوم مثلا , لن يستطيع القيام بهذا حتى لا يتم اتهمه بانحدار الذوق و الجهل و .. و .. أنا لا احب الاستماع لأم كلثوم , أم كلثوم مملة و هى ليست بنبى حتى أتحرج أن أصفها بالملل , صحيح أشهد لها بقوة الصوت و عبقرية اختيار الكلمات و الألحان و لكنها فى رأيى مملة و تشترك معها فى الملل فايزة أحمد بينما أفضل شادية و فيروز و لن تصدقوا ان قلت لكم "عبد المطلب " أيضا لأنى من عشاق أغنية " ساكن فى حى السيدة " و كذلك أغنيته "يا أهل المحبة " . و لا يعجبنى اسماعيل يس و لا ارى داعى لتلك الهالة المحيطة به , لأنك تستدل على الفنان الكوميدى عندما لا يقول شىء مضحك , و أرى أن أحمد مكى خير مثال على ذلك لأنه الوحيد القادر بين أبناء جيله - بجانب أحمد حلمى- أن يضحكك دون أن يقول أى شىء مضحك فقط من تعبيرات وجهه و خفة ظله الطبيعية و الغير مفتعلة . و بصراحة شديدة فان عبد السلام النابلسى أجدر بهذه المكانة من اسماعيل يس لأنه تنطبق عليه فكرة الكوميديان بالفطرة , و كذلك أعجب بشدة باستيفان روستى و شرفنطح و الريحانى . و لو وودت اختيار رقم واحد بين كل هؤلاء سيكون يوسف بك وهبى فى جميع ادواره الكوميدية لأنه كما قلت كوميديان بالفطرة . و بالنسبة للفنانات فلا وجه للمقارنة بين حنان ترك و هند صبرى من جهه و مريم فخر الدين و زبيدة ثروت من جهه أخرى , فمريم عير مقنعة بالمرة و مثلت لأنها امرأة جميلة و ليس لأن لديها موهبة حقيقية و كذلك زبيدة ,بينما لدى حنان و هند قدرات تمثيلية أكبر بكثير فهن فنانات بالمعنى الفعلى للكلمة , و لكن كم ناقد يجرؤ أن يكتب قائلا هذا ؟؟؟ و كأن بانتساب مريم فخر الدين أو زبيدة ثروت لفترة زمنية مضت أصبحتا جزء من تراثنا , حتى تراثنا - و اللذى على قدر اعتزازنا به -, فيه ما يجب أن نرفضه و ندينه . طبعا من الغباء أن ننفى عن أم كلثوم الدور اللذى لعبته فى تاريخ الأغنية المصرية ,أو عن فايزة تميز صوتها و اللذى تستطيع أن تتعرف عليه وسط الألاف من الأصوات , أو عن قدرة اسماعيل يس العجيبة فى التناغم مع البطل أوالبطلة المشاركين له فى الفيلم أى كانوا و مهما اختلفت مواهبهم . و لكن ليس بالضرورة أن يعجبونى , و لا يجب أن نقدسهم و نتخذ من كل سلوك أو قول قاموا به فى حياتهم نموذج نقيس عليه الفنانين الحاليين بل و نموذج لا يجوز لنا انتقاده أيضا . فهذا المخرج الذى فشل فيلمه فى تحقيق ايرادات تعلل بان الأفلام الجيدة مثل باب الحديد لا تنجح جماهيرا , نرد عليه بنقد مفصل لفيلمه موضحين مناطق القصور به و التى لا تجعل منه فيلم متوسط المستوى حتى . و لا نسأل تامر عن سبب تعامله مع عازف تعامل معه عبدالحليم لأن هذا يندرج تحت بند الهوس , فعبد الحليم لم يأخذ معه طاقم عمله الى القبر حتى يحرم على الأخرين التعامل معهم . و ليس من حقنا مصادرة حق الأخرين فى أن يطمحوا بأن يكونوا مثل رشدى أباظة أو سعاد حسنى , فأنا لى صديقة ترى أنها تشبه "كاميرون دياز " ما المشكلة فى هذا ؟؟ كل منا يرفع معنوياته و يقدر نفسه بالطريقة التى تعجبه , فقد نعترض على اختيار منى زكى لدور سعاد حسنى باعتبار أن سعاد لها روح و حضور مختلفين تماما و لكن ليس لأن سعاد حسنى من أل البيت مثلا فبالتالى لا يجوز أن نصورها فى عمل يتناول حياتها . و بالمناسبة شادية فعلا غنت " شى يا حمارى حه يا حمارى " و كانت الأغنية للحمار , و كذلك قام سعد الصغير بالغناء للحمار " بحبك يا حمار " , و كانت كلا الأغنيتان فى سياق الفيلم , أعلم بالطبع أن ليس لدى سعد لا الصوت و لا الموهبة و لا حتى أغنيات اخرى تشفع له , و لكن لماذا هذا الهجوم المبالغ و الذى وصل لدرجة القضايا و المحاكم مبررين أنه لا يجوز للفنان الغناء للحمار بينما لا تزال الاذاعة حتى الأن تقدم " و الأن مع شادية و أغنية شى يا حمارى " .

هناك 42 تعليقًا:

غير معرف يقول...

عروستي

elsha3er يقول...

سارة انتى بقيتى ناقدة سينمائية ولا اية انا اتفك معاكى ولكن انا بس اعترض معاكى فى البعض من المغنين واللممثلين

ولكن موضوع بجد جديد
بالنسبة للمدونين


تحياتى


احمد الشاعر

سارة نجاتى يقول...

مصرى جدا

مالها عروستك يا معلم ؟؟

سارة نجاتى يقول...

الشاعر

يا ناصرنى يا بلدياتى ههههههه

أهم حاجة زى ما أنت قلت أنك ممكن تتفق و تختلف معايا فى بعض الفنانين أى أنهم ليسوا شىء يجب الاجماع عليه .

تحياتى يا باشا

اقصوصه يقول...

تطبيق لمقولة

اخذته العزة بالاثم

احساس لسه حى يقول...

عزيزتى

موضوعك مهم

شوفى الاعلام دايمن بيدى للفن حجم اكبر من مكانته وتأثيره

فيحسسك ان اغانى عبد الحليم من اسباب النصر او الهزيمه وافلام يوسف شاهين ذات تاثير سباسى

ومع احترامى للاتنين

مشوفتش فنان اهاف السياسين لدرجة انهم حبسوه ولا طبقوا عليه قانون الطوارئ

ولا شوفت حد خرج بهد فليم وعمل مظاهره

انا شايف ان الفن كله بيؤدى فى المجتمع دول ضعيف وبسيط

ترفيهى قبل ما يكون اجتماعى

مفهاش حاجه انك تحبى حتى سعدالصغير اكتر من ام كلثوم

بس لازم تكونى عادله وتعرفى ان ام كلثوم كقيمه اكبر واكثر احترام

واكيد نجوم زمان مش اعظم من دلوقتى لان الدور هو الاساس وساعات بتلاقى دور عالى مع نجم ونفس النجم ردئ فى دور تانى

وزمان التكنيك كان ضعيف فلازم نعزرهم

قولتى ايه كمان موضوعك طويل

شوفتى موضوع الافلام ونجاحها
اكيد ملهوش دعوى بقيمة الفليم فى الموضوع اد ما هو بيعود على شطارة التاجر والمنتج

بس اكيد مهما كانقيمة عاليه ولم ينجح اكيد فيه عيب وتقصير

يعنى افلام عاطف الطيب كانت بتنجح تجاريا وكانت ذات قيمه نوعا ما

اه عن موضوع الاغراء

الفرق مش فى المشاهد المشكله الاكبر فى فكرنا وتدينا

دلوقتى بقه المجتمع اكثر تدينا فاى مشهد بيشوفه باحساس غير زمان

لتيت كتير كفايه

اه انا صححت الخير عند ايمى

قيل ما تعلقى

وكررته تانى بعد ما علقى

احسن الناس مش بتاخد بالها ولازم نتاكد من اى خبر قبل ما نحطه فى موضوع

وقبل ما نعلق عليه

تحياتى

سلام

غير معرف يقول...

مش فاكرة اللعبة بتاعة عروستي؟
يعني مالنا ومال بتوع السيما
غير اني بحب مرفت امين زمان لهطة أشطة

daktara يقول...

بجد موضوع جامد وتحليل رائع
لكي مطلق الحرية في حب او كره من تريدين ومثال ام كلثوم اهنيكي عليه
بجد عجبتني دماغك


شكلها باظت
انظر حولك
د. خالد عزب

غير معرف يقول...

البت اللي اسمها منى زكي ربنا يكرمها زي ما كرم السادات يوم ستة اكتوبر تمانين طلعت في حفلة واعدت تقول لشلاضيمو ربنا ما يحرمن منك
سؤال مين قال لها تتكلم بأسمي انا عالاقل ربنا يقصف عمرها
هي ناسية اما طلعت هيا وجوزها يشحتوا في التلفزيون علشان يدخلوا بنتهم المدرسة الالمانية اما ربنا يخلية ليها شايف شغلة والتعليم كويس كانت عملت كدة
من ساعتها كل ما اشوف خلقتها فى التلفزيون أفتكر راس القرد
اة راس القرد
بلاش قلة ادب هيا راس القرد
ربنا يخليك ليها يا شلاضيمو لحد ما تعرف ان اللة حق
انا عارف من الاول اة جبتها من الكنترول
الفئري فئري من يومة

غير معرف يقول...

سارة ولا حس ولا خبر باينها نزلت تتمشا عالبحر المصيبة تكون عملت زي ما قلت لها وراحت كلت ميت سندوتش وهيا ما تستحملش حد من اسكندرية يدور عليها ويطمنا
الاول لازم عمك حسيب الكورس كدة
وبعدين عمك حسيب توفى يعني فرصتك راحت خليكي في الفوار

غير معرف يقول...

كيف تزوج الرسول

بهدوء شديد بحأول أستجمعه بالعافية بأطلب منك متدخلش هنا و لا تعلق تانى.

أنا لا أناقش اتنين : الخافى هويته و قليل الأدب اللذى لا يراعى قواعد الاختلاف

لو كنت ناقشت بأسلوب لا يحمل اهانات أو تجريح كنت تركت لك مطلق الحرية لتقول ما تريد

أنا معلنة عن اسمى و مكانى الحقيقين و أختلف مع الناس دون اهانات لعقائدهم , و بما أنك لا تفعل ذلك لا اريد أن أرى لك أى تعليق عندى .

23 فبراير, 2009 03:08 م
Blogger مصري جدا يقول...

الان ايها السادة والسيدون
نقطع الارسال لاذتعة بيان هام
ان ان ااااااااااااااان
هاااااااااااااااا
مستعدين ومستعدات
تمهيدا لاعتقالي تم افتتاح مدونتنا المصونة
وحياة رحمة الميتين لكوا أول ما يعتقلوني تنشروا بوست افرجوا عن المعتقل المفجوع
ويا حبذا اذا بعتوا في المعتقل عيش وحلاوة
بلاش ندالة وزودوا الزفر شوية
اسمها اية؟؟؟؟؟؟؟؟
اسمها يا ستي ما انتي
نط في الكوز
وبعديييييييييييييين
شوية أدب وبلاش تريقة
مالة الكوز يعني
حكم

23 فبراير, 2009 04:00 م

غير معرف يقول...

أصلها فاتتك في البوست اللي فات وراكي لحد ما تردي

micheal يقول...

نوستالجيا
هي دي ..احنا عندنا نوستالجيا..ولو رجعتي باله الزمن ..حتلاقي ناس بتقول عبد الحليم ده ايه ..فينك يا عبد الوهاب..عبد الوهاب ده ايه..فينك يا حامولي..وهكذا
:)
مقصر في حقك وبقالي كتيرة مزورتش المدونة بس ظروف
:)
تحياتي يا قمر

سارة نجاتى يقول...

أقصوصة

عندك حق

تحياتى

سارة نجاتى يقول...

احساس لسه حى

طبعا أتفق معك أن مفيش عمل فنى بيعمل نصر أو خسارة
لكن الفن جملة له دور خطير فى تشكيل الوعى بتاع الناس , و بتراكم العديد من الأفكار و القضايا التى يتناولها الفن تساهم فى تغيير العقول التى تسعى بدورها للتغير
ففولتير مثلا ألهم الثورة الفرنسية رغم أنه مات قبل حدوثها
و فيلم أريد حلا استثار قضية الخلع أى نعم كانت المشكلة أصلا قائمة بالطبع.


بخصوص الخبر اللى عند ايمى

أقرأ نص تعليقى تانى - واللى متمسكة بيه لسه - أنا لا سبيت مشايخ السعودية و لا لعنتهم و لا حتى أعتبرت أن هذه الفتوى شىء مسلم بيه .

لكن لازم نفرق يا حسام بين حاجتين :
خبر أنا بشك فى مصدره و فى نصه و دى لأسباب كتيره منها عدم منطقية الخبر و منها عدم معرفتى بالمصدر .

و بين خبر ممكن أقتنع بيه و مش غريب عن الشخص المنسب له بالاضافة لثقة بالمصدر.
الخبر عند ايمى فى الحالة التانية أنا بثق فى أنها مش بتفبرك من جهة , و من جهة أخرى الفتوى دى مش غريبة على مشايخ السعودية .
أنا مش عارفة أنت منحاز لمشايخ السعوديين مع أن معظمهم لو أخدوا اختبارات نفسية ح يتحولوا لعنبر الحالات الحرجة و هم وصمة فى جبين الفقه الاسلامى - مش معنى كده أن احنا عدلين - لكن التاريخ ح يكتب فيهم و ياما ح يكتب .

أنت بتقولى أتأكدى من الخبر , أنا شفت الشيخ اللى بيفتى بحرمانية الميكى ماوس بعينيا ع الهوا , و شفت لما رجع أنكرها تانى .
طب دول مش ناس مريضة ؟؟
و بعدين مفتى السعودية أدعى أن النقاب لا يكفى و أن المرأة المنتقبة و لا تغطى عينيها أثمة
فسارع النساء المنتقبات بما فيهن المصرييات بوضع قماشة على عينيهم و معظمهن بيمشوا و هما مش شايفين قدامهم بسبب هذه الفتوى
أقدر أتفهم سبب أن يلزمهم بالنقاب
و لكن تغطية العيون كمان ؟؟
بدل ما يقول أن الراجل اللى يبص على وحدها مغطية جسمها و وشها كله ماعدا عينيها يبقى مريض نفسيا
لأ يخلى الست هى اللى تمشى حتى الضوء على عينيها تتحرم منه .

و بعض مش مشايخ السعودية دول اللى أفتوا بمنع النساء من قيادة السيارات

( بالنسبة للى مش عارف أحنا بنتكلم على ايه فالموضوع فى مدونة ايمى أساسا للى يحب يتابعه )

يخرب بيتك على طول بتخلينى أرغى كده

بس منور يا حسام و معلش مش كنت عارفة أتابعك الفترة اللى فاتت

سارة نجاتى يقول...

مصرى جدا

عارفاها يا معلم و الله

و بعدين مالها ميرفت أمين ؟؟ دى امرأة عادية جدا

هههههههه
شفت الحلقة دى فى تامر و شوقية لما كانت انجى وجدان و مى كساب بيقولوا لاخمد مكى " دى امرأة عادية جدا "
و هم تقريبا كانوا بيتكلموا عن موديل أوروبية

سارة نجاتى يقول...

دكتره

بأشكرك , بس أنا توقعت ألاقى حد بيشتمنى على مثال أم كلثوم ده بالذات

ههههه

تحياتى

سارة نجاتى يقول...

هههههههههه

نمشيها راس القرد

بس ايه ده انا اول مرة أعرف حوار أنهم طلعوا يشحتوا ع البت ده ؟؟

بس أنا بحب منى و أحمد حلمى الصراحة , أا البوقين لشلاضيمو فمعظم الفنانين بيقولوهم, حاجة فقر

سارة نجاتى يقول...

مصرى جدا

بحر ايه ما خلاص من ساعتها و أنها معايا دولا برد منيل

و بعدين سندوتشات ايه و كوارع ايه يا بابا أنا النهاردة أكلت بسكوت

و الله ما بهزر , بسكوت و أومليت

حاجة كده زى أكلتك أنت و صحابك ههههه

سارة نجاتى يقول...

مصرى جدا

مبروك خالص لأ لازم أدخل أشوفها

و بعدين أنت حاطت نية الاعتقال من الأول لأ و داحل على طمع كمان

أنا ح أجيب لك معايا ساليزون ههههههه و ممكن بيتى فور كمان

سارة نجاتى يقول...

مايكى

و الله المثل ده جه فى دماغى و أنا بكتب البوست بس قلت كفاية رغى كده

و بعدين مقصر ليه يا فندم ؟ و قعدت تقولى أنتى معايا فى فيلمى الجديد و ح أعمل منك نجمة و فيلم سينمائى بطولة مدونى البلوج سبوت

هههههههه

غير معرف يقول...

عادية؟؟؟؟؟؟؟؟؟؟؟؟؟؟
شفتيها في فيلم البحث عن فضيحة؟
عادية جدا
بسكوت وأومليت يعني ألطم؟
مش هقول لك كلت اية
هيا الازمة الاقتصادية جامدة اوي كدة في اسكندرية
ااقول لك على فكرة
خدي ميكروباظ وعالساحل بعد 64 كيلو عند الحمام كدة بلاش برج العرب انا فلت وخلاص
فية واحد بيبيع لحم ضاني اهبدي لك
خروف مشوي لحد ما العشا يجهز
او جدي
او معزة
انا بتاع ساليزون يا مفترية
ولا ااول لك هاتي 3طن ما يخسرش

Blank-Socrate يقول...

موجود
تحياتى
no comment
:)

سارة نجاتى يقول...

مصرى جدا

لا و الله مش حكاية أزمة بس أنا مبحبش أكل يعنى بأكل لما أضطر , و بحب الأكل العبيط , يعنى شوكولاتة , ساليزون كده .هههههههه

أنت بترفع أثقال و لا ايه ؟؟ خروف ح توديه فين بس ؟؟

سارة نجاتى يقول...

بلانك

مش فاهمة حاجة

ايش حال مكنتش قايلة ده مش دفتر حضور و انصراف ؟؟ههههههه

غير معرف يقول...

اة عرفتي منين؟
شايل البلد دي في قلبي فية أكتر من دي اثقال؟
بالنسبة للبوست بعد تفكير عميق جدا
تعرفي لية القديم هو الرمز
لسبب بسيط جدا
أن القديم لن يعود
الحاضر ادينا عايشينة والمستقبل هنعيشة(الى حين) لكن الماضي انتهى ولم يتبقى منة سوى الحنين الية

Zika يقول...

يا بنتي وربنا انتي خساره في ابلد دي
انا بارضك ماقدرش اتكلم علي ام كلثوم
يا اما طبعا ابقي بيئه وجاهل
مع اني مابطيقش استحمل اغنيه فوق ال50 دقيقه تلت تربعها مزيكا قديمه
يا جدعان اعقلوها
ده انا عملت فيلم مدته اربعين دقيقه وزهقت في اخره
ما بالكم في اغنيه
والمثل ده يمشي علي كتير
قعدوا يقولولك مش هييجي زي رشدي اباظه وعمر الشريف دول هما اللي هم والباقي بتنجان
وربنا كرمنا بمحمود عبد العزيز واحمد زكي وعادل امام
قالك بس دول مافيش بعدهم ولا قبلهم
ربك كرم
باحمد حلمي وخالد صالح وخالد الصاوي واحمد عز وغيرهم
وهكذا

بارضك في الاغاني
ام كلثوم دي مالهاش مثيل مش هييجي بعدها
وبعدها جه عبد الحليم
وبعد عبد الحليم
جه ناس كويسه
ومنير وعمرو
وكل يوم فيه جديد
طول ما الكره بتدور لازم يطلع ناس جديده تفرض موهبتها
دي سنة الحياه
وعلي راي المثل
" لو دامت لغيري ماكانتش جاتله"
واحشاني بس مشغول جدا
والله يكرمك تشوفي اللمبه
وبلاش تطلع مضلمه زي كل مره
ها ها ها :P

سارة نجاتى يقول...

مصرى جدا

كلامك مضبوط بس دى ظاهرة غير صحية حتى أنا ساعات بتمنى كنت أعيش فى فترة سابقة من حياة مصر بس عارفة ان الطبيعى المفروض محسش بكده

سارة نجاتى يقول...

زيكا

طول ما الكره بتدور لازم يطلع ناس جديده تفرض موهبتها

الله ينور , لأ هما وقفوا الكرة بعد أم كلثوم ههههههه
و بعدين مشغول فى ايه يا خويا ؟؟ بتشتغل رئيس وزراء و لا ايه ؟؟ههههه

لأ خلاص منور المرة دى ,
و لا النجفة فى الصالة عندنا

غير معرف يقول...

طبعا غير صحية بالمرة
لأن معناها أن الماضي أفضل من الحاضر بمراحل والمستقبل مجهول
الوضع الطبيعي ان لكل فترة مميزات كتير
وعيوب أقل
لكن الوضع الحالي
أن الماضي مائ بالعيوب وان شابة بعض المميزات والحاضر بلا اي مميزات والمستقبل نجفة الصالة فية محروقة بفعل منوفي

احساس لسه حى يقول...

عزيزتى

معلش بقه انتى بتخلينى غصب عنى ارد

ومش غير فولتير كانت هتكون فيه ثوره

والفليم مغيرش قانون واللى غيره حسابات تانيه

نيجى بقه للخير

شوفى ايمى ثقه وزى العسل وهى قالت المصدر الاهرام

هتودينى فى داهيه
بس انا روحت وجبت النص وطلع مش فتوى وكلامه غير كده خالص

وانا مش منحاز لاى حد انا بس بحب لما يكون خبر زى كده نتاكد

ومش معنى انى بدافع عن المنقبات ابقى بايده واطالب بيه

لاننا هنهاجك شخص ودوله كمان وانتى شوفتى التعليقات

وانا شوفت الشيخ اللى اتكلم عن ميكى ماوس ومكنتش فتوى بقتله ولا اى شئ

الراجل كانت بيتكلم عن الرسوم المتحركه والغرب واختيارهم للفار

يعنى الكلام اتحور وبقيت فتوى

وانتى ليه بتقولى انكارها ومتقوليش وضح كلامه اللى اتفهم غلط

وهجى اسبلك لينك بكلامه يا ستى

شوفى انتى قولتى مفتى السعوديه يبقا خلى السعوديين ينقدوه احسن لان كل بلد ليها نظامها واحنا لينا نظامنا برضوا

واكيد ربنا ادانا عقل والتدين درجات

ولكل بلد نظامها يبقا نتكلم عن مفتينا وفتواهم اولى

واللى مقبول عندنا بعضه مرفوض هناك واللى مقبول هناك بعضه مرفوض هنا

وعلى العموم هعمل موضوع فى
انا مش موافق
هتكلم فيه عن الموضوع ده وغيره

توهتبنى

اللى انا جيت اقوله ليكى لازم تتاكدى من اى خبر وليه طلبت كده

لما اعمل البوست فى انا مش موافق هجى ادعوكى تعرفى ليه

لان الموضوع اكبر من كده من فتوى

تحياتى با قمر

سلام

اسماء عوني يقول...

مش صح كده بارضه
انا كنت هاضرب امثله علي الكوره بس مش هاقول يحسن تحدفيني بحاجه
بس كلامك صح
احنا بنبالغ في تمجيد الناس اللي بتموت
شوفي اي حد بيموت بنقول عليه ايه
مع ان الناس وهم عايشين ممكن ماكانوش بيدوهم حقهم
لكن احنا نحب الناس تموت
ونقول الله دول كانوا جامدين موت
زي انا لما اموت كده
الناس هتهتف باسمي
وهيسموا شارع العريش عندنا في الهرم باسم
شارع اسماء عوني
:P

غير معرف يقول...

الفاضلة اسماء عوني
هيسموة ابو ذكري
لية؟
لأنة بيكسب فلوس

Unknown يقول...

الله الله يا ست

بصي يا حبيبة قلبي احنا عايشين في مجتمع يدس التابوهات

و اي قديم تابوه ممنوع الاقتراب منه زي ما اي حد كبير في السن بيفهم احسن من الشباب و مش بيغلط

لولا اختلاف الاذواق لبارت السلع و مش عيب اني محبش ام كلثوم و اشهدلها بقة الصوت و جمال الاداء و الذكاء الفني

و انا من عشاق ورده و مش بسمع لا حليم ولا ام كلثوم الا نادرا

بوست بجد جميل

كلمه لحسام باشا يا عمي الخبر صحيح و انت بس الي مش قادر تقتنع ان رجل دين سعودي يغلط

تحياااااتي

سارة نجاتى يقول...

مصرى جدا

مش عارفة أعلق عندك خالص , أنا بحاول أكتب و مش بيكتب معايا , فى ايه عندك ؟؟

سارة نجاتى يقول...

احساس لسه حى

حاضر يا حسام

منور

سارة نجاتى يقول...

أسماء عونى

بعد الشر يا سمسم

بس حوار الناس تموت عشان نقدرها ده حقيقى فعلا , و ساعات ناس بتعيش زى فان جوخ واخده بالجزمة و ينهى حياته بأن يدفن فى مقابر الصدقات و دلوقتى شوفى لوحه معروضة فين , حاجة تقهر

منور يا جميل

سارة نجاتى يقول...

أه يا سمسم , حتى لو قلتى أمثلة عن الكورة مش ح أفهم فقولى براحتك هههههههه

سارة نجاتى يقول...

ايمى

فعلا على رأى مايكى ما قال نوستالجيا

أنا كنت عايزه اقول أنى مش بسمع وردة بس خفت منك ههههههه

بس وضحى حوار الخبر ده أكتر بليييز

سلام يا باشا

غير معرف يقول...

من قلت من الاول ما بفهمش في الكميوتر قلتو احلبة حلبتة نزل عصير قصب ذنبي اية
واللة ما عملت لة حاجة
قعد يقول لي نكست ااقول ماشي لحد ما قال خلاص قلت لة اشطة
رحت لمايكل يظبطة ما رضيش
بقول اية مش يمكن أمن الدولة
ههههههههههههههههههههههههههههههههههههههه

سارة نجاتى يقول...

مصرى جدا

طب حاول تسأل حد يعرف فى ايه ؟؟

عايزه أقولك أنا عبيطة خالص فى الكمبيوتر , بتاعت نيكست برده ههههههه

غير معرف يقول...

滿...........................