الثلاثاء، 10 فبراير 2009

عندما تطلب الطوارىء بمصر

لا تغامر و تطلب أى خدمة طوارىء بمصر مهما كانت الظروف , صدقنى ستتعامل أنت مع الموقف أفضل اذا كنت مجهز نفسك و بيتك جيدا لمواجهة الطوارىء . عشية أمس اتصلت أحدى صديقات العائلة بنا و تطلب منا طلب بوليس النجدة لأنها لا تعرف الرقم , لأن مجموعة من البلطجية يصرون على اقتحام شقتها عنوة , و لتطمئن نفسها ظلت ممسكة بالسماعة فى يدها على الرغم من أنها كانت لا تتحدث الى , و انهمكت فى "الشرشحة " للبلطجية و أنا على الخط الأخر أرجوها تغلق السماعة حتى استطيع أن اطلب البوليس , لم تستجب لى لأنها لم تسمعنى فاضطررت للصراخ : يا بنتى اقفلى عاوزة أتنيل اطلب البوليس . اقفلت الخط و لاحظت فجأة أننى لا اعرف رقم بوليس النجدة أيضا - أحفظ فقط رقم خدمة الطوارىء بأمريكا من الأفلام و هو 911- ففتحت الأجندة و المفترض أن يكون بأى أجندة أرقام الطوارىء فى الصفحة الأولى و وجدت ثلاث أرقام لخدمة الشرطة بالاسكندرية و ليس بينهم 122 حتى لا تسألونى لماذا لم تطلبى 122 . الرقم الأول غير موجود بالخدمة و الثانى غير موجود بالخدمة و الثالث مرفوع مؤقتا من الخدمة - يعنى لو فى قاتل كان قتل و سرق و غسل الجثة - فاتصلت أمى بقريبة لنا أخصائية بلاغات بسبب عدد المرات التى تعرضت فيها للمشاجرات مع الجيران و السرقات و أفتت أن الرقم هو 122. أتصلت ب122 , و وجدت أن رقم الطوارىء مشغول على أساس أنى أطلب السينما و ليس رقم خدمة طوارىء , و ظل الرقم مشغول خمس دقائق ,بعدها أجابنى رجل بارد الأعصاب قلت له : عايزة أبلغ عن ناس عايزه تقتحم شقة . - فين ؟ - 14 شارع كذا بحى كذا , ( توقعت أن يقول لى حالا سنكون عندك و لكنه قال ) - قوليلى الوصفة كده , - وصفة ايه ؟؟ ,- فرد مستنكرا : وصفة البيت , و لأننى خائبة جدا فى وصف الطرق أعطيت التليفون لماما و التى قالت له : تدخل من شارع أبوقير , - أيوه و بعدين يعنى , و أخذت أمى تصف له كما لو كان سيأتينا من الهند فى زيارته الأولى لمصر و و انتهى الأمر بأنها أشارت له بوجود محل سندويتشات كبدة بمحاذاه البيت و الذى يجاوره محل الملابس الداخلية . احقاقا للحق , لم يتأخر المخبر فى الوصول و لكن كان وقت كاف للبلطجية لأن يملوا من فشلهم فى اقتحام الشقة و يقررون العزوف عن الجريمة من أنفسهم . ذكرتنى هذه الواقعة بواقعتين أخرتين : أولا : يوم أتصلت بخدمة طوارىء الغاز بسبب رائحة تسرب غاز شديدة منبعثة من مطبخ الشقة الملاصقة لنا , فى البداية سألنا المستأجرين بالشقة عما اذا كانوا يشمون رائحة الغاز أيضا و كانوا غير مصريين من البدو , فقالت لنا الحجة والدتهم بسعادة غامرة و ابتسامة عريضة : متسرب أه , نطبخون احنا نطبخون . هى تقريبا طنت أننا نسالها عن رائحة الأكل أو أنها اعتبرت أن تسرب هذا شىء جيد , و ارجح الظن الثانى لأن قبلها بيومين سالتنى بالأسانسير : تجرين ؟؟ , فظهرت البلاهة على وجهى و رددت : نعم ؟؟ ,فأعادت لى السؤال : تجرين ؟؟ , فاستنتجت أنه كان قصدها : تقرأين , فقلت لها بتلقائية : أه طبعا , فنادت على أختها و زوجه ابنها لتخبرهما بأنى " تجرين " و احتفت بى حفاوة بالغة . المهم , اتصلت بخدمة الغاز , فرد على رجل أهدأ من هذا الذى يرد على بلاغات الشرطة : أيوه , - عايزه ابلغ عن تسرب غاز , - طب شوية كده معايا , و تركنى منتظرة ما يقارب عشر دقائق , ثم عاد مرة أخرى : - أيوه قولى حضرتك , - اقول ايه ؟ ما أنا قلت فى ريحة تسرب غاز عود كبريت واحد ممكن يولع العمارة كلها , - فى شقتك ؟ - لأ فى الشقة اللى جانبى , - طالما اللى جنبك أنتوا مالكوا ؟ - مالنا ازاى ما المطبخين فى نفس الجهة , - طب شوية كده . و سمعته يبارك لزميله لعودته بالسلامة من شهر العسل و بعد قليل عاد مجددا : - أيوه أؤمرى , - ياللهوى , أنت مش مركز معايا ليه ؟؟ , - طب و ليه الناس اللى فى الشقة اللى جنبكوا مش هما اللى بلغوا , - ما قلت مستأجرين و شكلهم مش فاهمين حاجة , - طيب دقيقة واحدة , ثم أحضر لى زميله ليستكمل معى الحديث الشيق و بدأ بكلمة : أيوه , - رددت بغلاسة :أيوه, - أيوه يا فندم , - ما أنا لسه حاكيه لزميلك (و أعدت له القصة و وعدنى بارسال عمال كشف على الغاز فى خلال ساعة ) , مر اليوم و لم يأت أحد , أتصلت بهم بعد الظهر , فرد على الرجل بتاع أيوه مرة أخرى : - أنا كنت بلغت عن تسرب غاز و مفيش حد جه , - معلش أصلهم بيتغدوا دلوقتى . و ايمانا منا بأهمية النظام الغذائى لعمال الغاز و الحرص على عدم الاخلال به , أحضر أبى عامل على حسابه الشخصى و أتضح فيما بعد أن الأمر كان خطير فعلا . الواقعة الثانية شاهدتها بالتليفزيون ببرنامج أمريكى اسمه " الانسايدر " و تخصصه تقديم الأخبار التافهة , و لكنه اعتبر أن خبر انقاذ حياة كلب بولاية جيرسى أمر يستحق أن يتصدر جميع الأخبار الأخرى , فنجح فريق الانقاذ بمساعدة ثلاث رجال مطافىء مدربين تدريب خاص فى انقاذ كلب عمره بضعة أشهر كان على الوشك السقوط من على سطح عمارة سكنية , و كان الكلب لا يستطيع الانسحاب للوراء لوجود أسلاك كهربائية , و لاحظت سيدة تعانى من فارغ الوقت الكلب المزنوق و أتصلت بخدمة الطوارىء و اللذين أرسلوا على الفور فريق انقاذ ليلحق الكلب من الموت المحقق . ساعتها قلت : أه , مش كنتى خلقتنى كلب يا ربى .

هناك 26 تعليقًا:

Unknown يقول...

انتي ازاي الشيطان يلعب في عقلك الدنيئه و تطلبي البوليس او الغاز بقي ده كلام

هي الناس دي فاضيه للكلام الفارغ ده

الشعب بقي مدلع زياده عن اللزوم ليه منعتمدش علي نفسنا و كل واحد يحل مشاكله بنفسه مش نتعب الحكومه الرشيده معانا و مؤسات الدوله

دي سياسه حكيمه علشان الحكومه تعلم الشعب يعتمد علي نفسه في كل حاجه

احساس لسه حى يقول...

عزيزتى

كلب امريكانى واتكى عليها امريكانى

احسن لو مصرى انتى عارفه مصيرك ساعتها هيكون ايه


شوفى لازم تقتنعى بشى بخصوص الحقوق والخدمات فى مصر

احنا بلد عالم ثالث

يعنى لما تقرنى حال بلدنا قرنيها بالكاميرون ولا نيجيريا وهايتى
ويمكن الصومال كمان

مالنا ومال امريكا واوروبا ولا حتى الخليج

دى مصر وده واقعنا اللى عيشينه

والمستخبى اكتر بكتير

تحياتى

سلام

Blank-Socrate يقول...

عارفه اسوء حاجه هنا فى مصر ان الانسان رخيص
على فكرة السبب احنا
بكل بساطه طوارىء الشرطه او الغاز اللى رد عليك انسان مصرى زينا مطحون
لكن للاسف الكل اصابه برودةو سلبيه
1300 انسان غرقوا بدم بارد من صاحب العبارة
و الدوله و القضاء
المرة الجايه نادى على الجيران لاى سبب و بلاش تكلمى الطوارىء
او سيبيلى كومنت و لما هاشوف هانجدك
:)

prince4ever يقول...

لا يا ساره انتي متحامله زياده ع الحكومه بشكل عام و قطاع الطوارئ فيها بشكل خاص
انا مثلا اهو... بلغت الشرطه مرتين لما اتعرضت للسرقه...مره سرقة الفيات من تحت البيت و مره سرقة حاجات م الشقه... و ما شاء الله الحاجات لسه مرجعتش و بيدوروا عليها - برده لازم ندي للاخوه الافاضل وقتهم خاصة ان الموضوع ده حصل قريب اوي...مبقالوش غير اربع سنين بس-...انما الفيات احنا اللي رجعناها بنفسنا...وده يحسب للشرطه..ما بفضل مجهوداتها الجباره نمت قدرة الشعب ع البحث و انه يجيب حقه بإيده... يعني اللي بيحصل ده لحكمة مش إهمال منهم..و لا إيه
بس دايما مواضيعك بتعجبني :)
سلام

aMr saYed يقول...

يا لهوي تطلبي اتلبوليس اكيد بتهزري طيب مش تقوليلي كنت حكتلك موصيبتي
كان عندنا خناقة في الشارع تحتينا سنج و مطاوي و شوم و ازايز بيبس واتجننت اني اروح ابلغ البوليس روحت يا بنتي ابلغ البوليس لاقيت واحد رد عليا ايوا قولتله بصوت متوتر في خناقة تحت و هيكسروا العربيات و هتولع قالي اسمك ايه قولتله قالي طيب رقم تليفونك قولتله نفسي اعرف بيتحقق من شخصيتي ليه هو انا مقفوش في كمين عدت ربع ساعة محدش جه اتصلت تاني قالي اصلهم في مامورية ككان نفسي اقوله كلمة ساعتها بتتقال في المواقف ديه بس مكنش ينفع المهم اتضررنا اننا ننزل ندافع عن حتتنا بالشوم و ندافع عن الناس الي بتتضرب لغاية لما جوم بعد اما فضينا الخناقة بحوالي ساعة و نص
ده غير موقف تاني للاسعاف معاي اتصلنا بيها عشان مرات اخويا جت بعد ساعتين قولت لو بتموت كان زمنها ماتت و دفناها والاسعاف مشيت في جنازتها
بس ليه ميبقاش عندنا رقم لغرفة العمليات وهما يتصرفوا في الباقي على فكرة رقم 911 ده على مستوى دول كتير منها دول الخليج بس تقريبا لسه مجاش عندنا

كفايىة بقا ده انتي رغاية اوي

غير معرف يقول...

الشرطة والشعب في خدمةههههههههههههههه
شلاضيمو

Blank-Socrate يقول...

you ought to see it
http://www.facebook.com/ext/share.php?sid=51800152439&h=B1XSB&u=3tRns
:)

prince4ever يقول...

سلام يا ساره
هههههههه
ماشي يا ستي
بس مفهمتش يعني...الموضوع حلو و لا لأ... و تشبيه حميده عجبك و لا لأ...معلش اصلي فهمي على أدي حبتين..
:)
بس بجد كل يوم دماغك بتبهرني
سلام يا برنسيس

أسوور يقول...

بالفعل انا لما طلبت النجدة لقيت اسطوانة بتقولى ان الخطوط مشغولة الآن .. وكل مرة تتعاد الأسطوانة كنت بأموت فى جلدى اكتر والعيال الصيع دول بيلفوا حوالية بالعربية ومحاصرينى

بعد ما ردت النجدة .. بصراحة ما اتأخروش قوى لكن انا حسيت كأن سنة عدت.. بعد ما ردوا اخدوا العنوان وقالوا هنبلغ شرطة المقطم

بعد دقائق اتصل بى الضابط ملازم اول/مهاب الشبوكشى من شرطة المقطم وظل معى على التليفون حتى وصل الى المكان فى دقائق معدودة .. ليقبض على الولد اللى اتنيل وعاكسنى

تحية لهذا الضابط .. دلوقتى بس عرفت انه مش دة المعتاد يعنى من الشرطة

تحياتى

Don_Lochy يقول...

يا جماعه العيب مش في الكل العيب في افراد
احنا كمصريين مش مهم عندنا غير حاجتين:: المرتب والاجازه
لكن واجبنا بنقوم بيه صح ولا غلط مش مهم
اكيد النظام غلط لأن المفروض يكون فيه حد بيراقب ويحاسب
لكن المشكله ان اللي بيراقب ويحاسب برضه بيتبع نفس ايدولوجية المرتب والاجازه
يبقي مشكله افراد من الدرجه الاولي ولا لا؟؟
العيب مش بس عيب حكومه 000العيب عيب شعب
لان الموظف اللي مش عاجبك ده ماعملش اكتر من موظف الكليه اللي بتطلبي منه ختم علي شهاده ويقولك فوتي علينا بكره 00لمجرد انه بيتكلم مع زميله في موضوع مهم ومش لسه هيقوم يروح للمدير اللي معاه الختم عشان سيادتك
والمشكله انه يرجع يشتكي من قله مرتبه
وحياه ابوكو قبل مانبص للمرتب نبص احنا ايه انتاجنا
ساعتها هانرتاح

أنا حر يقول...

طوارئ ايه وكلام فارغ ايه المصريين دول مش عاجبهم العجب
انت معنكمش تليفزيون تشوفيه منه ان فيه ناس قعدوا يستغيثوا فعرض البحر وسابوهم يموتوا
المفروض خبرتك تزيد ولما تحبي تجيبي الدنيا كلها في غمضة عين قولي ان الشقة اللي جمبكم فيها ناس ارهابيين او ناس من المعارضة بيشتموا على الريس اوعدك هيكونوا عندك قبل ما تقفلي السماعة
على فكرة مش المفروض اننا نتمنى اننا كنا اتخلقنا كلاب هو المفروض اننا نتمنى اننا كنا اتولدنا في بلاد بني ادمين
تحياتي

اسماء عوني يقول...

يابنتي اولا كنتبي اتصلتي بيا انا الاسبوع اللي فات كنت في اسكندريه كنت جيت شديت البلطجيه دول من شعرهم ورمتهم عالارض وقعدت اديهم بالبونيات في وشهم وبالرجل في بطنهم لحد ما كانوا هيتاسفولك
بس كده
انا بصراحه ماجربتش هنا اكلم الطوارئ دول الحمد لله بس لما كنت في امريكا كنت يا ستي في نيو اورليانز كانت البيت ( هم عندهم كل بيت مستقل بذاته كده فيلل عقبال عندك هع هعع ) المهم البيت ده كان طالع منه دخان والواد اللي ساكن ماكانش موجود قوم ايه ؟
قاللي ايه اللي حصل
قلتله كذا كذا .. قاللي ماتخرجيش من شقتك واقفلي المحابس ( حلوه المحابس دي ) وفظرف خمس دقايق كان الايوا ايواا ايواااا
ودخل اتنني كده من صنف ارنولد كسروا الباب اتاري البارد كان حاطط حاجه في المايكرويف وناسيها والبتاع بتاع الانذار ماصفرش
وتوته توته فرغت الحدوته
اكيد ملتوته ماترديش عليا انا بس مقضياها لف من الصبح ومانمتش
سلام

micheal يقول...

انتي الغلطانة واهي ايمي اديتلك بما فيه الكفاية
:)
ده الفرق بينا وبينهم يا سارة
احنا معندناش ثقافة حقوق الانسان واحترام ادميته وتقديس الروح اللي ربنا خلقها بينما هم بالنسبة لهم إنفاذ كلب هي إنقاذ لروح كائن حي ولذلك أصبحت لا اندهش عندما ينظرون إلينا ككائنات أقل
من الاخر احنا اللي عملنا كده في روحنا
تحياتي

غير معرف يقول...

انتي ساكتة لية؟
اوعي تكوني زملكاوية

Zika يقول...

ساره
الاول ايه اخبار النور عندك
طب كده
طب شوفيه كده
المهم انتي يا بنتي ايه اللي خبطك في نافوخك وقاللك تتصلي بالطوارئ دي
الناس دي بتبقي قاعده علي الكرسي بتاعها بقالهم سنين يعني ممكن مايكونش لا قام دخل الحمام ولا خرج ولا شاف الهوا
الناس دي بتتعب عشان ترتاح وبترتاح من كتر الراحه
تيجي انتي قال عشان ريحة غاز تتصل بيهم وتقلق منامهم
استغفر الله العظيم
وبعدين مالها ريحة الغاز يعني يا ساره
دي بتعمل دماغ بوتاجازات . ماقولكيش

سارة نجاتى يقول...

معلش يا شباب الكمبيوتر عندى بايظ و يظهر الراجل بتاع شركة الكمبيوتر طمع فيه و مش عايزين يرجعوه , فمش عارفة أعمل أى حاجة

ع السريع كده

ايمى

و الله أن اللى غلطانة فعلا يا جزرة

احساس لسه حى

عندك حق يا حسام كلب أمريكانى , بس ايه عالم تالت ده , احنا المفروض نقارن نفسنا بماليزيا اللى بدأنا معاها و سبقتنا بمراحل , احنا يا عينى و صلنا لمرحلة بنقارن نفسنا فيها بالصومال هههههه

سارة نجاتى يقول...

Blank

أبعت لك كومنت ؟؟ و الله ممكن تيجى أسرع من بتاع الغاز اللى مجاش أصلا هههههههه

برنس فور ايفر

و الله بعد اللى أنت قلته ده شكلى بستهبل بجد , الحق عليهم فعلا بترفع من قدراتكو فعلا و بعدين هم ح يدور على كل حاجة و لا ايه ؟؟ تضيع عربيتك دى غلطتك قطعا هههههه

سارة نجاتى يقول...

عمرو تعلب

بالنسبة للاسعاف اللى جت بعد ساعتين فأنا سمعت أنهم بيبقوا طالعين يجيبوا فطار الصبح و عقبال ما يأكلوا و يحبسوا بشاى بيبدأوا يعملوا مشاورهم

أما البوليس فأنت طلعت فدائى يا حبيبى دول بيبقوا خايفين على نفسهم فبيعملوا زى الأفلام العربى و ييجوا بعد العركة ما تحصل عشان يتعوروش ههههه



مصرى جدا

هههههههه معاك ع الخط يا معلم

سارة نجاتى يقول...

بلانك

مش بيفتح معايا يا باشا بس ح أحاول تانى لما أجيب الجهاز الثمين بتاعى

برنس

أنا رديت عندك يا جميل , و أنت اللى دماغ يا سيدى , لو دى صورتك و انت صغير فتقريبا أنت شبه أخويا جدا

سارة نجاتى يقول...

أسوور

أنا بجد مش مصدقة أنت ازاى فضلت واقفة كل ده , يعنى أكيد الموضوع تجاوز الربع ساعة , و بعدين هما مش خافوا و جريوا ليه و أنتى بتطلبى البوليس ؟؟ كان الله فى عونك دى تلاقيها عدت كأنها ستة فعلا


دون لوتشى

لو ابنك يا حج دون لوتشى اللى فى ابتدائية زوغ من المدرسة و نط من ع السور , ح تعمل ايه ؟؟ بعد ما تهزأوا و تقول لأمه أنتى السبب بتربيتك البايظة , ح تروح المدرسة تهزأ عم محى الفراش و مستر محروس مدرس الألعاب اللى طنش العيال و سابهم ينطوا و المدير اللى عارف بفوضى مستر محروس و عم محى الفراش و ساكت ,و لو تكرر الموضوع ح تروح لمدير المنطقة التعليمية ؟؟ , لكن ابنك زوغ ليه من الأساس ؟؟

سارة نجاتى يقول...

أنا حر

مالك مكتئب ليه يا باشا ؟؟
طب أنت عارف أن اللى بتقولوا ده صح لأن بره بيعلموا البنات أن لو واحدة تعرضت منهم للاغتصاب متقعدش تقول " ياللهوى يا أما , أو يا سافل يا ابن الكلب " انما تقول حريقة و هى بتصرخ لأن كل الناس ح تتحرك و تخاف لا يكون البيت بيولع بيهم


سمسم

الميكرويف ؟؟ أه مش كنت خلقتنى مايكرويف يا ربى هههههههه

سارة نجاتى يقول...

مايكل

فعلا احنا ممكن يتنظرنا باعتبارنا كائنات أقل , مرة واحد بيحكيلى أنه كان فى ألمانيا و معاه زميله مصرى , زميله ده جه كلب ناحيته و قعد يلحس فى جزمته كعادة أى كلب يعنى , أم ماسكه ضربه و حدفه بعيد , جه صاحب الكلب و كان ألمانى فقاله كلمة واحدة: أنت مصرى مش كده ؟؟ قاله عرفت منين , قاله عشان ضربت الكلب


مصرى جدا

ههههههههه , لأ الله ماليش فى الكورة خالص

سارة نجاتى يقول...

اللمبة فيليبس , سورى قصدى زيكا

ههههه , يارتنى كنت قلتلك قبلها كنت عرفت موضوع دماغ البوتاجازات ده و دخلت أشم مع الحاجة البدوية جوا

سارة نجاتى يقول...

سورى يا جماعة لو فى حد ماردتش , أنا تقريبا رديت كلوا , و قعدت أقول ع السريع يخرب بيتى رغاية برده
و بحأول أتابع مدونات على قد ما بينفع

منورين يا شباب كلكوا

safa7_karmooz يقول...

انتى طيبة انتى وعيلتك عشان كلمتوا الطوارىء

يا حجه صلى عاللى يشفع فيكى

مرة خناقة كالعادة فى منطقتنا بس المرة دى كان ضرب نار بكلم الراجل وبكل برود بعد ما بلغت بيقولى الا ايه الدوشة اللى عندكوا دى؟؟

سيبك

قدامك حل من واحد

يا تبقى اجنبية

يا تبقى خواجاية :D

سارة نجاتى يقول...

سفاح كرموز


يظهر اللى ماسك الخدمة فى الاسكندرية كلها هو نفس البنى أدم ههههههه