الأربعاء، 28 يناير 2009

عندما تدون فى أخر الكراسة

جاءتنى من بضعة أيام صديقتى من أولى اعدادى "ساجى" و ذكرتنى بأيام المدرسة و فصل 3/4 و شلة 3/4 ( كنا طوال عمرنا فى الفصل الرابع و الأخير ) , و بالمدرسين و بالفصول و بالمقالب التى كنا نعدها لبعض و كيف كنا نتعامل مع الحصص المملة . كنا عندما نريد قصر المشاكل مع المدرسات نكتب لبعض , فمثلا القصة المقررة علينا فى اللغة العربية فى الاعدادية غلب الرصاص على سواد سطورها و أصبحت عندما تفتحها للوهلة الأولى تجد "يعنى أنتى متأكده أنها كانت بتحور عليكى ؟" و تجد رد ساجى " أه طبعا ده حتى كان باين على وشها " و أكيد هذا ليس حوار بين أبطال القصة , و لكنها مقتطفات من مسلسل النميمة اليومية و الحكايات و صراحة كان عندنا حق فليس هناك ما هو أسوأ من حصة اللغة العربية ,و بين الحين و الأخر تجد خطوط أناس لا نعرفهم و لكنهم بالتأكيد كانوا بعض زملائنا يشاركونا الاحساس بالملل من الحصة و خاصة حصة ميس ايمان مدرسة اللغة العربية. "ساجى" كانت مثل كاتب المحكمة , لما ينقطع ارسال الاستقبال عندها تماما , تخرج أى كراسة و تكتب فى أخرها زجل أو خواطر , فاجئتنى من يومين عندما قالت لى أنها لازلت محتفظة بهم . استوليت على بعض أوراقها باعتبارها وثائق تاريخية عظيمة , قلت لها : ح أعمل بيهم مصلحة و أجيبهم تانى ,و سمحت لى الرقابة بنشر بعضهم بعد حذف بعض المشاهد : ( النهارده يوم مش لذيذ خالص , احنا عاملين زى المعارضة , الشلة التانية هى الحكومة , و البنات اللى فى النص و اللى ملهمش رأى فى اى حاجة هما الشعب ). *وصف لخناقة مع شلة الأعداء فى أولى ثانوى من منظور سياسى . (مفيش أى حاجة نعملها دخلنا الفصل و بدأت الحصة كانت عربى , و حصة العربى بتاعت ميس "نوم " هى حصة النوم بتاعتنا , بتعرف تعمل تنويم مغناطيسى , و على فكرة أنا أنصح كل واحد بيواجه مشكلة فى النوم يحضر حصة واحدة معاها و ح ينام فى ثوانى ) * ساجى و لحظة استمتاع بحصة اللغة العربية فى الثالث الاعدادى . (كل مدرس له مجموعة من جواسيسه اللى بيعرف بيها أخر الأخبار عشان يدخل نفسه فى حياتنا طوال الوقت عشان يحسوا أنهم عارفين يخنقونا و يقفلوا علينا كويس أوى , طبعا كنتيجة لده ميس نوم عرفت الخناقة راحت جايه واخدانا على جنب و قعدت تنصح فينا و تقول ان البنت المحترمة المؤدبة متردش على الناس و ح تعرف تاخد حقها لما تحرج الناس بأدبها , واضح أنها لسه عايشة فى أيام الزمن الجميل ) * و أحب أضيف أنى سأحرجها بأدبى و أقول " و ماله ؟؟" ملحوظة : و ماله ؟ كود خاص بشلتنا و يستحيل نكشفه لأى شخص أبدا نياهاهاهاها . (أول ما نزلنا البريك لقينا فى وشنا شلة الأعداء , هو تقريبا كل واحدة غيرانة من التانية فى الشلة دى بس عاملين نفسهم حبايب و بيطلعوا نرفزتهم فى الشلة المنافسة ليهم , راحوا باصيين بقرف و يقولوا بصوت عالى ايه البياءة دى ؟ , احنا مسكتناش طبعا عشان حقنا و منظرنا , راحت قايلة واحدة مننا : مش عارفة ليه الناس عماله تتكلم عن البياءة و مش شايفين نفسهم فى المراية عاملين ازاى ما يروحوا يبصوا فى المراية أحسن , ساعتها طبعا الجو ولع و المدرسة وقفت تتفرج ع اللى بيحصل , و الشلة المنافسة بانت على حقيقتها و اتفتحت وصلات الردح على أصولها , و جات مدرسة متخلفة تزعق , ح تكون مين غير الشهيرة "ماتريكس " ) *عذرا , و لكنها مدرسة ثانوية بنات على الطبيعة . (مستر التاريخ فاكر نفسه دمه خفيف , طبعا هو مش بيطيق فصلنا لأننا بنستنفخه ( شايفينه نفيخ يعنى ) و بنرفزه , و رغم كل نفخ, ه فى بنتين فى شلتى معجبين بيه , أنا و سارة طلعنا بعد الحصة بنتمشى ما بين الفصول شوية لحد ما يجى المدرس , أول ما حطينا رجلينا بره الفصل لقينا ميس "كبة " فى وشنا ) * تشاهدون حاليا "ساجى" عندما لا تفوت التفاصيل , بالمناسبة هى تكتب كما تتكلم مع الناس , و تتكلم بنفس الطريقة من اعدادى لكلية , كان ينقصنا حركة يديها و التى كنا نطلق عليها (عودونى ) نسبة لأغنية عمرو دياب حتى تكتمل الصورة . و لم تسجل خواطرها فقط , و لكن أشعار مستر عبد المعطى أيضا وهو رجل أزهرى يتحدث العربية الفصحى فى أى موقف على طريقة (و أين العروس ؟) و كان لى معزة خاصة فى قلبه لدرجة أنه ارتجل شعرا عنى , فهو اذا غضب يهجو و اذا فرح - و هذا نادرا - يمدح , يقول الفرزدق أقصد مستر عبد المعطى : لقد مللت من سارة / و كلما مشيت فى شارع أو حارة / غضبت و حزنت و كان قلبى امتلأ بالشرارة / فهى تؤلمنى و كأنها المرارة / و قد أمرضتنى و ارتفعت الحرارة / و أدعو أن أستطيع قول اتركينى بصريح العبارة ) . لماذا كل هذا التحامل على ؟؟ لا أعرف , صحيح كان بعد دخوله الفصل بدقائق تنتشر رائحة البرتقال فى المكان و ذلك لأنى كنت أجلس فى أخر ديسك أقشر و أكل و الفصل كله يشاركنى أيضا , أو ربما لأننى سألته مرة اذا كان معه سكين لكى اقشر التفاحة ( كانت حصته سوق خضار و فاكهه) ,أو لأنى قلت له مرة " تبقى يا مفترى معاك تلت شهادات و بتحضر ماجستير و مراتك مش سايبها تاخد الثانوية " .و لكن كل هذه ليست مبررات كافية لهجائى . صحيح لم يمر فترة طويلة على هذه المراحل و خاصة الثانوية , و لكنى أشعر أنها بعيدة جدا و أعوز هذا لضعف ذاكرتى , فعندما قرأت الكثير من ما دونته صديقتى اكتشفت أنى كنت نسيت الكثير من التفاصيل و الأمور التى تصورت وقتها أننى لن أنساها أبدا , هى قد لا تبدو ذات اهمية كبيرة و لم نكن نحن أيضا من أصحاب المغامرات المدرسية و لكنها تعنى لى الكثير .

هناك 48 تعليقًا:

غير معرف يقول...
أزال المؤلف هذا التعليق.
Zika يقول...

ايييييييييييييييه دنيا
بقا انا عمال ادخل كل شويه عشان ابقي اول تعليق والراجل اللي زي العسل اللي فوق ده ياخده مني ههههههههههههههه

فكرتيني بايام المدرسه كنا مدرسه ولاد وبنات لحد تالته اعدادي وبعدين المدرسه قلبت ولاد بس في ثانوي وكانت ايام جميله اوي كنا خدنا راحتنا شويه علي ما كانت عليه المدرسه ايام اعدادي ماكناش بنعرف ناخد راتحنا ولا نهزا بعض وكان كل واحد فينا مركز مع الموزه اللي في الديسك اللي قدامه او اللي وراه او اللي جمبه اييييييييييييه
اياااااام

اه صحيح هي وماله ؟ دي هي بارضه اللي دماغي ولا انا غلطان ههههههههههههههههههه

حلوه القصيده اللي الاستاذ كاتبها فيكي دي معبره بصراحه
..
شوفي اللمبه كده ايه اخبارها .. النور يعني:P:P:P:P:P:P:P

غير معرف يقول...

ولا تزعل يا عم زيكا اديك بقيت الاول اهة
احنا على ايامنا كمدارس اولاد ما كناش بندون في كراسات كنا بندون في خلق الشباب اه كل فصل لة عصابة والعصابة دي تخوض غمار المعارك مع الفصول الاخرى غارات بقا وضرب وتلطيش
حتي اللعب كنا بنلعب لعبة اسمها بلتك مصغر مصارعة اولها النافسين يكون حوارهم كالاتي
بلتك بلتكين
علقة علقتين
وعينك ما تشوف الا البنيات والشلاليت وما شابهه
طفولة سعيدة جدا
دة بينا وبين بعض
الاساتذة بقا
يا نهار ابيض
كنا ولاد اخر ادب الحقيقة
ولا لسانا طويل ولا ادينا اطول ولا حاجة
والمدرس لو جدع ورفدنا من عمايلنا السودة لا مانع من انة يخرج يلاقي عربيتة من غير عجل
او بقت مدونة تشمل هجاء لسيادتة ووالدية لسابع جد بواسطة مسامير على الدهان بتاع العربية
او ما يلاقيش فيها اي نوع من الزجاج لزوم التهوية طبعا مدرسينا بقا وراحتهم شغلنا الشاغل
ويا سلام لو المراقب اصتقصدنا في الامتحان وسقطنا عادي جدا
كان يا ولداة ياكل علقة ما اخدهاش حرامي جزم في جامع
ايييييييية ايام

سارة نجاتى يقول...

ايه يا عم الحانوتى هههههه

عايزة أقولك على قد ما أنا ضد الفصل فى التعليم بس له مميزاته , فعلا الواحد بياخد راحته

بقه القصيدة معبرة , ماشى يا عم زيكا ده بدل ما تكتبوا قصيدة مضادة تدافعوا بيها عنى

و لا مضلم المرة دى يا خفيف هههه

سارة نجاتى يقول...

ههههههههههههه

أنت موتنى ضحك , بتدونوا فى وشهم ؟؟ لا مدارس البنات أخرهم ردح . طب تصدق نفسى كنت اتخانق بالدراع و الزعيق , أصلى مليش فى تلقيح الكلام بتاع بنات ثانوى ده

ابقى نور كده على طول يا باشا

أحساس لسه حى...كلام من جوه روح لكل روح يقول...

عزيزتى

شوفى ذكريات الدراسة وبالذات الطفولة المدرسيه مليانه كم كبير من البراءة

واكيد ذكريات كل منا مليان بلاوى بس طبعا الولاد بلاويهم اكتر واكبر


واستاذ اللغة العربيه الازهرى ده فكرنى بالافلام اللى دايمن يكون استاذ اللغة العربيه ازهرى

نيجى بقه للمهم وموضوعك السابق

مردتيش على

انتى لما بتنقد حاجات فى مصر وانا عارف ان نيتها سليمة مش بشكك فى كده

ليه مش بتنقدى حاجات فى نفس المجال اللى بتنقد فيه بس فى الغرب او فرنسا مثلا

شوفى الحق ليه وشين واكيد
لكل انسان نظرة للاشياء غير التانى والاذواق

واكيد لما تسالى حد فى الستينات مش هيقولك على بلاوى عملها او حضرها ايامها محدش بيفضح نفسه

بس اقرى روايات بتتكلم عن ايامها وهتعرفى الانحلال كان اد ايه

وبلاش روايات اقرى حوداث الستينيات هتلاقى بشاعات وغرائب

واكيد نوعية الحوادث اختلفت والطباع بس الانسان فى كل زمان جواه الخير والشر

وهيفضل كده لاخر الزمان


تحياتى

سلام

اخر حاجه

سارة نجاتى يقول...

حسام

والله رديت يا حسام , راجع تعليقى و أنت ح تلقيه كله رد على الجملة دى تحديدا , عارف لو عملت اللى أنت بتقوله ده ح نوصل لايه , ح نبقى زى اللى بيقول لوحد : أنت نصاب , فالتانى يرد عليه و يقول : و أنت حرامى
طب ما فى النهاية النصاب ح يفضل نصاب و الحرامى ح يفضل حرامى , ح نحل مشاكلنا ازاى طول ما بندور فى عيوب بعض ؟ و بعدين احنا خيبتنا ملهاش حل , أنت عاوز تتطلعنا أحسن من فرنسا كمان ؟؟ فى معظم الجوانب احنا أسوأ .
نسب التحرش عندنا أعلى بكتيير
ضمير الناس من سنتين غير دلوقتى , غير كمان سنتين جايين , الحالة فى تدهور
و بعدين فعلا الوضع فى الستينات من الناحية اللى هى بتقولها كانت أفضل من غير روايات و لا غيره , أنا سألت ناس كتير من اللى عاصروا الفترة أصل احنا مش بنتكلم عن عصر المماليك , الموضوع لسه قريب , ده من عشر سنين الوضع كان أفضل و ده بناء على تقارير الحكومة مش كلامى أنا.
و الصراحة أنا من طبعى لما حد ينقد حاجة موجودة فعلا عندى , أجرى أصلحها و بعدين أفرد له الملاية .
عيوب المجتمكع الفرنسى تضر الفرد نفسه فى الأغلب (يعنى هما بيشربه نبيذ كل يوم , طب و أنا مالى طالما بييجى شغله فى ميعاده و بنى ادم منتج خلاص) , لكن العيوب السابق ذكرها فى التدوينة يعم أثارها علينا كلنا .

بس ده كان كل الموضوع يا معلم

تحياتى و منور

احساس لسه حى يقول...

عزيزتى

يعنىلازم اعلف باسم المدونه علشان تخشيها

بس مجدلتيش كتير المره دى وعلقتى بالمختصر


شوفى انتى اللى بتقوليه صح احنا لازم نصلح من نفسنا وملناس دعوى بغيرنا


بس مش هتخسرى حاجه لما تفرشى الملايه لانسان عمال ينقد فيكى ويعيب

وهو مليان اخطاء

لازم تديه على دماغه بكام حاجه توريله عيوبه وتفوقيه من دور عايشه

وما بقولك محدش هيقولك انا كنت بشرب ومقضيها يعنى لماغ تساليه

والستينيات كانت مليان فضايح


واقرى كتاب لمصطفى محود ناسى اسمه تقريبا الف قصة حب هحاول اجيب اسمه

هتلاقى الستينيات كانت فيها انحلال كبير

او شوفى مصدر مش من سؤال انسان مصدر مش هيتحرج يقولك على فضايحه

ومش شرب الخمر بس عيوب المجتمع الفرنسى او الغرب

انا شايف فيهم مليون عيب

وعيوب ليها دعوى بالاخلاق والاسرة والدين و...........كتير

واظن ده شئ مش شخصى

اتمنى مكنش بتقل وبغلس بجدالى معاكى

تحياتى

سلام

Tamer Diab يقول...

بوست جميل وفكرني ببلاوي الثانوي كلها :)

بجد كنا دمنا فقر وكنا عايزين الحرق علي سبيل التسلية للي يحب يعني

كان عندي مدرس الصوت عنده سابق الصورة
والله مش تهريج
يعني مثلا

أقعد هنا يا حمااااااااار
وبعدها يشاور بأيده علي المكان ووشه يبتدي يبان عليه النرفزة

ومدرس تاني بتاع رياضة
طول السنة بيقولنا أكتب يا حبيبي انت وهو
أ ب ج مثلث
كل المسائل كده
لحد ما جه في أمتحان الشهر وقالنا
أكتب يا حبيبي انت وهو
س ص ع مثلث
قلتله مخدنهاش دي يا مستر ;)

Zika يقول...

مصري جدا
ربنا يخليك يا ريس
ايه الواجب الجامد ده بس
شكرا شكرا

سارة نجاتى يقول...

احساس لسه حى

بقه انا اللى بجادل ؟؟ ماشى يا عم حسام ,
أنا لو فاكرة أن قصدها تريقة أو تصيد عيوب كنت فرشتلها الملاية و اللحاف , لكن أنا فاهمة قصدها دى عاشت فى مصر أكتر من ما عاشت فى بلدها و جوزها و أولادها و صحابها و جيرانها مصريين , دى بتقول على نفسها مصرية فرنسية مش العكس , لكن هى كأوروبية النشأه مش قادرة تستوعب أنها تبقى فى بلدها و مش قادرة تؤثر ى مجريات الأمور, دى من أكتر الناس الايجابية اللى شفتها فى حياتى و بتحاول تغير الوضع على قد ما تقدر . لو كنت تعرفها كنت فهمت قصدى .

و ليك عليا المرة الجاية أعور لها عين و بوكس فى بطنها و شالوط محترم ههههههه

و لا شك أن وضع المصريين فى تدهور , أنت بتقبض كام فى شهر يا حسام ؟ دى مرتبات بنى أدميين ؟؟ طب أبوك صرف عليكوا ازاى ؟؟ مش كانت الأسعار أرحم من كده . لأ فى فرق طبعا

سلام يا باشا و لا متقل و لا أى حاجة

سارة نجاتى يقول...

تامر دياب

ده أنت كنت مسخرة برده أهو , يا بختكوا مدارس الولاد بتبقى مهيسة أكتر , ده أنا مرة بنات من الفصل (اللى هم بيقعدوا قدام دول و بيعملوا الواجب ,عارفهم ؟) لموا بعض و قالوا : عايز نكلمك فى موضوع , قلت : خير , قالوا لى : أنا مش معجبين بأسلوب ردك على ميس منال
عيال عبيطة و الله ههههههه
منور يا تامر , اسمك فنى على فكرة

سارة نجاتى يقول...

زيكا

انت جاى تضرب صحبية مع الزباين هنا ؟؟ امشى ياض من هنا شوف شغلك يلا هههه


مصرى جدا

بحاول أدخل على مدونتك , بس هو تقريبا مفيش مدونة , صح ؟؟ و لا أنا اللى عندى مشكلة

غير معرف يقول...

انتي اللي مليون باشا يا باشا
تسأليني عن المدونة
حاولت وفشلت مش عارف ازاي اعمل مدونة دة حتى اسم مصري جدا جة كدة معايا بالصدفة
اصل بعيد عنك العبد للة اخر جهل في الكمبيوتر
اة لو كان قابلني -الكمبيوتر-ايام ثانوي كنت وريتة مئامة
احنا على ايامنا كان كبيرنا دة في اواخر ايام الجامعة كمان الاتاري
تعرفوة؟
استكمالا لايام الدراسة
القاعدة كانت التزويغ والاستثناء اننا نحضر في المدرسة يعني لو الدراسة 150يوم نزوغ 140 ونحضر الباقي هتقولي والغياب ااول لسياستك كانوا ما بصدقوا يغورونا ويعفونا من الغياب واذا حصل لا قدر اللة وزودنا في الحضور شوية لضيق ذات اليد المدرسين كانوا يتبرعوا لنا علشان ننكشح من وشهم
مش بقول لك كنا ملايكة
اما عن نقطة الانطلاق كانت المدرسة الصبح ندخل العيال والمدرسين المدرسة ونطمن عليهم ثم نفطر عند عم حسيب طعمية بس مش اي طعمية بعيد عنك معجونة بمية نار ومنها الي السينما او داون تاون
مكان في وسط البلد واحيانا الهرم اما كنا نسرق العربية من الوالد
طبعا هتسأليني والبنات محلهم اية من الاعراب
ااول لسياستك
زي مبارك بالظبط نسمع عنهم لكن لا تعامل مباشر معاهم
لحد الجامعة وهنا الرقابة تقطع لان تحولنا بقدرة قادر من اثبات القوة العضلية لاثبات حاجات تانية
ما تحكيلنا يا ست البنات عن الامتحانات كنتي بتعملي فيها اية
وهنحكي لك بدورنا وعلى رأي يوسف بية وهبي يا لهول ما ستقرأينة
حاولت ادور عندي على صور لاصحاب ثانوي تصدقي ما لقيتش الظاهر كنا فاكرينها هتدوم


زيكا انتا بس تأمر يا باشا

Tamer Nabil Moussa يقول...

بوست رائع

واجمل ما فية هو الرجوع الى الماضى حيث الافكار التى لاتنسى


تحياتى

Zika يقول...

اوك يا فندم
انت يابني ياللي هناك
شوف حساب ترابيزه 9
الحساااب يا اساتذه

Tamer Diab يقول...

عارفهم بتوع الواجب دول
لا وكانوا بيجيبوا كشاكيل معاهم وكتب !!!
والله
انا فترة الثانوي بالنسبة ليا عاملة زي الحقبة السوداء في التاريخ
او ممكن عصور الظلام الوسطي

بالنسبة لأسمي الفني أنا للأسف مش بطيقة تامر ده بس يلا.
وكفاية غزل عشان بتكسف يا سارة
كمان أمور يا سارة كفاية
ودمي خفيف كمان .. يا لهوي يا بنتي كفاية
هتغر في نفسي كده

روابط يقول...

ذكريات الطفولة والدراسة خصوصا لا تمحى, وتطل براسها من الذاكرة وقتما يحلو لها...... حياتى يا بتوع تالتة رابع

safa7_karmooz يقول...

هههههههههههههههههههههههه

بجد تحفة بجد الذكريات دى ...

كطراسة الشات المدرسية

للافس انا مكنتش بقعد فى اى حصة فى اى يوم اكتر من ربع ساعه

سعنى بحضر اول ربع ساعه من الحصة الاولى وكنت بتوكل على الله ^_^ واشوف مصالحى فى مكان تانى

سارة نجاتى يقول...

مصرى جدا

على فكرة أنا كمان خايبة أوى فى الكمبيوتر ده أنا بكتب تعليقات و بمسحها معرفش امتى و ازاى , و خيبتى تقيلة
بس أهو كنتوا مؤدبين مع البنات , و الله احنا كمان كنا بنسمع عن الولاد و بنشوفهم , لكن لو الناظرة شافت بنت بتكلم ولد قصاد باب المدرسة , بتاخدها المكتب و تكلم أهلها بالتليفون ,و تفرج عليها المدرسة تهزيىء ,و تذنبها يوم كامل شفت بقه البهدلة اللى كنا بنشوفها ؟؟ههههه
و بعدين كل يوم كنتوا بتاكلوا طعمية و لا ايه ؟؟ لأ احنا كنا بنأكل بسكوت هههه , و لا مابهزر , بسكوت , ممكن حاجة ساقعة , الطعمية مش كتير أوى , دلع بنات بقه .
أما الغشئ فأنا طول عمرى مهيسة فى الفصل , لكان كنت بأروح أذاكر , يعنى الحمد لله لجنة ثانوية عامة كلها جايبة مجاميع على ايدى .
لكن فى مرة حاولت أغش و كتبت المعلومات على ايدى من بليل و اتمسحت الصبح و أنا بغسل ايدى و وشى , وبعدين رحت اللجنة مش لقيتها .
أنا لسه طبعا عندى الصور بس يا رب تلاقى بتوعك , بجد بنبسط أوى لما بتفرج على بتوعى .
شكلى ح أعمل بوست عن أكثر أساليب الغش تطورا فى امتحاناتنا .

تحياتى و منور و الله

سارة نجاتى يقول...

تامر نبيل

شكرا يا عم تامر , و الله شكلى من كتر الرجوع لورا ح اعمل ضفرتين خلاص

منور

سارة نجاتى يقول...

زيكا

شكلى ح أخصم لك يومين

نياهاهاها

سارة نجاتى يقول...

تامر دياب

أيوه على طول كنت بتخنق منهم العيال دى , مش ينفع تبقى شاطر من غير ما تقعد على حجر المدرسين ؟؟

و بعدين تعالى هنا أنت ح تجيب لى تهمة و لا ايه ؟ فين أمور و دمك خفيف دى أنت شكلك ما صدقت يا عينى ههههههه

ماشى يا تموره ( بس بطريقة شوقية المرة دى بشرشحة يعنى )

سارة نجاتى يقول...

حازم سويلم

أحلى ذكريات بتاعت المدراس , و طبعا تلتة رابع أجدع ناس و الله

منور دايما

سارة نجاتى يقول...

سفاح كرموز

ياللهوى قهرتونى على حالة أنا كنت بأقعد اليوم كله , التزويغ عندى كان فى الفصل اللى جنبنا ههههههه

و بعدين ايه مصالحك دى ؟؟ رجل أعمالو لا ايه ؟هههههههه

تحياتى خالص و ابقى نورنى دايما

غير معرف يقول...

بسكوت يا نهار ابيض دة كان العيال عملوا فينا عمايل
هيا الطعمية بمية النار
تعرفي وانا في الجامعة حبيت اعمل جو مع الشلة اة شلة مش عصابة اصلها بقت مختلطة اكلتهم عند عمك حسيب وعاديكي علياللي جرا العيال من 8صباحا ل 10 مساءا بيلفوا في الشوارع ويقولوا مش عارفين نبطل انتا اكلتنا اية ايييية هيا مرة واحدة ما فيش غيرها وانا طبعا عملت بأصلي ساعتين وخلعت اهاليهم يتكلموا الولاد فين؟ وانا اش عرفني انا اديتهم المفيد وبالسلامة
بس الحقيقة ولا عمرهم هيجيلهم تسمم ابدا
بسكوت لية دة كلام
دالشاب اما كان ياكل شيبسي وسميط نتريق علية شهر بحالة وتريقة اية تقيييييييييييييييييييييييلة

فتــافيت (رحاب الخضري) يقول...

حلو البوست
وفكرتيني بايام الدراسة .. ياااااااااااه عمر تاني برضه.. وخاصة ايام ثانوي كنا مجننين المدرسيين ومعظمهم كان بيخاف يدخل لنا في الحصص الاحتياطي والله بيخاف بجد
ايام حلوة ومش هاترجع تاني ولا هاعرف اعمل زي ماكنت بعمل تاني
ربنا يسعد ايامك زي مافكرتيني باسعد ايام حياتي
تقبلي مروري الاول على مدونتك
وان شاء الله نبقى على تواصل عطووول
سلام يا قمر

Unknown يقول...

ههههههههههههههههههههههههههههههه
والله انتي عسل يا ساره فكرتيني بايام الاجرام في المدرسه كنت كارثه متحركه و طول عمري شكلي هادي و بريء فاعمل المصيبه التمام و اي حد تاني يلبسها و انا ملاك قاعد ماليش دعوه

بس بجد انتي شكلك كنتي كارثه صغننه و حاليا كارثه كبيره

وينكى يقول...

يااااااااااااااااه
على ايام ثانوى ومغامرات ثانوى
انا بقى مانسيتش اى حاجه
انا ماكنتش شقيه قوى ولا حاجه
بس كنت مشهورة برجلى اللى على طول فى الجبس
:)
وماتسأليش على السبب

اسماء عوني يقول...

ياااه يا ساره
فين ايام ميس نضاره ومستر كشكول والعيال الولاد بتوع مدرستنا يتخانقوا مع الولاد بتوع المدرسه التانيه اللي جمبينا واحنا نقول يااي ولاد مش مؤدبين
ونرجع عالفصل نلعب ثبت صنم
ايام ما البنات كلها تقف تلعبلي طايره وهوكي وانا بلعب كوره مع الولاد
ياااااه
فكرتيني بالذي مضي
ماحدش بياكلها بالساهل

سارة نجاتى يقول...

مصرى جدا


شكلك اسم على مسمى التعصب للطعمية دليل على أنك مصرى أصيل على فكرة أنا أفضلها عن الفول , و لحد أولى اعدادى مش كنت برضى أكل الفول لحد ما قرايبى سحبوا منى الجنسية المصرية بس دلوقتى خلاص بقينا بناكل أى حاجة

بس حرام عليك اللى عملتوا فيهم ده ههههههههه

سارة نجاتى يقول...

فتافيت

أمال أنا مش عايزه أشتغل فى التدريس ليه ؟اللى عملناه فى المدرسين ح يطلع علينا والله هههه
نورنى دايما و ح نتواصل ان شاء الله

سارة نجاتى يقول...

ايمى أم الكوارث

باين عليكى أنك مصيبة برده أنا مش متخيلة لو أنا و أنتى فصل كنا عملنا ايه , بس أنتى سوسة أنا بقه بتكشف من قبل ما أعمل حاجة ههههههه

منورة يا جزرة

سارة نجاتى يقول...

وينكى

طب طالما رجلك على طول فى الجبس أكيد كنتى شقية, أوعى تكونى من الناس اللى كانت بتقع و هى قاعدة فى مكانها دى ههههههه

منورة يا باشا

سارة نجاتى يقول...

سمسم

ده الكورة مبكرة فى جيناتك بقه , و يظهر أن الخناق مع عيال المدارس التانية ماركة مسجلة لجميع المراحل الدراسية , بس أنا كنت بألم العيال و أعلمهم تايكونودو , وأنا أصلا كنت بأخد كل علقة و علقة فى النادى بس عاملة عليهم شاطرة ههههههه

منوره يا قمر

وينكى يقول...

مين ده اللى بيقع وهو قاعد
كفايه تعرفى ان اول جبس ركبته كان عشان مسكت فرع النخله حبيت اعمل فيها طرزان ونطيت من فوق سور الفرانده
الخاين ماستحملش وزنى
:q

micheal يقول...

هههههههههههههههه..وأنا اللي كنت فاكر أن شغل العصابات ده كان عندنا بس

علي فكرة اسلوبك في الكتابة هايل ودمه خفيف مووز يا سارة
ابقي كملي لينا باقي مغامراتك لاني واثق أن فيه حاجات لذيذة كتير
تحياتي

سارة نجاتى يقول...

وينكى

و تقولى لى مش كنت شقية , نخلة يا مفترية يا جرأتك

سارة نجاتى يقول...

مايكى

لأ شغل العصابات ده فى كل حته يا باشا ,بس عصابتنا على دلع شوية , و بما أن الاقبال متزايد شكلى ح أعمل جزء تانى و خلاص

سلام يا جميل

Blank-Socrate يقول...

ايام و ذكريات جميله جدا
انا فعلا محتفظ بحاجات كتير من الايام دى و باعتبرها ثروة قوميه لى طبعا :)

غير معرف يقول...

يارب تستفادى من مدونتى دى هاتفيدك جدا

http://noureldens.maktoobblog.com/

أنا حر يقول...

رجعتينا تاني لايام الدراسة الجميلة اللي بنشتاقليها كتير
على فكرة انا الكشاكيل بتاعتي كان بيبقى فيها مكتوب التعليقات دي اكتر من الدروس نفسها
:)
تحياتي

سارة نجاتى يقول...

Blank-Socrate

كويس أنك لسه محتفظ بيهم , الحاجات دى ح تبات قيمتها بعد خمسين سنة لو عيشنا و كان لينا عمر

تحياتى

سارة نجاتى يقول...

غير معرف

أشكرك على اللينك

تحياتى

سارة نجاتى يقول...

بالضبط كده , بتعيشى من الأول , بس زمن مين ده اللى نضحك عليه ؟؟ ده مفترى ههههههه

تحياتى

سارة نجاتى يقول...

أنا حر

أنت كمان كراريسك مليانة تعليقات , ده يظهر أن محدش كان بيركز فى البلد دى ههههههه

تحياتى و منورين كلكوا

elsha3er يقول...

ازيك يا سارة

جميل اوى انك تفتكرى ايام المدرسة والشقاوة وحلوة اوى حكاية بأعتبارها وثائق تاريخية عجبتنى اوى الجملة دى

صحيح انتى فى البوست اللى فات بتقوليلى على غير عادتى انى ما اعترضتش على كلامك هل يعنى انا لما بعترض على حاجة بيكون همى ان انا اعترض عليكى وخلاص لا طبعا لما تبقى حاجة قريبة من تفكيرى ومبدئى عادى طبعا

وعلى فكرة انا مش صحفى فى جريدة لا يعنى مبدأى مش خلقنا لنعترض

تحياتى

احمد الشاعر

غير معرف يقول...

滿...........................