الأربعاء، 21 يناير 2009

عندما تسألنى مدام "سيلفى "

منذ أن كنت بالابتدائية و أنا أسعى لتعلم الفرنسية بشكل جاد بعيدا عن المنهج الدراسى المكرر سنة بعد سنة , و كنت كلما بدأت مع أحد المراكز التعليمية , أتوقف بعد بضع مستويات لظروف الدراسة , فأنسى اللغة ثم أبدأ من جديد و هكذا . الأن أتعلم اللغة الفرنسية مع سيدة فرنسية تعيش فى مصر من خمس و عشرين سنة , جاءت الى مصر و هى فى منتصف العشرينات من عمرها , متزوجة مهندس مصرى ,و اسمها مدام سيلفى و الحمد لله حاليا بفضلها أجيد العربى المكسر اجادة تامة ... على الرغم من أن مدام "سيلفى" تعيش بمصر كل هذه الفترة , الا أنها لا تزال مندهشة , لا أجد و صف لحالتها سوى "الاندهاش " , و مع أننا نحن السكان "جتتنا نحست ", الا أنها نجحت بجدارة فى أن تجعلنى أشاركها دهشتها أيضا , فهى كامرأة أوروبية تتعجب من الكثير الذى نعتبره نحن من المسلمات , و أحيانا تسألنى أسئلة أعجز بفرنسيتى الاجابة عنها -حيث أن أخرى je suis malade بتاعت داليدا - , و أعجز بعاميتى عن تفسيرها لنفسى أصلا. أول ما أدخل مكتبها تضبط الساعة و تضعها أمامى- تريد أن تقول باختصار الساعتان هما الساعتان- , غالبا ما يتركز عملها على محاولة اكسابى أقصى قدر ممكن من المفردات و بما أن لغتها العربية ضعيفة جدا , فأحيانا ما تستغلنى لمساعدتها فى نطق الكلمة بالعربية بعد أن تعطينى مرادفها بالفرنسية , كتبت لى مرة أن متسول أو تعنى mendiant , و لأنها ناصحة الى حد ما , سألتنى عن المعنى بالعربية , فقلت لها : شحات , أعادت الكلمة لنفسها و هى حالمة - لا أعلم لماذا - : شهات , سكتت قليلا ثم صاحت : أوووووه , أنا معايا واهد ( اللى هى واحد ) فى الشوغل ( تقصد الشغل ) اسمه شحات , ايه ده ؟؟ ثم ضحكت متندرة : يعنى هو اسمه معناه monsieur mendiant , ههههههه , طب ليه أهله يعملوا فيه كده؟؟ ما يسموه "ملك "مثلا ؟؟ كلام مدام سيلفى منطقى جدا فلا يوجد على أسماء الناس جمرك , و حاولت أن أشرح لها بمزيج من الفرنسية و العربية أن أهله يظنون أنه بهذه الطريقة سيعيش طويلا , و لدرء الحسد عنه و لكنها لم تتفهم , فقلت لها: طب ما احنا عندنا عائلة كبيرة فى مصر اسمها "الحيوان " , حدقت فى طويلا ففهمت أنها لا تعرف معنى حيوان , فقلت لها موضحة : animal , أصباتها نوبة ضحك هيستيرى و لما أفاقت منها قالت : يعنى هو اسمه monsieur animal , ههههههه , طب ليه كده ؟. مرة أخرى كنا نقرأ من مجلة فرنسية , و بها صورة لفستان أنيق ترتديه موديل فرنسية فقالت لى :ليه كل الرجاله بقوا يبوصوا يبوصوا يبوصوا ؟ , قلت لها : ازاى , ازاى , ازاى؟؟؟ , قالت :" أنالما جيت هنا من خمسة و عشغين سنة , كنت بألبس فستان زى ده , و كان نادرا ما كان راجل يبوص ( اللى هى يبص ) و مش كان فى محجبات , فى ايه دلوقتى , ليه كله عمال يتفرج على بعضه ؟؟ ," شاركتها الاستنكار و الامتعاض من الرجال " اللى بيبوصوا " , فمشكلة الرجل الشرقى أنه يظن أن المرأة الأنيقة تغادر من بيتهم كل صباح قاصدة اثارة اعجابه , و ترتدى ألوان زاهية لتثير اعجابه أيضا , و ليس لسبب بسيط و لو فكرتم مع ستجدونه منطقى جدا , و هو أن جمال المظهر الخارجى يعكس عليك داخليا راحة نفسية جميلة , و نحن لسنا فى عصر الابتذال , لأن جدتك كان ترتدى المينى جيب فى الخمسينات و الستيتنات , و لم يكن هناك رجل "بيبوص ". و استكمالا لحديثنا عن الأناقة و الموضة , و كما تعلمون أن الفرنسييات هن أكثر سيدات العالم أناقة , فمدام سيلفى تعتبر أنيقة بالنسبة لقريناتها من نفس المرحلة العمرية فسألتنى سؤال أخر - أشعر أنها حصة من سيربح المليون من كثرة الأسئلة مع الفارق أننى الدافع لا هى - : " ليه يا ساغة ( اللى هو سارة يعنى ) البنات فى مصر بقى شكلهم وهش ( وحش يعنى ) كده ؟؟ ", أنا بينى و بين نفسى قلت (أأأه لعبت بعداد عمرك ), ثم أنقذت نفسها قائلة : "بس أنتى يا ساغة شكلك جميل خالص tu es tres jolie , الشكل ده مش ييجى مصرى أبدا , ممكن ييجى اسبانيول أو يونانى" . أنا بينى و بين نفسى (أه , كده ممكن يطلع عليكى صبح ) , سألتها : ماذا تقصدين بشكلهم "وحش "؟؟ قالت :يعنى لبسهم وحش جدا , ايه الألوان دى ؟؟ و ألاقى الجيب بتاعهم فيها طينه من الأرض , و حاطين ميك أب تقيل بالنهار و سايح على وشهم , و لابسين كذا طرحة فوق بعض , ليه كده ؟؟ " . شرحت لها بقدر الامكان أثر المستوى الاقتصادى و الاجتماعى على المظهر العام للناس , و على ذوقهم الشخصى . و بلا شك تلاحظون ارتفاع مستوى الجمال بين الأسر الغنية سواء فى البنات أو الأولاد عن هؤلاء من بنى الطبقات الفقيرة . فى الحصة الأخيرة فتحت لى الباب و هى غاضبة جدا - و نصيحة منى اتق شر الفرنسى اذا غضب - فدخلت بهدوء و أجلستنى فى مكاننا المعتاد و بادرتنى بسؤال كالمعتاد أيضا : "أنتوا فى ايه ؟؟ مفيش حد عنده ضمير خلاص , ليه الناس اللى مش عندها ضمير كتير كده ؟؟", مدام سيلفى تعمل كمدرسة لغة فرنسية , و دائما ما كانت تشكو من انعدام ضمير المدير و كذلك زملائها من المدرسين و أن معظمهم يهتم بالدروس الخصوصية على حساب مجهوده فى الفصل ,و المدير لا يهتم باصلاح الوضع , كما أنها تشتكى من ضعف مستوى المدرسين و قلة كفائتهم , فتقول لى " تصوغى يا ساغة أن مدغس بيكتب للأولاد ع التابلوه par accident بالشكل ده paraxidant . قلت : لا مالوش حق برده , تضيف : و لما أصلح له , مش يرضى يصلحها و يسيب الأولاد يتعلموا des fautes ( الأخطاء يعنى ) , ليه يا ساغة مفيش ضمير كتير كده ؟؟ . ومع أن ساغة تشغل منصب هى المحتسب الذى يأمر بالمعروف و ينهى عن المنكر , الا أنها لا تجد اجابة حقيقية على سؤال مدام سيلفى,و لو أننى اعتقد أن الفقر أيضا يجرد الناس من أخلاقهم , فالفقر و الأخلاق لا يجتمعان فى أغلب الأحوال الا فى مسلسلات رمضان . اتصلت بها مرة لتحديد موعد معها و كان قبل عيد الكاثوليك بيوم واحد , لم أكن أعلم أنها كاثوليكية , فاجابتنى فى التليفون : عندى عيد يا ساغة , اعتذرت لها , و حددت معها موعد بعد العيد بأسبوع .انتهزت هى فى تلك الحصة أول فرصة و نحن نقرأ "الأهرام أبدو" كالعادة و قالت لى : " الدين ده هاجة tres personnel , اهنا مواطنين نعيش مع بعض فى بلد واهد متساويين يهمنا أنت بتنتج ايه ؟؟ بتعمل ايه ؟؟ مش دينك ايه ؟؟ دينك ده ربنا يحاسبك عليه, و عشان كده revolution عندنا شعارها مساواة و اخاء ,أنا مش عارفة أنتوا ليه بتحبوا تسألوا الناس عن دينهم ؟؟ , معايا زميلتى أرثوذكس فى المدرسة , فضلت ذوق معايا لحد ما عرفت أنى كاتوليك , و قالت لى" لأ ده غلط كبير" , و كنت فى محل هدوم من يومين تصدقى أن هتى البياعة لما لقتنى بتكلم عربى مكسر سألتنى دينك ايه ؟؟ , فقلت لها :أنا مسيهية و جوزى مسلم ( طبعا رد مدام سيلفى لا يخلو من البله ) , فردت عليا البنت دى و كانت مهجبة (محجبة) " و جوزك موافق على كده ؟؟" , و كمان سواق التاكسى بيسألنى , و زميلى فى الشوغل يقول لى : لأ , الكلام الى عندكوا فى فرنسا مش يمشى عندنا , يعنى يبقى جوزك مسلم و أنتى مسيحية ؟؟ , طب فيها ايه لما أبقى أنا من دين و جوزى دين تانى ؟؟. لم أعلق كثيرا , لأن أسئلتها كلها نبهتنى لشىء مهم جدا و هى أن كل الاجابات لها أصل واحد , أصل مسبب لكل هذا , و هو فى وجهه تحالف الفقر مع الجهل . مدام "سيلفى" لا تكف عن الأسئلة , لا أعلم ان كان لديها الحق فى كل هذا الاندهاش بحكم الفارق الشاسع بين ما اعتادت عليه بباريس , و ما تشاهده هنا يوميا ؟ أم أن (جتتنا هى اللى نحست) فغير مقدرين لحجم المشكلة ؟؟ و لكنها أوجزت لى مرة الأمر فى جملة سقطت منها سهوا "أنا اتجوزت هسين (حسين) من خمسة و عشغين سنة و كان فى مباغك , دلوقتى ليا خمسة و عشغين سنة متجوزة هسين و برده مباغك " و طبعا استنتاجى يا مدام سيلفى أن المشكلة من الأستاذ حسين .

هناك 55 تعليقًا:

prince4ever يقول...

سلام عليكم يا ساره
بجد يا بنتي اي حاجه بتكتبيها بستمخ منها اوي...ايه الجمال ده كله... انتي اه بتحكي موقف شخصي بس مواقفك الشخصيه بيطلع منها حاجات حلوه بجد...انتي يا بنتي من القله اللي بقول عليهم مثقفين بصفه عامه و من القله الانثويه اللي بقول عقلهم جامد اوي بصفه خاصه... بجد كتاباتك بتكيفني جدا
ليكي عندي تاج في مدونة حينما تكلمت قلت...ما هو اصل قصاصة ورق سبيشيال مينفعش يتكتب فيها غير قصص و بس
اقبلي التاج...معنديش اعتذارات من اي نوع
سلام يا عسل
اه بالحق...اول تعليق..
:)

غير معرف يقول...

are you kidding "MouBaghak" and "Moubaghak" for the comminh 100 year , you can check the history , Ramsis governoed Egypt for 80 yers so"MouBaghak" still warming up...lol.. your blg is excellent

سارة نجاتى يقول...

سلام عليكم يا رامى ياللى رافع معنوياتى

ده عشان أنت بس حلو بتشوف الحاجة حلوة , و بما أن كتاباتى "بتكيفك" فايدك على حق الحشيش اللى قرأته امبارح ههههههه
, ح أشوف حوار التاج من عينيا يا باشا

منور

سارة نجاتى يقول...

غير معرف

oh , so we are supposed to wait another 65 years , and if Ramsis governoed for 80 years how old was he when he took over the country ?lol , thanks you for your opinion , and please write a name next time so that I know you ya basha.

مياسي يقول...

هاي مش أسئلة هاد تحقيق!!!

العلقه مع الأجانب مش علقه فعلا:)

أنا قريت المدونه كلها جميله وأسلوبك جميل أيضا

تحياتي لك

Che يقول...

ايه الجمال اللى انتى كاتبه ده ... لما قريت البوست عرفت ليه علقتى على ملاحظه ربط اللبس بالاخلاق
و على فكرة مدام سيلفى لما بتتكلم على الناس اللى اتغيرت انا معاها فى كده .. انا فاكر لما كان عندى 10 سنين يعنى من 17 سنه مش من 100 سنه الناس كانت غير الناس و الدنيا فضلت كده لغايه يمكن 10 سنين و بعد كده ابتدينا نتغير ... فجاة بقى فيه مسلم و مسيحى .. و ارثوذكس و كاثوليك .. و سنه و شيعه .. و احنا و هما ... لاحظت انك ربطتى الفقر بالجهل و التخلف و ليا ملاحظه ان الربط ده مش صح دايما لان الناس زمان برضه كان فيهم فقرا و مع كده بلد زى اسكندريه و القاهرة زمان كانت كوزموبوليتان .. تلاقى جريج على طليانه على انجليز و فرنساويين و شويه ناس طرد بلاد كمان و مع كده محدش كان حاسس بغربه .. انما دلوقتى ادينى مصرى و حاسس انى غريب فى بلدى و مواطن درجه عاشرة و ماليش امل اترقى ... الفكره هى سياسه غسل الدماغ اللى بتتم بطريقه منظمه و منهجيه و يستوى فى كده اللى معاه فلوس و اللى معاه الستر و اللى واخد دكتوراة و اللى واخد فى سنانه كلنا فى الهوا سوا
معلش التعليق سرح منى و طلع طويل

انا حره يقول...

هههههههههه

ايه داااااا

انتى بتدبسينا تخلينا نقرا نقرا ومبسوطين وفالاخر تدبسينا فواجب وتاج

انا للاسف مليش فيه عشان كدا سامحينى مش هقدر احله

بوست جميل

micheal يقول...

هههههههههههههه..بجد مدام سيلفي دي شكلها ست طيبة أوي
أنا من رأيي أن جتتنا خلاص نحست والمجتمع وصل لمرحلة تعفن فكري تام
وبفتكر جملة الزعيم في فيلم السفارة في العمارة
بتهرش في ايه يا ابني رجلك ماتت وعفنت خلاص
:)
تحياتي

Tamer Diab يقول...

:)
بد كنت بضحك من قلبي بالأخص علي علي موضوع الفقر والاخلاق في مسلسلات رمضان فقط
للأسف مدام سيلفي عندها حق في حاجات كتير
أما بالنسبة لموضوع الدهشة ده فده موجود في كللل الأجانب الي بيجوا هنا بيحسوا أنهم راحوا السيرك القومي وشايفين بقي القرود والنسانيس - ل كان فيه في المسرح القومي نسانيس يعني - ويتشقلبوا من الضحك علينا والدهشة
يا سارة أحنا بالنسبة ليهم والله مسرح كبير بس بيحبوا يروحوا عشان هما ملهمش دور ع المسرح ده هما مجرد مشاهدين لكن لو ليهم دور كانوا ولعوا في نفسهم
بس احنا جتتنا نحست زي مبتقولي

Tamer Diab يقول...
أزال المؤلف هذا التعليق.
سارة نجاتى يقول...

مياسى

شكرا على رأيك يا مياسى , و هو كان باين له تحقيق فعلا

تحياتى

سارة نجاتى يقول...

تشى

ده بعض اللى عندكم يا عم تشى , متفقة معاك أن كان فى فقر , لكن وجود الأجانب من التجار و الباشاوات كطبقة راقية و واجهة يحاول المجتمع أن يحتذى بها كان فارق كتير , و بعدين لاحظ حاجة الوضع وقت الملكية كان أفضل عن كده , و وجود قضايا وطنية فى هذا الوقت لها دور كبير فى تنمية الشعور الوطنى , انما المواطن عندنا قضيته أنه يقف على طابور العيش الصبح

منور يا جميل و ابقى تعالى دايما

سارة نجاتى يقول...

أنا حرة

لأ بهزر معاكى يا معلمة , لا واجب و لا حاج , أنت مش شايفة العالم الباردة اللى قابلك هههه, محدش حل حاجة هههههه

تحياتى لك

سارة نجاتى يقول...

مايكى

و الله عندك حق أدمغتنا بقى هى اللى ماتت و عفنت , و محتاجة نبعت نجيب قطع غيار صينى ليها

منور

سارة نجاتى يقول...

تمورة

طب شفت بقى , هات حق الضحك أنت كمان , ما أنا ح أحاسب البرنس على التكييف و أنت ع الضحك ههههه
عجبنى أوى لما قلت فى الأخر أن عشان مالهمش دور ع المسرح بيتفرجوا , فعلا يعنى لو الملايو ولعت دلوقتى , أنا مش ح أحس بحاجة فعلا , و نفس الكلام بالنسبة لهم , مع الفرق أن مدام سيلفى دلوقتى بتعتبر نفسها مصرية خلاص , دى عاشت هنا أكتر مما عاشت فى بلدها , الست بتعانى معانا برده

منور يا تامر باشا

EmY يقول...

انا عايزه رقم جلوس و تقعديني جنب حد مذاكر كويس و تسيبني اغش منه براحتي يا كده يا مش هاجاوب
ابقي خديني معاكي الدروس انا عايزه اتعلم فرنش مع اني حمار صغنن في اللغه دي مش عارفه غباء مني ولا من الأخرين بقي

نيجي بقي للأمتحان بتاعك احنا ناس زي الفل و مافيش زينا و كل دي اشاعات يروجها الغرب الكافر

طب ليه اهله يعملوا فيه كده ؟؟

علشان في عندنا معتقدات عباره عن جهل و تأثر بالدجل والكلام الفاضي ده
طبعا الاعمار و الرزق بأيد الله و بس الاسم مش هايغير اي حاجه بس للأسف لسه عندنا ناس كده يا رب ينقرضوا بقي


ليه الرجاله بيبصوا يبصوا يبصوا ؟؟؟

علشان عايزين خرم عنيهم و بقي معندهمش دم ولا اخلاق اعتقد ده سوء تربيه و انعدام اخلاق و دين و محدش بيفكر ان كما تدين تدان و ان دي سفاله و قلة ادب و مش عايزه ازود بقي علشان انا علي اخري من الاشكال الضاله دي


ليه كله يتفرج علي بعضه ؟

علشان ناس فاضيه مش لاقيه حاجه تعملها غير الفرجه علي خلق الله و التريقه تقدري تقولي بيطلعوا عقدهم و فرغهم بقي بدل ما يتسلوا بكتاب بيتسلوا ببعض

ليه البنات بقي شكلهم وحش ؟؟

تقريبا بطلوا يبصوا في مراياتو عندهم عمي الوان
مش عارفه ليه بقوا مبهدلين في نفسهم
و عندهم كوكتيل الوان في اللبس و الميك اب مش طبيعي بس مش قادره اعرف ايه السبب

ليه مافيش ضمير ؟؟

مافيش ضمير علشان مافيش لا اخلاق ولا دين ولا حب للمجتمع و الناس

ليه بنحب نعرف الدين ؟؟

يمكن فضول و حشريه انا شخصيا لا بحب اسأل حد عن دينه ولا يسألني عن ديني لان دي علاقه خاصه بين العبد و ربه

سارة نجاتى يقول...

ايمى هانم

ما أنتى شاطرة أهو و بتعرفى تحلى , و الله لو كنت معايا فى الاسكندرية كنت خدتك معايا و لو أنى مش عارفة ليه شكلى ح أقلبها , بدأت تنفخنى .
هى برده بتشتكى من اللى أنتى قلته عليه ده بتاع أن كل حاجة عندنا ماشيه كويس , تقولى انتوا بتحبوا تقولوا tout va bien يعنى كلوا ماشى كويس , مش تحبه تعترفوا بمشاكلكم .

منورة يا دماغ التهييس كلها

أنا حر يقول...

انا هاجي اخد معاكي درس مش علشان اتعلم فرنساوي
انما علشان استمتع بالكلام مع مدام سيلفي صاحبة العقلية المتميزة
تحياتي

حازم سويلم يقول...

بصراحة شخصية مدام سيلفى عجبتنى جدا, فهى ذات فكر ليبرالى, كما انها مثقفة بشكل ما وتجيد رؤية الأمور فقد وضعت يدها على بعض أهم صور الخلل الذى اصاب المصريين فى الربع قرن الأخير
حاولى تتعلمى منها كتير بجانب اللغة الفرنسية بالطبع
تحياتى

سارة نجاتى يقول...

أنا حر

هى فعلا على الرغم من تعليمها المتواضع الا أن عقليتها متميزة جدا

تحياتى

سارة نجاتى يقول...

حازم سويلم

و الله يا حازم شكلى ح أقلبها كفاية عليها كده ههههه

منور

احساس لسه حى يقول...

عزيزتى

ما اكيد اى بلد بتختلف عن بلد فى العادات والتقاليد وطريقة العيشة

وشوفى هى ممكن تستغرب من حاجات تشوفها فى مصر انتى اكيد ممكن تستغربى من حاجات تشوفيها فى باريس

مش هجيب امثلة لانها كتير اوى

بس احب اعلق على شئ

مين قالك ان ايام المينى جيب الرجاله مكنتش بتبص

شوفى الرجاله هتفضل تبص على الستات سواء بنقاب او بحجاب او ببكينى

بس اكيد كل رجل وله حدود النظره

انتى بقه تحسبيها على الاسئلة دى تتعلمى منها الفرنسيه

وتعلميها ايه طبع المصريين وليه هما كده

عتاب اخير وسؤال ليكى

ليه لما تنقد طبع فى المصريين مش بتردى عليها بنقد طبع موازى ليه فى الفرنسيين

اكيد تعرفى حاجات عن الغرب ممكن تنقديها بيه فى اى مجال تكلمك فيه

تحياتى

سلام

سارة نجاتى يقول...

حسام باشا

أرقى انواع النقد النقد الذاتى , و لو قرأت تعليقى على ايمى حتلاقى أنها قالت لى حاجة تخلينى مش أقدر أرد بعد كده , و تتلخص فى " احنا عندنا مشاكل بس بنعترف بوجودها , انتوا يبقى عندكوا المشكلة و مش عايزين حتى تعترفوا بوجودها طب ح تحلوها ازاى ؟"
طب أرد أقولها ايه , كلامها صح , دى مش عادات و تقاليد يا حسام و سؤال الناس عن دينها دى قلة أدب , تفحص المرأة بشكل مزعج لها دى سفالة , شكلنا باين عليه الفقر طب ما هى حقيقة , الضمير بيقل أكيد أنت عايش معانا فى البلد و شايف , و بعدين الست قالت مرة كلمة مهمة أوى " أنا يا سارة بأقول كل ده ليه , لأن أنا بقيت مصرية خلاص " , و بعدين لو تلاحظ حاجة هى قارنت ما بين فترة و فترة معنى كده , أنها حاسه بالتدهور اللى بيحصل .

أما الرجاله فى الخمسينات و الستينات ,مين قالك أنهم كانوا بالوطينة اللى ماشية دلوقتى , أنا سألت ستات كتير من اللى عاصروا الفترة و كان أخره يا جميل يا قمر , مش يمسكها يضربها فى الشارع , و مش كان فى حد "بيبوص " على رأى مدام سيلفى ههههههه
أسأل واحدة من قريباتك ,حتى لو كانت أول من لبسن الحجاب فى مصر , برده أكيد لها تعليق على المناخ العام حولها و ح تشرح لك .


تحياتى لك يا جميل

Zika يقول...

اولا ازيك ازيك ازيك عامله ايه ليكي وحشه انتي والبلوج بتاعك

ثانيا ازيك ازيك ايه الغيبه الطويله ده واحشاني جدا جدا جدا :P:P
المهم
اولا
الست دي بتتكلم صح .. مدام قالت دراع مرسي تبقي بتتكلم صح .. قصدي يعني مدام قالت اننا مابنعترفش باخطائنا تبقي بتتكلم صح

اما بالنسبه لموضوع البنات
من واقع خبرتي الازدواجيه البيولوجيه دون التطرق الي كيانات متعددة الاطراف سواء كان هذا ينبعث من الوعي او خارجه... معلشعندي امتحان ومش مذاكر
من واقع خبرتي ان اكان عندي نظريه بصي انا بحس ان البنات بقت تهتم بنفسها اكتر من اللازم او فاهمين الجمال غلط
يعني انا بشوف عيال عندنا في الجامعه .. البت من دول تبقي حاطه كيلو دقيق واتنين كيلو بتاع برتقاني كده طب ( دول فلاحين ) مالناش دعوه بيهم في بنات بقي بتبقي لابسه اكسيزوريس في كل حته في جسمها
من اول شعرها لحد رجليها اموت واعرف بيجيبوهم منين وتبقي لابسه بنطلون مثلا لونه غريب وتي شيرت اغرب
وهكذا نقيس علي كده .. سواء كانوا شوية البنات البيئه دول ههههههه او غيرهم
انا متهيالي ان كل ما الموضوع كان بسيط وهادي كل ما كان افضل .. هم بس يبطلوا شغل فيفي عبده ده

حاجه تانيه
انا بختلف معاكم في حوار الراجله " بتبوص " وده لان البص ده بيحصل تي عندهم واذا قالتلك غير كده تبقي ماراحتش باريس هههههههه
اي حاجه ملفته لنظر لازم ابص . بس هي بتفرق من بصه للتانيه فيه بصه بريئه وبصه مش بريئه
لكن ما تقنعينيش ان لو بنت حلوهع ولابسه حلو ومعديه جمبي مش هبص
لا هبص وهبص ثم هبص بس مش هبص بقلة ادب .. انا بعمل تمويه في البصه
ببص من غي رما حد ياخد باله اني ببص
ماتسالينيش ازاي بس والله ما حد بياخد باله

وبعدين انا عايز اقول ملحوظه
انتوا عمالين ترغوا وما خدتيش الدرس .. الست دي بتضحك عليكي بتضيعلك وقت الحصه في الرغي

والله بوست تحفه يا ساره وانتوا الاتنين مشكله
سلام

سارة نجاتى يقول...

زوكا

أنت زى عسل هههههه , موتنى من الضحك

أنت وصفت ظاهرة موجودة , لكن تسميتها اهتمام بالنفس زائد غير دقيق , هو نقول عليه عدم القدرة على تحديد كيف تكون البنت دى شيك أو حلوة أو لأ
بمعنى هى فاكرة ان الكتير حلو , غيرها شايف أن القليل هو الجمال و هكذا , لكن الخلاصة أن مفهومنا عن الجمال تأثر بتأثر المستوى الاجتماعى بدليل أنك قدرت نفرق بين الريفيةو البئة و الشيك بنظرة , صح و لا ايه ؟؟
أما بخصوص البص ,و اللى كلكوا علقتوا عليه و أنا شايفة البطحة اللى على دمغتكوا من عندى هنا ههههه
فالست أكيد مش بتحور , و بعدين هى قارنت أول ما جت من خمس و عشرين سنة لدلوقتى , و حست بفرق , ح أقولك حاجة أقف فى أى مكان سياحى نص ساعة ( عملتها قبل كده ) و لاحظ كام واحد أجنبى بيتفحص الستات اللى بتعدى و قصاده كام واحد مصرى بيعمل ده , ح تلاقى نسبة تخض , لأ طبعا مفيش فى أى حته كم البهدلة عندنا هنا .

أما أنك بتبوص , فانا موضوعية جدا , مش أقدر أقول لواحد مش تبص لأى حاجة جميلة سواء بنت أو باكو شوكولاتة , لكن أنت ممكن تبص لشىء تعجب بيه و ممكن واحد يبص بسفالة لواحدة محترمة بصه تتكسف تبص بيها لوحده سيكو سيكو واقفة ع الناصية , صح و لا لأ؟؟
أما تمويه البصه أيوه أيوه , عارفاكوا ياللى بمتموهوا أنتوا هههههه
طب شفت بقه أنت راعيت مشاعريها ازاى ؟؟ على الأقل عامل تمويه أهو

زيكا , الله يخرب بيتكوا كلكوا ههههه

منور

يا مراكبي يقول...

بوست جميل .. نقد حقيقي وموضوعي

وأنا شايف زيك كده إن كل مشاكل المجتمع دي سببها الأستاذ حسين ده اللي طابق على نفسها من 25 سنة

وومن يقول...

ههههههههههههههه ايه ده طب والله انتي عسل

وانا سعيدة بزيارتك وسعيدة اكتر اني اتعرفت علي مدونتك

وياستي لو زعلانة إنك مزورتيش الجرحي كفاية شعورك الأعمال بالنيات برضة

Blank-Socrate يقول...

سعيدا جدا بزيارتك مدونتى
-----------
سعيد اكتر باسلوب تفكيرك المنفتح
فعلا افضل طريقه نقييم نفسنا بيها اننا نقارن او نشوف طريقه تفكير الناس التانيه
"اهنا مواطنين نعيش مع بعض فى بلد واهد متساويين يهمنا أنت بتنتج ايه ؟؟ بتعمل ايه ؟؟ مش دينك ايه ؟؟ دينك ده ربنا يحاسبك عليه,"
احنا للاسف بنتظاهر بالتقوى و التديين
لكن عمليا كتير معندهمش ضمير زى المدرسيين اللى اتكلمت عنهم مدام سيلفى
:)
تحياتى ليكى

سارة نجاتى يقول...

يا مراكبى

أشكرك يا باشا , خلاص بقه احنا ح نفركش ما بينها و الأستاذ حسين , بدل ما هو سايبها تزن على ودانى و عمال يتفرج على ميلودى بره ههههه

تحياتى

سارة نجاتى يقول...

وومن

أنا أسعد يا جميل , و على رأيك هى بالنيات برده

تحياتى

سارة نجاتى يقول...

Blank-Socrate

ده أنا اللى أسعد يا فندم , فعلا كله بقه همه يعرف دين اللى قدامه ايه , المسلم يسألك ح تقوم تصلى و لا لأ؟ , و المسيحية تدور فى ايديك و رقبتك على الصليب , حاجة تكسف .

تحياتى ليك و نورنى كده على طول

Zika يقول...

ساره
بيني وبينك يا ساره هي مش بطحه
دي حفره بعيد عنك
بس انا عندي كرامه ازاي ازاااااااي بنت حلوه تشوفني وانا ببص عليها
دي تبقي مصيبه
ليه هي مين ان شاء الله
وبعدين
انا ببص بصه مؤدبه وربنا
ومش بتكلم كمان

وبعدين نرجع لموضوع انهم مش بيبصوا
انا عملت الحوار اللي انتي قلتي عليه ده وهم مابيبصوش فعلا بنفس الكميه لكن والله انا بشوف ناس في البي بي سي كولا بيتفرجوا عالمذيعه ولو عدت واحده يقوم اتنين صحاب واقفين يشاوروا ويعلقوا
اصل دي حاجه علميه
انا لو فيه حاجه ملفته لازم هابص سواء بارادتي او مش بارادتي علميا صدقيني بجد مش بهزر ان اخدت كده في علم النفس
لكن قوليلي ايه حكاية اليونان دي

hasona يقول...

كما أوضحت التحالف الخطير بين الفقر والجهل
وفي الاتجاه الاخر تزاوج السلطة والمال
،،،
ولكن لأختلاف البيئة والعوامل المحيطة بالنشأة( طبعا ليست عوامل التعرية) تختلف طريقة التفكير والاستنتاج كمان
،،،،
طبعا ليست كل أسباب واستنتاجتها صحيحة
قعلا الان قد اختلفنا عن ذي قبل - وهذا الاختلاف قد يكون متعمد ويتم توجيه

سارة نجاتى يقول...

شفت طلعت حفرة كمان ازاى هههه
ما انا عارفة يا خويا أنكوا عملنها كرامة مش أدب لا سمح الله هههه
فعلا زى ما بتقول لازم تكون واحدة ملفتة أوى لدرجة أنك تتفرج و أى رجل من أى جنسية لازم يتفرج , لكن لما واحدة لابسة خمار و لا نقاب و لا حتى لبس محتشم حتى لو مش محجبة و تيجى تلاقى مش بس تفحص بالعينين لا و تعليقات واطية كمان , تبقى أنت أكيد أكيد فى مصر .
خليهم ( يبصوا بتمويه على رأيك)هههه .
أما اليونان فلا هو حوار و لا حاجة ,هى الست شايفة أنى شكلى اسبانيول أو يونانى , و عايزه تجوزنى ابنها بأى طريقة , قلت أهرب بقه , هو أنا ناقصاها عشان يبقى فوقيها ابنها كمان .ههههههه

لا بجد المرة دى منور

سارة نجاتى يقول...

حسونة

كلامك مضبوط ليست كل الاستنتاجات و أسبابها صحيحة , لكن مشاكلنا على درجة من التعقيد و التشابك تجعل كل مشكلة و تدهور بيصب فى التانى

منورنى يا باشا

Zika يقول...

طيب احم احم
بما اني كنت المره اللي فاتت منور
هجرب بس اشوف انا منور كده ولا لأ
شوفي النور عنده ايه نظامه
انا جيت اهو :P

الربان يقول...

تحياتي

الشباب بينظر الي الفتيات بعد ان شاهد
الكليبات...و الافلام التي تظهر ان " رزالة " الشباب علي الفتيات قد تؤدي الي تعارف و علاقة....لقد استطاعت هذة النوعية من الافلام و الكليبات اللعب علي مشاعر الشباب و قيمهم.

الناس عادة ما تتدخل فيما لا يعنيها..
الدين لا يجب ان يكون معيارا للتمييز
او الاستغراب بيننا....لان الدين ببساطة امر بين العبد و ربه...

جميعنا لازم يضع هذا في اعتبارة و الا يجرح في الاخرين بسبب دينهم....علينا ان
نتعلم ثقافة التسامح و التعايش علي اساس الانسان و سلوكه و ليس الانسان
ودينه.

تحياتي و تقديري

سارة نجاتى يقول...

زيكا , يخرب بيت الخفة يا شيخ

أنا قصدى عشان علقت مرتين المره دى يا ظريف

مضلم يا زيكا

سارة نجاتى يقول...

الربان

متفقة معاك أن مفيش ثقافة تسامح , و مش ده كان الوضع زمان

لكن يتهيأ لى الانحدار العام فى الأخلاق هو سبب البلاوى دى , لأن ممكن تكون الأفلام و الكليبات هى اللى بتصور واقع مش العكس

تحياتى لك و منور

مصري جدا يقول...

واللة يعني
زي ما تقولي كدة
اذ ربما
هالبت
بفكر

اة
كلامك كلة صح

~*§¦§ Appy §¦§*~ يقول...

هى معاها حق فعلا
بس واضح انها شافت مستويات معينه لان المستويات السيمبل
الكويسه الانيقه موجوده كتير
وعموما موضوع الميك اب التقيل سمه عصريه عند المصريات بعضهم مبيعرفش يفرق بين ميك اب النهار والليل
واهو كله بيدهن وخلاص
ودى كانت ملاحظه برضه واحده صحبتى هولنديه

طالب ثانوى يقول...

بوست اكتر من رائع بجد جميل جدا هو صحيح موضوع شخصى بس بيناقش فية حاجات كتير اوى مهمة

karakib يقول...

الاندهاش فعل العباقرة يا عزيزتي

سارة نجاتى يقول...

مصرى جدا

دى مجرد وجهات نظرى أنا و هى ,

بس هالبت أنت منور

سارة نجاتى يقول...

ابى هانم

هى فعلا بتحتك بمستويات معينة , هى صحيح عايشة فى منطقة راقية , لكن بتسوق عربية فى شوارعنا , و برتوح تشترى الخضار من السوق , و بتشتغل فى مدرسة هنا , يمكن ده يكون زى ما بتقولى نخليها تحتك بمستويات دهان الميك أب ههههه
بس هو كان الستات كده زمان و لا الوضع اختلف ؟؟ أنا مش عارف

و منور يا جميل

سارة نجاتى يقول...

تفتكر يا هانى ؟؟
مش عارفة والله ,بس الاندهاش مرتبط عندى باحداث الشىء , و على الغرم أن فى أشياء متوقعاها الا أنى بندهش برده
, عبقرية بقه تقول ايه ههههههه

تحياتى و منور

سارة نجاتى يقول...

طالب ثانوى

معلش يا باشا , عينيا باظت من القعدة ع الجهاز فالترتيب جه ملخبط معايا , يهمنى رأيك يا معلم روقة , و الصراحة أهم حاجة المواقف الشخصية لسبب واحد أنها بتعرفك أنك مش لوحدك , بس كده.

تحياتى يا جميل و نورنى بقه

اسماء عوني يقول...

والله مدام سيلفي دي مشكلة
خصوصا انكوا قاعدين مع بعض عاملين دويتو تحفه
بجد ضحكت اوي
لكن انتي ازاي مش تدافعي عننا وتقولي اننا احلي بنات في الدنيا والكلام اللي مش حقيقي دي
عارفه المشكله انك مش هتعرفي تكدبي عليها لانها عايشه في مصر بقالها كتير
يعني اكيد قلبت مصريه
ومش بعيد تلاقيها بتعرف تردح كمان
بوست زي العسل
باي

سارة نجاتى يقول...

سمسم

ما المشكلة يا باشا , أنها بتقول أنتوا مش كنتوا كده و بقيتوا كده ,و الله لو تشوفيها و هى بتتكلم تقولى مصرية محموقة أوى على بلدها

انما عن الدويتو شكلى كده ح نزل أنا و هى ألبوم سوا , تصدقى أنهى بتعرف تغنى و تعزف و تمثل متعددة الاستخدامات من الأخر هههههه

منور يا فندم

elsha3er يقول...

موضوع جامد جدا وبصراحة كل الاسئلة منطقية جدا

تحياتى


احمد الشاعر

Cognition Sense يقول...

أسلوبك أكثر من روعة يا سارة

كنت بقرأ وانا مستمتعة جداً، عندك القدرة إنك تكتبي اليوميات بأسلوب روائي بيشد فعلاً و مش بيزهق بعكس كتير من اليوميات اللي بيكتبوها كبار الكتاب

إستمتعت جداً بصراحة وهافضل أجي عندك كتير

سارة نجاتى يقول...

شاعر

فينك يا عم أحمد من زمان ؟ ,و بعد فين جبهة المعارضة و الرفض عندى ؟؟ , ده أنا قلت الولد ح يعصر التدوينة هههههه

تحياتى الكتييييييره

سارة نجاتى يقول...

Cognition Sense

بجد من افضل التعليقات اللى جات لى , و تعالى يا معلم فى أى وقت بس ح أدفعكوا اشتراك بعد كده ههههه

تحياتى و منوره دايما

kiki يقول...

情趣用品,情趣,情色,成人,A片,自拍,情趣用品,情趣,色情,成人影片,色情影片,免費A片,情趣用品,情趣,成人網站,A片下載,日本AV,做愛,情趣用品,情趣,美女交友,A片,辣妹視訊,情色視訊,情趣用品,情趣,色情聊天室,聊天室,AV,成人電影,A片,情趣用品,情趣用品,情趣,情趣

情色,A片,AIO,AV,日本AV,色情A片,AV女優,A漫,免費A片,A片下載,情色A片,哈啦聊天室,UT聊天室,聊天室,豆豆聊天室,色情聊天室,尋夢園聊天室,080視訊聊天室,080聊天室,080苗栗人聊天室,免費視訊聊天,上班族聊天室,080中部人聊天室,視訊聊天室,視訊聊天,成人聊天室,一夜情聊天室,辣妹視訊,情色視訊,成人,成人影片,成人光碟,成人影城,自拍

情趣用品,A片,AIO,AV,AV女優,A漫,免費A片,日本AV,寄情築園小遊戲,情色貼圖,色情小說,情色文學,色情,色情遊戲,一葉情貼圖片區,色情網站,色情影片,微風成人, 嘟嘟成人網,成人,成人貼圖,18成人,成人影城,成人圖片,成人影片,UT聊天室,聊天室,豆豆聊天室,尋夢園聊天室,080聊天室,080苗栗人聊天室,080視訊聊天室,視訊聊天室

情趣用品,A片,aio,av,av女優,a漫,免費a片,aio交友愛情館,a片免費看,a片下載,本土自拍,自拍,愛情公寓,情色,情色貼圖,色情小說,情色文學,色情,寄情築園小遊戲,色情遊戲,嘟嘟情人色網,一葉情貼圖片區,色情影片,情色網,色情網站,微風成人,嘟嘟成人網,成人,18成人,成人影城,成人圖片,成人貼圖,成人圖片區,成人小說,成人電影

情趣用品,情趣用品,情趣,情趣,情趣用品,情趣用品,情趣,情趣,情趣用品,情趣用品,情趣,情趣,情趣用品,情趣用品,情趣用品,情趣用品,情趣用品.情趣,情趣,情趣,情趣,視訊聊天室

麻將,台灣彩卷,六合彩開獎號碼,運動彩卷,六合彩,遊戲,線上遊戲,cs online,搓麻將,矽谷麻將,明星三缺一, 橘子町,麻將大悶鍋,台客麻將,公博,game,,中華職棒,麗的線上小遊戲,國士無雙麻將,麻將館,賭博遊戲,威力彩,威力彩開獎號碼,龍龍運動網,史萊姆,史萊姆好玩遊戲,史萊姆第一個家,史萊姆好玩遊戲區,樂透彩開獎號碼,遊戲天堂,天堂,好玩遊戲,遊戲基地,無料遊戲王,好玩遊戲區,麻將遊戲,好玩遊戲區,小遊戲,電玩快打

麻將,台灣彩卷,六合彩開獎號碼,運動彩卷,六合彩,線上遊戲,矽谷麻將,明星3缺一,橘子町,麻將大悶鍋,台客麻將,公博,game,,中華職棒,麗的線上小遊戲,國士無雙麻將,麻將館,賭博遊戲,威力彩,威力彩開獎號碼,龍龍運動網,史萊姆,史萊姆好玩遊戲,史萊姆第一個家,史萊姆好玩遊戲區,樂透彩開獎號碼,遊戲天堂,好玩遊戲,遊戲基地,無料遊戲王,好玩遊戲區,麻將遊戲,好玩遊戲區,小遊戲,遊戲區,電玩快打,cs online

情趣用品,情趣,A片,AIO,AV,AV女優,A漫,免費A片,情色,情色貼圖,色情小說,情色文學,色情,寄情竹園小遊戲,色情遊戲,AIO交友愛情館,色情影片,情趣內衣,情趣睡衣,性感睡衣,情趣商品,微風成人,嘟嘟成人網,成人,18成人,成人影城,成人圖片,成人貼圖,成人圖片區,UT聊天室,聊天室,豆豆聊天室 ,哈啦聊天室,尋夢園聊天室,聊天室尋夢園,080苗栗人聊天室,080聊天室,視訊交友網,視訊

ann يقول...

滿...........................