الخميس، 1 يناير 2009

اذاعة الاسكندرية فى رأس السنة

دليلك الى ارتفاع الضغط و الصداع النصفى هو الاحتفال مع اعلامنا الحكومى بالسنة الجديدة

و لأنى الى حد ما متابعة للراديو أوقعنى حظى العاثر فى اذاعة الاسكندرية و فى مذيعى اذاعة الاسكندرية

فليست المشكلة فى أنهم لا يدركون معنى الجانب الترفيهى للاعلام من خلال الاختيار الخاطىء للموضوعات المطروحة فى ليلة رأس السنة فقط , الا أنهم لا يعرفون كيف يتكلمون و ماذا يقولون , حتى أنك تشعر من مستوى الحوار و اللغة المستخدمة أنك بصدد محطة رئيسها " مرعى بتاع الكليمة " .

*فعندما أرادوا التعليق على أحداث غزة فى جلسة تضم عدة مذيعين قال أحدهم : نحن لا نقبل المزايدة على الدور المصرى , المصريين حكومة و شعبا متعاطفين مع الفلسطنين بغزة , و أضافت مذيعة يبدو من صوتها أنها فى منتصف العمر : "لما قرأت تعليقات الشباب على الأزمة فى غزة على الانترنت و فى التليفزيون اكتشفت أن شبابنا " بيفهم" , و سعدت جدا أصل دى حاجة جديدنا على شبابنا " .

تعليق جانبى : فعلا عزيزتى المذيعة , أنت خير دليل على أن شبابنا من عشرين سنة لم يكن " بيفهم "

*أما عن البطالة فتقول مذيعة : البلد مفيهاش بطالة , فيها سوء اختيار من الشباب , هما مش عاوزين يشتغلوا , الخريج الحديث دلوقتى عاوز ياخذ زيي وأنا بشتغل ليا تلاتين سنة , تصدقوا يا جماعة ( موجهة كلامها لزملائها) احنا لما عملنا دورة تدريبية للشباب من خريجى الجامعات عشان نعدهم يبقوا مهنيين ( قصدها صنايعة ) مطلبناش منهم أى حاجة و فى المقابل ادناهم 150 جنيه فى الثلاث شهور , أيوه و الله 150 جنيه فى ثلاث شهور, و بعد انتهاء الدورة عرضنا عليهم وظائف و رفضوا , كل ده عشان مش عايزين يبقوا مهنيين .

*أتقبل النفاق بسعة صدر , و لكن نفاق + غباء , هذا كثير جدا , أحترم المنافق الذكى الذى يقول مثلا :" فى بطالة, بس دى أزمة عالمية , الحكومة ملهاش دعوى" . أو : "البطالة نسبتها ضئيلة جدا فى مصر " . أو جريدة تطالعنا بعنوان : "50 ألف فرصة عمل جديدة" . لكن أعزائى المذيعين , فجعيتى فيكم كبيرة , حتى النفاق لا تجيدوه .

*و عن التدخين , تقول مذيعة بانفعال شديد " المدخن ده واحد مريض نفسيا واحد مريض يا جماعة , ازاى نقول له أن ده يضر صحتك ومش عايز يسمع الكلام ( على شاكلة شرب اللبن الصبح) , ده مش طبيعى , و تضيف زميلتها مؤيدة : "دول عاوزين علاج نفسى " ( بمعنى أخر , يصفون كل مستمعيهم من سائقى التاكسيات و الميكروباصات بأنهم مرضى نفسيين ) , و يتدخل هنا مذيع صائحا بطريقة ذكرتنى ببائع "الدوم" الذى كان يقف بجانب مدرستى: " و حرام , حرام شرعا" , فترد عليه :" أيوه تبديد للفلوس كمان ".

تنويه لكل المدخنين : فى طريقكم للطبيب النفسى , اصطحبوا معكم مذيعى المحطات الذين يعلمون أن لا أحد يستمع اليهم و لكن على الرغم من ذلك مصرون على اهدار وقتنا و وقتهم .

*تحكى احداهن معلقة على أكثر ما استوقفها و أسعدها أثناء مشاهدتها لاحتفالات التليفزيون الحكومى برأس السنة :" عجبنى أوى لما جابوا فى البيت بيتك بيسألوا بائع مصرى " احنا بنحتفل بايه بكرة ؟" فقال: " مش عارف , أنا بحتفل لما أخلص البضاعة اللى قدامى " فسأله المراسل " يعنى انت مش عارف أن بكرة سنة جديدة ؟" " فرد: "لأ , معرفش ". وتضيف المذيعة (و هى سعيدة جدا بأن بساطة المواطن المصرى وصلت لمرحلة أنه لا يعلم أننا على أعتاب سنة جديدة ) " فعلا , هو ده المواطن المصرى البسيط الجميل , بكل ما فيه من رضا و قناعة , ياريت لو كلنا عندنا نفس الرضا و القناعة "

هل هذا ما أعجبها حقا ؟؟ ألاتعلم أن عند الكشف على القوى العقلية أول ما يوجه للمريض " النهاردة ايه فى الأسبوع ؟" , لكن يبدو أن عندنا يجب أن يكون السؤال : " احنا فى سنة كام يا ترى ؟؟" , هل هى سعيدة بحالة " البنج الجماعى" ,أم فخورة بحالة الانفصال المرضى عن العالم ؟؟

لا , لن أرحمكم لا بد أن تمروا بالتجربة كلها , و لذلك سأختم بحلقة مميزة جدا استمعت اليها من برنامج اسمه- تقريبا - "حكايات شهرزاد "

:(و أخذ العباد فى الشكوى يا أمير , من ارتفاع أسعار السواقين , و لما سألنا السواقين قالوا : السبب فى المسئولين الفاسدين , اللى بيفرضوا علينا فلوس كتير , فنضطر لرفع الأسعار على الراكبين , و فى يوم مر اللواء العظيم :و رأى أحد الفاسدين يأخذ الأموال , فأمر بعقابه فى الحال , و عاد للناس الأمن و الأمان , و ما أن مر بموكبه اللواء العظيم حتى عادت الأحوال لما كانت عليه فى القديم )

لقد اكتفينا بهذا القدر عزيزى المستمع , أقصد عزيزى القارىء , و أرجو أن نتضامن جميعنا يوما مع سائقى الميكروباصات و التاكسيات لاضطرارهم الى الاستماع الى المحطات الاذاعية الحكومية ,و نعذرهم على ارتفاع معدلات " البلاهة " بينهم . و لنا أمنية واحدة فى 2009 , محو أمية مذيعى الاعلام الحكومى.

هناك 34 تعليقًا:

Empress appy يقول...

الحمد لله انك اكتفيتى الا انا كنت هموت منها
انتى يا بنوته زعلانه من ردي عليكي لسه معلش انا بنطح ساعات بقى كده فى اخواتى عادي يعنى الله

متزعليش يا قمر من اختك الكبيره بقى

Unknown يقول...

ربنا يكون في عون الي تم ابتلائه بالبرنامج ده
انتي متأكده انه برنامج اذاعي عادي مش تعذيب جماعي

المذيعه دي اكبر دليل علي الرياده المصريه واخدلي بالي انت يا حج انس

كل سنه و انتي طيبه يا قمر

احساس لسه حى يقول...

عزيزتى

يا افندم انتى لسه بتسمعى الاذاعه ايه الروقان ده ولا اللسعان نقول

عارفه اللى بيخنقنى ايه

ان المذيع يقول كلمة عبيطه والموجوديين ميعترضوش على الكلام تلاقى ردهم اغبى من كلامه

بس عجبنى موضوع اللى سالته عن السنه الجديده بس قوليلى

تفتكرى متبنج ولا متخدر

تحياتى

سلام

Zika يقول...

انا كنت ناوي احطلك حتي تعليق علي لبوست اللي فات
كنت هاطالب فيه باعلان حرب الزلابيه عليكي
عشان ما بتعمليش تدوينات بقالك اسبوع :D
عموما خلاص طالما جيت لقيتك حاجه بوست يبقي عقونا عنك
هقرا واجي
:D

Zika يقول...

والله العظيم تحفه يا ساره والله
بس يا بنتي انتي ايه اللي جبرك علي كده
انا عن نفسي بطلت استمع الي هذا الهراء اللي اسمه راديو من زمان

بجد مسخره حوار الراجل بتاع السنه الجديده ده بيفكرني بفيلم بتاع هنيدي
"السنه الجديده بتمثلك ايه ؟
انت عبيط ياض انت "
" تحب تقول ايه بمناسبة للسنه الجديده
اقول حسبي الله ونعم الوكيل "
لا ولا المره اللي بعدها " اقول ربنا ينتقم مني .. الحاج صاحب البيت "
هههههههههههههههههههه
مشكله والله
لا ولا الراجل بتاع الدوم ده
" وحرام .. حرام شرعا "
ياللا
بوست هايل جاد يا ساره يعوض الفتره اللي فاتت
تحياتي
كل سنه وانتي طيبه

سارة نجاتى يقول...

ابى هانم

لا خلاص مش زعلانة يا جميلة , و كل سنة و أنت طيبة

سارة نجاتى يقول...

جزرتى ايمى

موضوع أنه برنامج اذاعى ده مش متأكده منه , بس هو تعذيب أكيد

منورانى يا باشا

سارة نجاتى يقول...

احساس لسه حى

و الله يا حسام المشكلة أنى مش بعرف أمارس أى عمل روتينى أو يحتاج أن الواحد يكون بيشتغل "سولو" الا و تكون فى حاجة بتزن جنبى , عادة ما بتبقى أغانى بس الحظ بيوقعنى فى الحاجات المسلية دى ساعات
أما بقى أن ردودهم أغبى من بعض فالمثل بيقولك ما جمع الا ما وفق

بس مش عارفة متبنج و لا متخدر , هو أكيد كان استطلاع رأى فى غرزة عشان الغيبوبة الفظيعة دى


تحياتى يا جميل

سارة نجاتى يقول...

زيكا اللى أعلن عليا الحرب

طالما زلابية فأهلا بالحروب يا حبيبى , بس هو المشكلة فى حاجة , أنا بالنسبة أنى أكتب حاجة كأنى بطلع فلوس عليا ههههه
, على طول حاسه أن اللى ج أقوله محتاج يقعد مدة فى دماغى قبل ما أكتبه , يمكن عشان أنا بالنسبة الكتابة مش مجرد تعبير نفسى , مش عارفة تصدق ممكن الموضوع ده يحتاج بوست لوحده

أما عن الراديو فزى ما قلت لحسام , لازم حاجة تزن جنبى و خلاص

و عندك حق فعلا فكرتنى بالفيلم ههههه
و منورنى كده دايما ورافع معنوياتى

اسماء عوني يقول...

امممم
انا بارضه زيك بسمع الراديو للاسف
لما بكون راكبع عربيتي
وبسمع طبعا حاجات غريبه ومريبه وعجيبه :D
لو بتسمعي البرامج الكوميديه او المفروض يعني انها كوميديه
ببقي عايزه ادوس بنزين واخبط في اي حيطه
الانتحار ارحم من الراديو بكتير

micheal يقول...

هههههههههههههه...ده ايه المسخرة دي
يا بنتي طب مش كنتي تقوليلي أهو كنا نضحك لنا شوية يوم ديل السنة الللي قضيته لوحدي زي الكلب في البيت
:)
بس تعرفي أني دايما بكتشف أن النوعية من الناس دي حافظة مش فاهمة
بس حلوة أوي المدخن مريض نفسي
ي
دلوقتي أنا عارفت الحكومة طلعت تنظيم المختلين عقليا منين
:)
بقولك يا سارة عندك فيس بؤبؤ أكونت
لو عندك
ضيفيني لو تحبي
michael mohsen youssef
تحياتي

عمرو يقول...

الحقيقه أن ده كوكتيل من النفاق و الغباء و الجهل و الغلاسه و ربما تصل للفعل الفاضح
المشهد كله عبثى و سخيف و ما يدور حولنا من مثل هذه العبثيات ليست بمستغربه لما وصل اٍليه الموقف ككل
بس أنتى عندك صبر أيوب علشان بتقدرى أنك تتابعى الكلام ده

عين فى الجنة يقول...

اذا كان المطلوب محو امية المذيعين امال حنضحك على مين

Che_wildwing يقول...

أهو الناس اللى فاضية يا تغني
ياتشتغل في الاذاعة
لحد ماهنوصل لوقت مش هنلاقى فيه سميعة

prince4ever يقول...

ههههههههه
جامد اوي يا ساره
ازيك الاول ..انا بقالي كتييييير اوي مجتش... وبصراحه مكنتش بروح في حته اساسا...
بس بجد سخريتك جميله جدا و عندك حق بجد في كل حاجه
ان شاء الله مش هتأخر تاني
تحياتي يا ساره ليكي و للموضوع الجامد ده

غني يابهيه يقول...

كل سنه وانتى طيبه

من داخل استوديوهات بهيه
تعالى زوريها بس هاتى هديه معاكى عشان عيد ميلادها

سارة نجاتى يقول...

أسماء
لا مش تنتحرى عشان اذاعة الاسكندرية , خسارة فيهم , خليها بى بى سى مثلا , حاجة تستاهل

منورة

سارة نجاتى يقول...

مايكى

مش أنت لوحدك يا حبيبى اللى قضيته فى البيت , كل سنة أقول ح أخرج و كلمتى متنزلش الأرض أبدا , و بعدين تنزل المرة دى هههههه
على الحوار الفيس بؤبؤ أنا رديت عندك خلاص , انتظروا دخول سارة الى عصر الفيس بؤبؤ coming soon

منورنى

سارة نجاتى يقول...

راجى

هههههه على رأيك

تحياتى

سارة نجاتى يقول...

تشى

هو فعلا مفيش سميعة , بس تقول ايه فى الأدمغة؟؟

تحياتى

سارة نجاتى يقول...

البرنس الغايب من كتييير

عمرك أطول من عمرى , من ساعة ما شفت أنك نزلت بوست جديد و أنا عايزة أدخل عندك , بس الجهاز باظ اليومين دول عشان كده أتأخرت فى التعليقات برده.


أوعى تقطع كده تانى

منور يا باشا

سارة نجاتى يقول...

غنى يا بهية

طالما فيها هدية مش داخلها هههههه

تحياتى و كل سنة و هى طيبة

سارة نجاتى يقول...

عمرو

معلش لسه واخدة بالى من تعليقك

بص تابع الحاجات دى من وجهة نظر ساخرة , ساعتها ح تتقلب من الضحك

تحياتى

شفـقــة و إحســــان يقول...

انتى تحفة يا سارة لا وناقدة هايلة بس نعمل ايه هو ده حال الاعلام والاعلامين بس مش كلهم والله فى ناس برضوا متميزة بس مش فى الاذاعة وبعدين يا بنتى هو لسه فى حد بيسمع الاذاعة
تحياتى
شفقة

خالتى بمبة يقول...

ايه اللى صبرك لما سمعتيها للاخر وليه تحرقي دمك مالها اذاعة الشرق الاوسط جميلة وخفيفة ومرحة

حمادة زيدان يقول...

سارة

أولاً معلش اتأخرت كتير عقبال ما زورت المدونة عندك بصراحة دمك عثل

ثانياً أنا مستغرب لطولة بالك .... والله أنا لو حصل معايا نفس الموقف هعمل حل من الاتنين إما اتصل وأهزقهم أو أقفل الراديو في وش أهلهم وارتاح

ثالثا وصل النفاق والرياء الحكومي حتى في القنوات اللى كنا مفكرينها خاصة ومش حكومية على رأسهم الحج معتز ابن ماما نونا ومعاه أختنا منى الشاذلي والحياة اليوم اللى مش فاكر ومش عاوز افتكر أسم المذيع لأنه بارد وفقعلي مرراتي ....

ياللا كلوا خير
ومعلش طولت عليكي
سلاموزات

سارة نجاتى يقول...

شفقة

أه و الله يا شفقه بقه , لسه بسمع راديو , بس غصب غنى يا جماعة , و ميرسى على رأيك يا جميلة

تحياتى ليكى يا قمر

سارة نجاتى يقول...

خالتى بمبة

اسمك لذيذ أوى ههههه
طبعا اذاعة الشرق الأوسط أفضل بكتير , بس بينى و بينك كلهم على بعض فى الضياع
منورة يا باشا

سارة نجاتى يقول...

حمادة باشا

لا و لا يهمك يا جميل تعالى فى أى وقت ,المشكلة أن هما بيبقوا مرتبين الاتصالات , أنا مرة اتنرفزت من القناة الخامسة , سألونى ح تقولى ايه , و بعدين اعتذروا لى و مش رضوا يطلعونى ع الهوا , حتى القناة الخامسة بتتأمر علينا هههههههه
و كويس أن لقيت حد متفق معايا فى موضوع معتز ده لأنه بيجيب لى حساسية , لكن منى الشاذلى حرام عليك الصراحة , الست بتحاول تتعامل فى اطار المسموح ليها

نورنى بقه كده على طول

Tamer Diab يقول...

عارفة يا سارة
البوست ده فكرني لما كنت أتجنن واقعد اتفرج علي التليفزيون في العيد غصب عني
ألاقي المذيع ولا المذيعة المتألقين دائماً بيسئلوا طفل مثلا في جنينة
بتحب العيد ؟!!!(هتشللل)
بتخرجي يا حبيبي في العيد ( وأتشل تاني منتي شايفة الواد جايب حلل هو وأمه وقاعد يطفح في جنينة اهو )

سارة نجاتى يقول...

تامر

ده يا حبيبى دليل أخر على سمة الغباء , و الاستسهلال برده , أنا مش عارفه هما بينقوهم كده قبل ما يعينوهم و لا ايه ؟؟

تحياتى

ست الحسن يقول...

عجبتني أوي حكاية البنج الجماعي دي يا سارة... بجد ضحكت من قلبي

تسلم ايدك يا بنوتة

غير معرف يقول...

滿...........................

غير معرف يقول...

بصراحة واضح ان معظم المشاركين لا يعرفون المعني الحقيقي للاذاعة ولا ماكانت تمثله للاجيال السابقة وانا متاكد من سوء العرض للموضوع الذي ادي لهذه الكميه من السخرية والتهكم علي اذاعة من افضل الاذاعات العربية الا ةهي اذاعة الاسكندرية الحبيبة
احنا للاسف في زمن الكليبات الراقصه العاريه