الأحد، 26 أبريل 2009

تاج

سيداتى أنساتى سادتى .

ايمانا منى بأهمية الترفيه عن الضحايا .... احم احم ... أقصد جمهورى العريض ( شايفة حد معترض ) قلت أعمل حاجة خفيفة المرة دى , على عكس ما اعتدتموه منى ( نفس الشخص المعترض برده ) , و قلت أحل تاج لقيته عند عمرو و ابى و انجى و فى كذا مدونة تانية , و كان ناقص ألاقيه فى السى ان أن , فقلت خلاص يا بنت يا سارة ( أنا بس اللى اقول كده ) الواجب يناديكى , قصدى التاج يعنى .. استعنا ع الشقا باللله .

- اسمك ؟.

- سارة نجاتى يا حضرة الضابط .

- المشهور بيه وسط أصحابك ؟.

- ح يكون سنية يعنى , يا اما سارة ده فى العادى , سرسورى لو عايزين حاجة , و نجاتى ده المفضل لدى لأن صحاب اعدادى هما أول ناس يقولوا لى كده و لسه بيقولوه لحد دلوقتى .

- مجال دراستك ؟.

- ليه جايبن لى و ظيفة ؟؟ . و بعدين أنتوا الحكومة و عارفين كل حاجة .

اسم مدونتك ؟.

- بص يا خويا كده فوق , على ايدك الشمال كده لو ع الأدريس بار و اليمين لو على الصفحة نفسها , أه ح تلاقى عندك بالبنط العريض ( بنى أدميين ).

- صورتك الرمزية بتعبر عن ايه ؟.

- و الله كل ما أنوى احط صورة رمزية بكسل .

- هل فكرت باغلاق مدونتك ؟ و السبب ؟

- يعنى , جت الفكرة على نفوخى مرة و أنا مخنوقة , بس مقعدتش فى دماغى كتير , و من غير سبب محدد أنا كنت مخنوقة و فى حالة تخلينى عاوزة أقفل خزان أسوان نفسه فأكيد فكرت اقفل المدونة يعنى .

- ايه رد فعلك لو حد قل أدبه فى التعليق ؟.

- بص ح أقولك حاجة , هى محصلتش قبل كده , لكن لما بتحصل فى الحقيقة بعيدا عن النت يعنى ( قصدى لما حد الشيطان بيعمل فى دماغه حاجات مش كويسة يعنى ) بعرفه أحساس الجوافة فى الخلاط , لكن ع المدونة و طالما قبلت أسمع أراء الناس يبقى لازم أتقبل ده بصدر رحب , و قلة الأدب دى ح أعتبرها أول علامة ع النجاح لأن مفيش حد بيطلع اصله الواطى بسهولة كده .

- أسوأ مدونة ؟.

- ربنا امر بالستر .

- هيحصل ايه للميل بعد ما تموت ؟.

- ح يموت هو راخر .

- اديت الباس وورد لحد قبل كده ؟

- طب ما أنزله مع الاعلانات الصغيرة اللى بتيجى على فواتير الكهربا أحسن .

- السفر بالنسبة لك ايه ؟

- لو السفر للغرض اللى فى بالى , يبقى رغبة شنيعة , انما فى العادى مش بيمثل حاجة .

- المود بتاعك ايه ؟.

- مهيس و يميل للهزار و الضحك ( من بره ) لكن فى أعماكى الحكيكة بيبقى كلك جدا ( دى رقة ).

- بتعمل ايه وقت فراغك ؟.

- لما يبقى فى ح أقولك .

- الصفات اللى خدتها من والدك ؟.

- الاهتمام بالاشياء عندما تتجاوز حدود نفسى و نطاق مصلحتى الشخصية ( حد فاهم حاجة ؟ ) ده طبعا بجانب العصبية و التوتر .

-الصفات اللى أخدتها من والدتك ؟.

- الذوق مع الناس و الاجتماعية ده طبعا بجانب العصبية و التوتر .

- اكتر حاجات بتكرهم ؟.

- كلمة كره كبيره ,يمكن تكون حاجات بتضايقنى و هى كتييييييييره بس
عشان متفرفوش منى مش ح أقولهم كلهم , بضايق من الناس المغرورة جدا جدا , و بكره النفاق موووت , بكره لما واحدة تقعد تكلم عن مغامرات عيل صغير طول يوم , يعنى تبقى قاعد مع واحدة قريبتكم و طول يوم تحكى مغامرات حفيدها , الصراحة بتخنق بقه حتى لو شفتوها حاجة غريبة , و بضايق من منظر اللبس اللى مش لايق على
بعضه و بكره الرياضيات و الفونولوجيا ( فى دول بقه بكره ) و بكره الولد اللى بيتعامل مع البنت على أساس أنها شوال غلة أو شكارة أسمنت , و بضايق من البنت اللى بتتعامل مع الولاد على أساس أنهم كائنات فضائية , و بكره الوساويس اللى بتحدثنى بيها نفسى ساعات و بكره الدبان و كل أنواع الحشرات .. أه و بكره طارق علام لما بيمثل أو لما بيذيع الصراحة مفرقتش , و أهم حاجة كنت ح أنساها حبايبى مذيعات القناة الخامسة .

- أكتر حاجات بتحبهم ؟.

- قعدة الصحاب لما نبقى شلة كبير , الشوكولاتة الغامقة , الكتب اللى بتتكلم فى كذه موضوع بطريقة سلسة ( زى ماذا حدث للمصريين ؟ مثلا بتاع جلال أمين عشان تعرفوا قصدى ايه ) ده غير أعمال يحيى حقى , بحب الهدوم الشيك و بحب أعمل حاجات غريبة مجنونة ساعات, بحب أحس أنى بساعد الناس ( مش بمعنى اتبرع و لو بجنيه لأ ) قصدى يعنى أعمل حاجة مفيدة للمجموعة كبيرة من الناس فى شكل خدمة و اللى يجرب الاحساس ده يستغنى عن الهروين و الكوكايين و الفلين و كل حاجة . بحب البحر ساعة الغروب و بحب الدرة فى الصيف و بحب التايكوندو ( و اللى كنت بألعبه ) و بحب المسرح و بحب الباليه المعاصر و بحب ابقى نفسى و بحب أضحك على الحاجات الهايفة و أقعد أتريأ على صحابى , و بحب اكتب ( و خلتها لحكمة ما فى الأخر و لو أنى مقصدتش أرتب الحاجات اللى فوق ).

- شخصيتك نوعها ايه ؟.

- كوكتيل .

- لماذا دخلت عالم التدوين ؟.

- مش كرومبو بيقول : و أنتظرتك طويلا طويلا و شوق بداخلى و أنتطرتك و أنتظرتك و أنتظرتك و بعدين جعت رحت ضربت طبق كشرى ما هو مش معقول أقعد على لحم بطنى من الصبح . أهو فضلت منتظرة و لما لقيت نفسى أننى اذا لم أتفاعل ح أجوع , قصدى ح بطل أكتب , دونت .

- أجمل جملة بتتقال فى وصف مدونتك ؟.

- لأ ما هو مش بننشر هنا ثلاثية نجيب محفوظ يعنى , لكن فى ناس بتقول حاجات بتبسطنى بقية اليوم بجد .

-أحلى بوست كتبته ؟.

- أحلى دى حاجة الناس تحددها , لكن المفضل لدى هو الأخير بتاع " أن تكون انسان أولا " لأن أول مرة أكتب بوست عن القضية دى بس يزنق الرجاله ( الوحشين طبعا ) فى خانة اليك , بمعنى أدق يكون محكم شوية على النقطة اللى عايزه أوصلها .

- أفضل مدونة قريتها ؟.

- كل المدونات اللى بتابعها بتعجبنى .

- أفضل بوست قريته ؟.
- أساسى صعب افتكر حاجة زى دى , فممكن اقول حاجة و انسى حاجة , بس ح أختار ألبونات مايكى لأنهم مش مقترنين بالتدوين بس .
- الشغل بالنسبة لك ؟.
- حاجة مفيش بنى ادم عنده دم يقدر يعيش من غير ما يعملها .
- الانترنت بالنسبة لك ايه ؟.
- الحاجة اللى ح تجيب أجلى باذن الله , أنا ادمنت يا خويا خلاص .
- تمرر التاج لمين ؟.
- كل اللى ح يقرأ البوست مدبس فى التاج , بلطجة بقى .
بيييييييييس يا شباب .

هناك 66 تعليقًا:

مواطن مصري يقول...

ههههههههههههه تاج حلو

سارة نجاتى يقول...

مواطن مصرى

أنت أحلى يا معلم

dodda يقول...

بغض النظر عم التاج وانه ظريف
انا محدش يبلطج عليه....

اما هم بافى مدونتك اللى قريتها كلها
اقول انك مش محتاجه تاج عشان نعرف عنك المعلومات دي
وباختصار انتى تجننى ولذيذه جدا واسلوبك حلو فى الكتابه..

اما عن مدام سيلفى احل اسألها انا بقى
هما ليه الفرانساويين بيبوسوا بعض فى كل حته الشوارع والجناين والمحالات؟؟
وكأن البوس ممنوع فى البيوت؟؟؟

غير معرف يقول...

ما انتي شرباتاية اهو ودمك خفيف لية بتدينا بوستات تجيب تضخم في العصب الثمبتاوي

كل يوم الواحد بيكتشف حاجة جديدة فيكي

واللة يا سارة الواحد فرحان ان فية بنات زيك

شخصية متكاملة
ناقصك حاجة واحدة بس
أبن الحلال اللي ينسيكي اسمك
وانا لمنتظرون

وش اخر براءة

سارة نجاتى يقول...

دودا

أهلا بيكى يا باشا
بس أنتى لو قريتى التعليقات اللى ع الموضوع ح تعرفى رأيى فى الموضوع ده , أنا مش مع الناس تمشى تبوس فى اى حته ,
بس هى قالت حاجة من دول غلط ؟؟قصدى النقد اللى علينا يعنى

و بجد شكرا على رأيك و انا بقدر جدا لما حد بيدخل و بيقرأ المدونة كلها

منورانى و نورينى على طول

سارة نجاتى يقول...

مصرى جدا

أولا موضوع ابن الحلال ده , فبعض الشر عليا ( أنا ح اكرس حياتى للبحث فى حركة نقد النقد ) ههههههه

و ميرسيه على رايك يا معلم بس اللى بيصنع دماغى مش التاجات المهيسة , و لكن البوستات اللى بتجيب تورم فى العصب الثمبثاوى

نور كده على طول

Magi Mostafa يقول...

اجاباتك زى السكر وانا مش هدبس ولا حاجه لانى حليت التاج ده مره هى شغلانه ولا ايه

Zika يقول...

بقولك ايه
انا مش لاقي حاجه اقولها
هاقول ايه
طيب
قوليلي انتي اقول ايه
وبعدين ايه سرسورتي دي
:D
لا انا هاقولك يا سوسه
:P:P

غير معرف يقول...
أزال المؤلف هذا التعليق.
Unknown يقول...

حلو اوى التاج يا رورا
الا مجال دراستك ايه يا اوختشى؟؟؟

assafo anaroze يقول...

و الله لي الشرف اني اتعرف عليكي يا سارة
اتمنى انك تتواصلي مع مدونتي غبت عنها كثير
مودتي

سارة نجاتى يقول...

ماجى

خلاص يبقى براءة يا ماجى

سارة نجاتى يقول...

زيكا

متقولش يا حبيبى , السكوت علامة الرضا

الا فين البلورة ؟؟

سارة نجاتى يقول...

غير معرف

ازاى يا باشا ؟ فى باليه معاصر طبعا , ده غير البانية بالتأكيد ههههههه

يعنى مثلا عندنا فى دار الأوبرا فى الفترة الأاخيرة عمالين يجيبوا باليهات معاصرة و منها كان كارمن اللى اتعمل بشكل مودرن جدا , لا ناس واقفة على طراطيف صوابعها و بعيدا عن الشكل التقليدى للباليه

و بعدين ابقى قولى أنت مين عشان مش أحس بالغموض كده هههه
نورنى على طول
تحياتى

سارة نجاتى يقول...

انجى

علم لم النقطة ( من ورا الرقاصة يعنى ) و دى بندرسها اربع سنين و بعدين بنعمل دبلومة سنتين لو عايزين نحضر دراسات عليا ههههههه
بس جديدة رورا دى
منورانى يا باشا

سارة نجاتى يقول...

أسافو

ده انا اللى ليه الشرف يا فندم , بس أنت كمان بتحب مذيعات القناة الخامسة و لا ايه ؟؟

غير معرف يقول...
أزال المؤلف هذا التعليق.
سارة نجاتى يقول...

غير معرف

و الله حاسه أعرفك

ما علينا تشرفنا يا عم الغامض

غير معرف يقول...
أزال المؤلف هذا التعليق.
Empress appy يقول...

لا انا فلت منه يا بنتى ارحمى جاوبته يا حبيبتى
بس انتى فلسعتى من اجابات بشويه هزار كان نفسى تردى بجد يا سوسه

الدرعمي يقول...

حلوة محدش بيطلع أصله الواطي بسهولة .. طبعا أنا كمان براءة من التاج لأن كل أسئلته تقريبا معروفة إجاباتها لزواري .. معلش اسمحي لي أصفق لهذا الغير معروف لأنه بيتكم صح جدااا @تحياتي@

سارة نجاتى يقول...

غير معرف

ده أنت بقى عملت بحث عليهم و طلعوا كلهم عيال سيس و أنت اللى بتفهم هههههههه
و الله لو ده ج يبسطك خلاص , أنا يهمنى شعبى يكون راضى ههههه
أنا قصدى لو مدون قول عن مدونتك ,بس يا سيدى
و انا ضد المجاملات و انت لو قرأت موضوع هنا كنت كتباه عن انطباعاتى عن التدوين بعد شهر من الدخول فيه , ح تلاقى ده رأيى
بس قلبتنى ضحك على فئة كن صديقى دى , افتكرت الأغنية فى ودنى

أنا برده حصل لى الشرف
و نورنى على طول

سارة نجاتى يقول...

ابى

هههههههه أه يا خبيثة يا فهمانى , بس و الله مجاوبه بصراحة

منورة يا جميلة

سارة نجاتى يقول...

الدرعمى

لأ يا خويا لأ
( ده أنا فى الحارة لابسة جلابية و غوايش من ايدى لكتفى فى الكادر , و فى ايدى التانية سكينة لحمة طول متر و نص )
تصفيق هنا لأ ههههههه
على فكرة بعت لك الميل

تحياتى يا باشا

غير معرف يقول...
أزال المؤلف هذا التعليق.
سارة نجاتى يقول...

غير معرف

لأ و فى نوع كمان : نيرون شرف نيرون

متزعلش منى , بس كل الناس دى ولاد ستين فى سبعين و حضرتك الوحيد اللى عنده دماغ فيهم و قرر يترفع عن هبل المدونات؟؟

طب طالما شايف أنها حاجة ملهاش لازمة و الناس بتطلع فيها عقدها , ليه بتضيع وقتك فيها ؟؟
و بعدين ده مش وضع المدونات بس أنت انطلقت لتحليل انماط شخصية من البنى ادميين موجود فى كل حتة
و التدوين ما هو الا شريحة من مجتمعنا , يعنى مش منتظر منه أن يعبر عن المجتمع فى ساحل العاج
فزى ما النماذج دى فى الحقيقة هى فى المدونات
و الكتابة عمرها ما كانت احلام , الا كده نوقف حركة كتابة المقالات و النشر و الأدب

فى كلام طبعا أنا متفقة معاك فيه بس التعميم و النظر للموضوع بسوداوية و التحامل الواضح ده بعد بيك عن تحليلك اللى أنت كنت بتقوله فى الأول.

ع العموم , ده رأيك و لك حق أن تراه كما تشاء .

سعيدة بوجودك
تحياتى

aMr saYed يقول...

مش عارف اصل يا سرسوري التاج ده معمول عشا ن الناس تجاوب عليه م شعشان الناس تبلطج عليه يا بنتي ده انتي نص الاسئلة مجاوبتيش عليها وبعدين وشك كده بقا حسيت انك داخلة افية للراجل يعن ي هو عملك حاجة ده انتي مشكلة يلا بقا سلام ده لولكلوكلولكولكلوك

كله رغي كده

سارة نجاتى يقول...

عمرو تعلب
لا يا عموره حرام عليك ده انا مجاوبة على كلوا ماعدا سؤال واحد
و بعدين المفروض من خلال البلطجة و الترياة دى تفهم اللى ما بين السطور بس نعمل ايه فى الزكاوة ؟؟

أيوه كفاية رغى امشى يلا هههههههه
سلام يا باشا

غير معرف يقول...
أزال المؤلف هذا التعليق.
سارة نجاتى يقول...

غير معرف

واضح أن لديك مشكلة - اسمحلى - فى رد الفعل لدى ما تقرأ
لأنك تراه من خلال قالب معد مسبقا خاص بك , و لذلك ترد على بشكل أتوماتيكى بما يتناسب ما الخلفية التى لديك مسبقا عنه
على العموم
أنت مرحب بك فى أى وقت

سارة نجاتى يقول...

غير معرف

أنا ح أصوت بجد لما قرأت تعليقك تانى , فين ذكر " الحركة " ده ؟؟
حركة الكتابة و الأادب شىء و التدوين شىء , و لما يكون ده منبر لنقل ده شىء تانى خااااااااااالص

غير معرف يقول...
أزال المؤلف هذا التعليق.
سارة نجاتى يقول...

غير معرف

و الله أنا اللى حاسه أنى واخدة غير حقى
لأن مدونتى و طبيعى أتابعها , لكن أنت التعليق مش بيعدى عليه دقيقتين بلاقيه مردود عليه و كأنك قاعد هنا

أنا قلت أنك متبرمج لأأن أنت رديت على كلام انا مش قلته خالص و راجع التعليقات قدامك ح تلاقى ده اللى حصل . أنت رديت على حاجات لم تذكر أساسا . منها أنى بتهمك أن بتقول ع المدونين حركة , فين الاتهام ده , أنا مش عارفة .

و بعدين أنت ليه
بتشركنى فى مشاكلك الشخصية و فى قصورك فى التواصل مع الناس , أن جيت جنب حاجة من دول ؟؟

سلام نهائى يا سيدى

Unknown يقول...

الأستاذة سارة نجاتى
تحية طيبة و بعد
لقد تكعبلت فى مدونتك العظيمة مرتان
مرة حينما هم صديقى مايكل بالإشارة الى تدوينتك الإنسان أولاً لنقرآها و نستفيد منها و لكن بيد انى وجدت انها مطولة بشده تكاسلت عن قرائتها
ثم الكعبلة الثانية كانت اليوم عند الصديق فاروق طالب ثانوى
و ها قد وصلت الى مدونتك
و قرأت ذلك التاج
و انا الأن على استعداد لتحمل المسئولية كلها و قد اتخذت قراراً ان اتابع مدونتك و ان اعود الى صفوف الجماهير التدوينية
و يشرفنى ان تقومين بوضع مدونتى لديك فى المدونات التى تقومين بمتابعتها حين تجدين وقتاً ،
و قد قمت بإضافة مدونتك لدى ايضاَ
هذا و تفضلوا بقبول فائق الإحترام و التقدير
----
تحريراً فى 30/4/2009
الساعة ال 11:56
مقدمه لسيادتكم
بدراوى
صاحب مدونة طعم البيوت

micheal يقول...

ههههههههههههههههههههه..لمض يا عم نجاتي طبعا زي ما قلتلك بس والله جامد ويا باشا مش عارفين نقولك إيه يعني علي موضوع الألبونات ده
مسيطنا ع الاخر يعني..ع العموم ليكي عندي ألبون كمان 3 أيام
سلام يا عم نجاتي

سارة نجاتى يقول...
أزال المؤلف هذا التعليق.
اسماء عوني يقول...

سوكااااااا
ايه الاجابات الدلع دي
بتفكريني بنفسي يا بنتي
لا تاج ايه
عندي حموضه انا من الحاجات دي
بالنسبه للرد علي التاج احم احم
ثانيه واحده بس ماما بتندهلي
ايوااا جايه اهووووووووووو

bolbol يقول...

معجب بمدونتك----- انت رائعه

Blank-Socrate يقول...

هاااااااااى
ساسا
انا بسلم
:)

سارة نجاتى يقول...

بدراوى
بعد التحية ,
تم الموافقة المبدئية على الطلب المقدم من قبلكم لالتحاق بعضوية نادى .. أقصد المدونة بنى أدميين و ذلك بعد دفع اشتراك قدره خمسين الف جنيه كاش و جواب توصية من ولى عهد أسبانيا ( مراعاة صعوبة الوصول لولى عهد بريطانيا ) هذا بالاضافة لامضاء تلاتين موظف من هيئة السكة الحديد , و3 ختم من الجوزات و ست اختام من مصلحة الضرائب , ده بجانب بعض النثريات :
1) جناح حمامة مريضة نفسية
2)شنب صرصار مراهق
3) فار يبقى خاله عمه

تحريرا فى تمام الرابعة مساء
و تقبلوا وافر احترامنا

ههههههههه تنور يا عم فى أى وقت بس تقرأ الموضوع اللى قبلوا , هو بمزاجك و لا ايه ؟؟

سارة نجاتى يقول...

مايكى

امشى انت ورايا بس , و ح تروه فى داهية .. قصدى فى ألف سلامة ان شاء الله ههههههه
بس أنا عايزه البون بصوتى , كل اغانيك يا اما لكرستينا اجيليرا أو سيلين ديون مش معقولة كده يا مايكى

منورنى يا باشا

سارة نجاتى يقول...

غير معرف
كان غيرك أشطر يا عم الحاج

سارة نجاتى يقول...

أسماء عونى
ما هى الاشكال المبلطجة دى بتتلاقى و الله


حموضة ايه ؟؟ أنتى و ماما ح تحلوه ايه رأيك بقى ؟؟ههههه

نورنى يا سمسم

سارة نجاتى يقول...

بلبل

يعنى خلاص , أنزل الانتخابات ؟؟ هههه
منور يا فندم

سارة نجاتى يقول...

بلانك

ده أنت رايح فى داهية , فينك يا عم مينا ؟؟
يلا سماح المرة دى
سلامك وصل يا معلم

سارة نجاتى يقول...

بلانك
على فكرة أنا زعلانة منك فى حاجة

الولد اللى قالك المفروض مش تقول ان شاء الله مش رديت عليه ليه ؟؟
احنا ناس دماغها أكبر من كده

اسماء عوني يقول...

خلاص خلاص هاجاوب عالتاج اهو
ماما مين
ماما عند ربنا انا باستعبط بس نياهاهاهاها

Unknown يقول...

ساره

وبعدين يا ختي
أنا بعرف عنك بالصدفه البحته وباجي بلاقي الناس علقوا وخلصوا وبدهم يروحوا كمان؟ مش شعور الصراحه!!!

التاج لطيف يا ساره بس فعلا مش محتاجه تاج

كل اللي حكيتيه بتعمليه وبتكتبي عنه وعشان هيك بعرض عليكي تاج الأسرار الخمسه

هاداك فضايح أكتر:) الا صحيح شو برجك؟ ليه حاسيته انا العقرب يا الميزان؟

ساره أحلى شي مذيعات القناة الخامسه وردودك على التعليقات-مسخره فعلا :)

micheal يقول...

ههههههههههه..طب روحي بقي غني أغاني الألبون الجديدة وابتدي بأوربريت أبو الفساد
الألبون المرة دي ضرب في المليان
:)
تحياتي يا عم نجاتي

سارة نجاتى يقول...

مياسى

ههههههه لأ طلعت منك أوت يا باشا
أنا برج العذراء
و أنتى ؟
و بعدين اعمل ايه فى المدونة اللى ما بتطلع ع الريدر ( واخدة بالى من ما بتطلع دى , عشان خطرك بس و كل أهل الشام ) .
بس ايه تاج الأسرار الخمسة ده ؟؟
ع العموم لكا يبقى عندى حاجة ح أبقى اجى أقولك

سلام يا قمر

سارة نجاتى يقول...

مايكى

لأ احنا عايزينك يا زينة الشباب ههههههه
مليان ايه بس يا عم ؟؟
روحت شفته يا معلم و جبار كالعادة

بييييييس

Unknown يقول...

ههههه

نو نو عذراء نووووووووووووو:( مش أصحاب معاهم أنا :( بس ساره استثناء أكيد:)

أنا جوزاء تشريت يعني:) وخدت بالي من ما بتطلع :)

الأسرار الخمسه هو تاج تحكي عن 5 أشياء ما حد بيعرفهم عنك غير حضرتك طبعا

وعشان هيك بحكيلك فضايح يا سرسورتي:)

Unknown يقول...

أنا سبت تعليق على التدوينة السابقة
أن تكون إنسان أولاً

Adam يقول...

الله علي القافيه الجميله
انا اتعثرت في مدونتك بالصدفه ولقيت موضوعك هايل وجميل
بس عجبني ردك الناشف علي الباشا وخلي بالك الحيطان ليها ودان
اخوكي ادم

سارة نجاتى يقول...

بدراوى

روحت شفته يا باشا , أنا قلت الولد عامل دراسة على موضوعى و لا بحث علمى هههههههه

تنور فى أى وقت

سارة نجاتى يقول...

أدم

و أنا بيهمنى يا أدم ؟؟ ههههههه

تنور يا باشا

سارة نجاتى يقول...

مياسى

معلش لخبط فى ترتيب التعليق يا جميلة

, بس و الله برج العذراء بيطقم مع اى حد ههههه
خلى بالك حوارات الابراج دى كتير منها مش دقيق
و بعدين ليه اسرار بس هو احنا ناقصين الفضايح ؟؟

منورانى خالص يا ميسو
الا يعنى ايه مياسى ؟؟

Unknown يقول...

لول طيب يا ساره:)
بالنسبه للأبراج أنا بحكيلك عن خبره متواضعه

وميّاسي تنويع على إسمي الأصلي؛ دلع يعني؛ معناه اللي بيمشي بخيلاء

بيتهيألي ما في داعي أوضح معنى خيلاء

Unknown يقول...

ساره

أوعى تكوني زعلتي؟

أنا مش قصدي والله بس بحكيلك عن تجربتي مع برج العذراء:)

وشو يعني قفشتي؟ وبالنسبه لخيلاء نحن نعتذر لساره اعتذارا عظيما اذا صار في سوء تفاهم؛ اكيد مش في بالي انك مش فاهمه الكلمه بس بصراحه كنت مستغربه انو معنى اسمي مش واضح؛ كمان شكلي رديت عليكي وانا لسا صاحيه من النوم!!!

عن جد يا ساره ما كان قصدي اي شيء مو منيح وبكرر أسفي مجددا :(

على راسي والله:)

سارة نجاتى يقول...

مياسى

أنا مش أقدر أزعل منك يا ميسو

و (قفشتى ) عندنا بالعامية يعنى ( زعلتى )
و بعدين أنا ح أعرف معنى اسمك ازاى و أنا اصلا معرفهوش , يعنى مياسى ده الدلع ؟
طب هو أصلا فى البطاقة ميساء و لا مايسون ؟؟ هههههههه

جت سليمة يا قمر , هو فرق اللهجات ده ح يودينا فى داهية ههههه

نورينى على طول

غير معرف يقول...
أزال أحد مشرفي المدونة هذا التعليق.
غير معرف يقول...
أزال أحد مشرفي المدونة هذا التعليق.
غير معرف يقول...

هيا المدونة دي مالهاش صاحب ولا ايه .... رجاء حذف هذه التعليقات المسيئة

اما ان كانت المدونة تتبني هذه التعليقات ... فارجو الايضاح حتي يمكننا الرد المناسب علي هذا الهذيان

وشكراااااااااااااااااا

سارة نجاتى يقول...

غير معرف

المسيح يا بسطويسى قال " أحبوا أعدائكم "

فين انت من ده ؟
اعتبرنا أعداءك يا اخى

سارة نجاتى يقول...

عير معرف 2

أنا أذكى من كده , يا بسطويسى
أبقى رد أنت ع الهذيان بتاعك

Unknown يقول...

سارة

ده برضو عشمي فيكي:)

لا ميساء يا سارة مش ميسون الله يخليكي:)

وأنا عرفت معنى قفشتي أخيرا الحمدلله

وعشان اختلاف اللهجات الوضع صار لازمو ترجمة:)

تشكر يا معلّم